7
Dam: Khyug' Byid' Ra" Ngaui" Xeim:
1 O mae ta" to" ra" thung"li jham wa dam: khyug' byid' ra" ngaui" xeim: qhid' mae" thung"li jham ngad mung: aiwa gyai gyang" lho" ru ngad: ra".
2 Ce: ngaui" xeim: qhid' mae" xeim: kad' ra" gug'nyhug' re wa phad' ngaui" byid' ra" ngaui" xeim: gug'nyhug' jham re se' ra" phan: nho: mug: am: shad' mae se' nae" ngad: ra". Sa: re wa phan: nho: byid shad' geim" khyo vhag' sheim" ke' nae" ngad: ra".
3 Ainho: xau alhab' re yu: yu mung: phan dao mae ngaui" byid: nae" ngad: ra". Shomyi: xau- khug lam khug sang: jham mae lham" to" ra" xau-
4 Noce' shid' ce' we' aimae lham" to" ra" xau- gai: thao" ra" sang: dau jham ngad: ra".
5 Khinjaung pho" wa Asang re ngaui" byid' ra" zo:ve ngaui" xeim: khyo" xau alhab' re phan dao mae phad' ngaui" byid: nae" ngad: ra". Aiwa dam: khyug' byid' ra" ngaui" xeim: ngad: ra".
6 Khinjaung yham byu qemae" yauggai khag' re: aire gai: zo" ra". Ngadqere: aire gyang"lho" ra" jo, qo mae zo: ca" ra"- pe"mung:ga"re aiwa gyai gyang"lho" ru ngad: ra".
7 Qobo ngaui" xeim: we' dam: khyug' byid' ra" ngaui" xeim: byid: nae" qhid' mae" thung"li daja: za: ci nae" ngad: ra". Ai: sho: wa ngaui" xeim: ngaui" byid' ra" khinjaung pho" qhid' mae" ngad: ra".
8 Phad' ngaui" byid' ra" xeim: khyo" ngaui" byid' ra" gug'nyhug' nho: shoqid re: ngaui" xeim: re ngaui" byid' ra" khinjaung pho" qhid' mae" ngad: ra".
9 ce: ngaui" xeim: ngad: ra" myikhung: mae kao: to" ra" mug- ug' pye: mae kao: to" ra" mug- ug' the" mae kao: to" ra" mug- khye' khao: ngo" wa Mao"So re ngaui" xeim: ngaui" byid: yaug khinjaung pho" qhid' mae" ngad: ra".
10 Ngadqere: cinman" ngaui" xeim:- xau we' lhag' pye' va" ru ngad: re ngad- Aho ngad: re ngad ajam: gu: alhab' re wa- Arun kaung mae" khinjaung alhab' mo; qhid' mae" ngad mung: yao: bam re dano" no" gae bam khyo" byid: nae" ngad: ra".
Zam" Khug: Ra" Ngaui" Xeim: Jham
11 O mae ta" to" ra" thung"li jham wa Asang re qhaug' byid" ra" zam" khug: ra" ngaui" xeim: jham qhid' mae" ngad: ra".
12 Byu dayaug wa ce: ngaui" xeim: re Asang re qhaug' byid' ra" jeju so: ngaui" xeim: khyo" qhaug' byid' ngad: re yao: wa man" make' lo: kad' to" ra" mug- cinman" we' zhanlun xau we' lhag' mung: kad' to" ra" mug thau ngad re ngad- zhanlun xau gyad: to" ra" mug po: ngad re ngad- cinman" we' zhanlun xau lhag' yang: kad' to" ra" mug cug ngad: re ngad- ai: gug'nyhug we' daga" za: ngaui" byid: nae" qhid' mae" qhaug' byid: nae" ngad: ra".
13 Aitho' mago" yao: wa man" ke' yang: kad' to" ra" mug thaung: rere: qhaug' byid: nae" ngad: ra".
14 Yao: wa Asang re gakai: lai byid' ra" khyo"- mug ja: khao: ngo" mae" dalam: lam: re qhaug' byid: nae" ngad: ra". Airu wa gug'nyhug' nho: sa: re yu mung: phan khyo shapye' ke' ra" yaug khinjaung pho" qhid' mae" ngad: ra".
15 Ai: gug'nyhug' sho: re xeim: ngaui" byid' ra" ba mae yao: zo" pye' ca" ra". Thao: ba ne, kao joe" sho' pe" re" magai: tang" to: ngad: ra".
16 Byu dayaug wa yao" thao: ce' re zaui" pyang" ra" zam" khug: ra" ngaui" xeim: mangad: lao"- yao: yao: myid bug: yang: byid' ra" ngaui" xeim: re wa xeim: ngaui" byid' ra" ba mae alhab' gan sho' magai: zo" pye' ngad: ra". Tang" to" ra" gu: re wa thao: ba mae zo: nae" ngad: ra".
17 Sam ba ein: ba joe" sho' dang: jo; ra" sho: re wa ngha" pye' ca" ra".
18 Sam ba ein: ba mae ai: sho: re zo" ngad: re wa Mao"So wa byu aiyaug: nho: ngaui" xeim: re makhae: yu nae". Ai: ngaui" xeim: re yao" qhid' mae" masun" yu byid: nae"- aire masan masin" ga: wa myid: jho: yu byid' li" nae". Amung: ai: sho: re zo" ra" yaug khag' ngadqere: qobo: akyu" re kham zo" li" nae".
19 Ai: sho: wa caung:pa" thung" khyo" masan masin" ra" ja: daja: we' the' tin: yang: ngad: re aire magai: zo: ngad: ra". Aire ngha" pye' ca" ra".
Caung:pa" thung" khyo" san sin" ra" yaug khag' ngadqere: ai: sho: re gai: zo" ra".
20 Ngadqere: masan masin" ra" yaug zo" ngad: re wa yao: wa Mao"So: byu dayaug khyo" myid: jho: yu lo nae" mangad: ngad: ra".
21 Byu dayaug yaug caung:pa" thung" khyo" masan masin" ru ngad: ra" byu mae" mangad: lao"- gug'nyhug' mae" daja: ja: re the' tin: thao re ce: ngaui" xeim: sho: re zo: yaug rere: yao: re Mao"So: byu dayaug khyo" myid: jho: yu lo nae" mangad: ngad: ra".
22 Asang wa Moshe re-
23 Israel byu qe: qhid' mae" o mae ta" to" ra" thung" li jham re byid' ra". Aijham wa nung: xau- yao xau- cad' be, xau jham re magai: zo: nae" ngad: ra".
24 Yao: yao: za: shid: ra" gug'nyhug' mangad: lao"- seyo: gug'nyhug' yang bin" se' ra" gug'nyhug' mae" xau re magai: zo: ngad: ra". Ngadqere: ai: xau re gatau: khyo mae wa gai: ci: ra".
25 Asang re ngaui" byid' ra" ngaui" xeim: gug'nyhug' mae" xau re zo" ra" yaug khag' ngadqere: Mao"So: byu dayaug khyo" myid: jho: yu lo nae" mangad: ngad: ra".
26 Khai: mae na: ra" Israel byu qe ngad: re ngad- ngho' jham mangad: lao"- gug'nyhug' jham: nho: sa: re khonhae" re: zo:ve qhid' mae" magai: ci ngad: ra".
27 Ce: tarha" re lhoe" ra" yaug khag' ngadqere: Mao"So: byu dayaug khyo" myid: jho: yu lo nae" mangad: ngad: ra".
28 Asang wa Moshe re-
29 Israel byu qe: qhid' mae" o mae ta" to" ra" thung" li jham re byid' ra". Aijham wa zam" khug: ra" ngaui" xeim: qhaug' byid' ra" yaug khag' ngadqere: dabam re gakai: lai jhaung qhu" khyo" Asang re byid: ca" ra".
30 Aire yao" lo; yang yao: zo:ve ngaui" xeim: khyo" cili" ca" ra". Yao: wa ai: gug'nyhug' nho: xau re we' qao mhaung" re daga" cili" mung: gakai: lai mung: ra" jhaung qhu" khyo" Asang re qhaug' byid: nae" ngad: ra".
31 Khinjaung pho" wa ai: xau re phan dao mae phad' ngaui" nae" ngad: ra". Ngadqere: ai: qao mhaung" wa khinjaung pho" qhid' mae" ngad: ra".
32 Ai: gug'nyhug' nho: lo,yo shad' paung sin re wa-
33 Gakai: lai mung: ra" jhaung qhu" khyo" ai: zam" khug: ra" ngaui" xeim: mae" xau re we' sa: re ngaui" byid' ra" yaug khinjaung pho" re byid: nae" ngad: ra".
34 Asang wa ai: gug'nyhug' qao mhaung" re wa gakai: lai mung: ra" jhaung qhu" khyo"- lo,yo shad' paung sin re wa gakai: lai mung: ra" bao" thaug' byid' ra" khyo" Israel byu qemae" yu: to: mung: Khinjaung qere byid' to" ra". Ceru wa joe" lo nae" ra" ayo, alhab' mae Israel byu qe khinjaung qere byid: ca" ra" gu: ngad: ra".
35 Amung: Ceru wa Arun we' yao" yauggai zo: qe khinjaung qekhyo" kad' nae" qhid' mae" lo, kai: byid' ru qhug' ko" ra" ba na mae yao: bam re byid' to" ra" Asang re phad' ngaui" byid' ra" ngaui" xeim: mae" gae bam ngad: ra".
36 Ai: ba na mae Asang wa ce: ngaui" xeim: mae" ce: adau re khinjaung qere byid: genae" qhid' mae" Israel byu qere amyin" byid' to" ra". Ce: thung"li re Israel byu qe byu qae: khao: ngo" phug' cao" genae" ngad: ako".
37 Airumung: ai: thung"li jham wa phad' ngaui" byid' ra" ngaui" xeim: jham- cinman" ngaui" xeim: jham- qobo ngaui" xeim: jham- dam: khyug' byid' ra" ngaui" xeim:- lo, kai: ngaui" xeim: jham- zam" khug: ra" ngaui" xeim: jham: qhid' mae" thung"li jham ngad: ako".
38 Asang wa ai: amyin" dao: jham re din"pyad' yo mae" Sina bam dao mae Israel byu qere ngaui" xeim: kad' genae" qhid' mae" yao: ta" ra" ba na mae Moshe re byid' to" ra".