8
Arun We' Yao: Zo: Qere Lo, Kai: Byid' Ru
(Pht 29.1-37)
1 Asang wa Moshe re-
2 Khinjaung mai bau: jham- gyad: ra" xau- qobo ngaui" xeim: qhid' mae" nung: jaung lo: dadau:- yao lo: shid' dau:- man" make' ra" mug dagyan re yu: ci mung:- Arun we' yao" yauggai zo: qere nga" qhid' kheim: mae" Zaung kham: dung: khyo jhui" li" ri:-
3 Ai: thao re mo, phung: geim" re aitau mae khai: zhang" to: wa,- ga: ta" ra".
4 Moshe wa Asang amyin" byid' ru we' dakhyo: mo,phung geim" zang" ham: li" gelao"-
5 Yao: wa- ana" ngo kad' nae" mau" wa Asang: yang amyin" byid' to" ra" mau" ngad: ra"- ga: yao: bam re ta" ra".
6 Moshe wa Arun we' yao" yauggai zo: qere qhid' au: khyo jhui" yu mung:- caung:pa" thung" re cao" yang: gaung cid' genae" qhid' mae" yao: bam re ta" ra".
7 Yao: wa Arun re bau: vhe'- ai: dao mae bau: qhang re vhe' byid: mung:- yao" phyid' dam: mae phyid' cui: cui: byid' ra". Moshe wa yao: re bau: lo, kao: vhe' byid: mung:- aire tang sho' gyai yaung" sho' qo; to" ra" phyid' cui: yao" phyid' dam: mae yag byid' ra".
8 Amung: Moshe wa Arun re qao nghoe' pye: te' byid: mung:- ai: dao mae Urim we' Thummim a r 8.8: k Urim we' Thummim Urim we' Thummim ga" ru wa Mao"So: myid o: rure ta" phyid' nae" qhid' mae" khinjaung qe ci: ra" zai shid' ja: re ta" ru ngad: ra". Yao: bam khoru: kad' yang: ci ko" rure wa khyag' maba ngad: ra". *
9 Moshe wa Arun nho: au: mae au: thab' thab' byid: mung:- au: thab' qhid' kheim: shad' mae Asang: yang amyin" byid' to" ru we' dakhyo:- qhaug' byid' ru: nho: gyang" lho" ra" aso: ngad: ra" qhang: yang shaung: ra" qhang pye: te' byid' ra".
10 Ai: thao Moshe wa gyad xau re yu mung:- Asang: qhid' kheim: Zaung mae we' aimae jo; ra" gu: ja: khao: ngo" mae gyad: ra". Yao: wa ceru: kad' yang: Asang re alhab' qhaug' byid' ra".
11 Yao: wa xau dajhid' re yu mung:- aijham Asang re qhaug' byid: nae" qhid' mae" phan dao mae re:- ainho: zai kug jham: dao mae re:- cid' nae" jarung: mae re:- ainho: tao" mae re:- nhad' lhang vhag' sheim: byid' ra".
12 Yao: wa Arun re yao" au: mae xau vhe' gyad byid' yang: lo, kai" ra" khyo re kad' byid' ra".
13 Ai: thao Moshe wa Arun nho: yauggai zo: qere qhid' khyo jhui" yu mung:- Asang: yang amyin" byid' to" ru we' dakhyo:- yao: bam re bau: vhe' byid:- yao: bam: phyid' dam: mae phyid' cui: cui: byid:- yao: bam: au: mae maug kyab' taui" te' byid: ra".
14 Ai: thao Moshe wa qobo ngaui" xeim: qhid' mae" nung: jaung lo: re she: li" mung:- Arun we' yao" yauggai zo: qe wa ai: dao mae yao: bam: lo, kai: byid' ako".
15 Moshe wa aire se' yang: sa: daqhae: re yu mung:- aire qhaug' byid: nae" qhid' mae" yao" lo,nyhug' yang phan akhyug jham mae" zang khyug au: jham re gyad byid' ra". Ai: thao yao: wa dang: ra" sa: gu: re phan qao: mae vhe' khyo" pye' ra". Yao: wa ceru: kad' yang: aire qhaug' byid: mung: kyang" san: pye' ra".
16 Moshe wa khuglam khugsang: jham mae de; ra" xau jham alhab' gai: thao" ra" sang: dau- noce' shid' ce' we' ai: dao mae de; ra" xau jham alhab' re phan dao mae ngha" pye' ra".
17 Yao: wa ai: sho:au: shoqid bobo mung:- sho:-au jham we' dang: ra" gu: alhab' re yu mung:- Asang amyin" byid' to" ru we' dakhyo:- thang na: ra" jamu taung gaung shad' mae yengha" pye' ra".
18 Amung: Moshe wa phad' ngaui" byid' ra" ngaui" xeim: qhid' mae" yao lo: re she: li" mung:- Arun we' yao" yauggai zo: qe wa yao lo" au: dao mae yao: bam: lo, re kai: byid' ako".
19 Moshe wa aire se' mung: sa: re wa phan byid shad' geim" khyo shapye' ke' ra".
20-21 Moshe wa ai: yao lo: re phyo' yang:- khuglam khugsang: jham we' khyid jham re qid yang cid' shaung mung: au: we' xau jham we' daga" phad' ngaui" byid' ra". Asang amyin" byid' to" ru we' dakhyo:- dang: ra" yao lo: sho: jham alhab' re phan dao mae phad' ngaui" byid' ra". Ce: phad' ngaui" byid' ra" ngaui" xeim: wa zo:ve ngaui" xeim: ngad mung:- ai: meim sheim wa Asang re ngaui nhao: ra".
22 Ai: thao Moshe wa khinjaung qere lo, kai: byid' ru qhid' mae" ngad: ra" yao lo: shid' dau: ein: dau: re she: li" mung:- airu we' yao" yauggai zo: qe wa ai: yao lo" au: dao mae yao: bam: lo, kai: byid' ako".
23 Moshe wa aire se' mung:- sa: dajhid' re yu: yu yang: Arun nho: lo,yo shad' nobyin: mae- yao" lo,yo shad' lo,mo" cae: we' lo,yo shad' khyid mo" cae: mae- cao" gyad byid' ra".
24 Ai: thao yao: wa Arun nho: yauggai zo: qere qhid' khyo jhui" yu mung:- sa: daqhae: re yu yang:- yao: bam: lo,yo shad' nobyin: jham mae- yao: bam: lo,yo shad' lo,mo" cae: jham mae- yao: bam: khyid mo" cae: jham mae- gyad byid' ra". Ai: thao Moshe wa dang: ra" sa: re phan: nho: byid shad' geim" khyo shapye' ke' ra".
25 Amung: yao: wa xau- shomyi: xau- khuglam khugsang: jham mae de; ra" xau- gai: thao" ra" sang: dau- noce' shid' ce' we' aimae de; ra" xau- lo,yo shad' paung sin jham re yu: yu: ra".
26 Ai: thao yao: wa Asang re qhaug' byid' to" ra" man" make' lo: kad' to" ra" mug gyan mae" mug dathaung:- xau we' lhag' yang: kad' to" ra" mug dathaung:- mug sao: dakhye' re yu mung:- aijham re xau we' lo,yo shad' paung sin dao mae kai" to" ra".
27 Moshe wa ce: zo:ve jham alhab' re Arun we' yao" yauggai zo: qe: lo, mae ke' byid: mung:- yao: bam wa gakai: lai mung: ra" jhaung qhu" khyo" Asang re qhaug' byid' ako".
28 Ai: thao Moshe wa ai: zo:ve jham re yao: bam: lo, mae" yu: yu yang:- lo, kai: byid' runho: ngaui" xeim: khyo" phan dao mae phad' ngaui" byid' ra" ngaui" xeim: adao mae kai: mung: ngha" pye' ra". Ce wa zo:ve ngaui" xeim: ngad mung:- ai: meim sheim wa Asang re ngaui nhao: ra".
29 Ai: thao Moshe wa qao mhaung" re yu mung: gakai: lai mung: ra" jhaung qhu" khyo" Asang re qhaug' byid' ra". Ai: qao mhaung" wa lo, kai: byid' rumae ci: ra" yao lo: mae" Moshe nho: gae bam ngad: ra". Moshe wa Asang: yang amyin" byid' to: va" ru we' dakhyo:- ja: khao: ngo" re kad' ra".
30 Moshe wa gyad xau dajhid' we' phan dao mae" sa: dajhid' re yu mung:- Arun we' yao" yauggai zo: bam we' yao: bam: mai bau: jham: dao mae vhag' sheim: byid' ra". Ceru: kad' yang: yao: wa yao: bam re we' yao: bam: mai bau: jham re Asang re qhaug' byid' ra".
31 Moshe wa Arun we' yao" yauggai zo: qere- ai: sho: re Asang: qhid'kheim: Zaung kham: dung: khyo cilo" yang: jho' ge,- amung: Asang amyin" byid' to" ru we' dakhyo:- gyan khug mae bo: ra" lo, kai: byid' runho: ngaui" xeim: mug we' daga" aitau mae zo: ge,-
32 Dang: ra" sho:- mug jham alhab' re ngha" pye' ge,.
33 Naonhaung" nho: lo, kai: byid' ra" khyo agu byang" sho'- naonhaung" wa ai: Zaung kham: dung: mae nhad' ba lam: lam: na: jo, genae" ngad: ra".
34 Naonhaung" qobo re yu: pye' byid: nae" qhid' mae" ana" ba ngonhaung" kad' ra" mau" wa Asang: yang ngonhaung" kad' nae" qhid' mae" ngaonhaung" re amyin" byid' to" ru ngad: ra".
35 Naonhaung" wa Zaung kham: dung: mae nhad' ba lam: lam: myi" re: na" re: na: jo, mung:- Asang amyin" byid' to" ra" gu: re kad' na nae" ngad: ako". Naonhaung" makad' ko" re wa shid: li" genae". Ceru wa Asang: yang ngore amyin" byid' to" ru ngad: ra"- ga: ta" ra".
36 Airumung: Arun we' yao" yauggai zo: qe wa Moshe khyo" yang Asang amyin" byid' to" ra" gu: ja: khao: ngo" re kad' ako".