15
Masan Masin" Ra" Dae Bab: Qang: Jham
1-2 Asang wa Moshe we' Arun tao re- O mae tung" to" ra" thung" li jham re Israel
byu qe: qhid' mae" byid' ra". Yauggai dayaug wa
yao" zai mae" dae bab: qang: thug' au:- ai: dae bab: qang: wa masan masin" ngad: ra".
3 Ai: zai mae" dae bab: qang: mathang thug' na yang: ngad ngad thang: lo" byaug yang: ngad ngad ai: dae bab: qang: wa masan masin" ngad: ra".
4 Yao: zaung: ra" jo, qo- yab ra" jo, qo alhab' wa masan masin" ngad: ra".
5 Yao" yab qo re tin" ra" yaug khag' ngadqere:-
6 Mangad: lao"- aiyaug zaung va" ra" ja: pe" ja: mae zaung: ra" yaug khag' ngadqere: yao"
mai bau: jham re cid' pye' mung: gaung cid' pye'
ca" ra". Yao: wa myi" thao joe" sho' masan
masin" ngad: jo; ra".
7 Dae bab: qang: yug: ra" yaug re the' tin" ra" yaug khag' ngadqere: yao" mai bau: jham re cid' pye' mung: gaung cid' pye' ca" ra". Yao: wa myi" thao joe" sho' masan masin" ngad: jo; ra".
8 caung:pa" thung" khyo" san sin" ra" yaug dao mae ai: dae bab: qang: yug: ra" yaug: nho: khata: the' zao" yang: ngad re- aiyaug wa yao" mai bau jham re zab: pye' mung:- gaung cid' pye' ca" ra". Yao: wa myi" thao joe" sho' masan masin" ngad: jo; ra".
9 Dae bab: qang: yug: ra" yaug jui" ra" do: we' zaung jao: jham wa masan masin" ngad: ra".
10 Ai: yaug zaung: rumae the' tin" ra" yaug khag' ngadqere: myi" thao joe" sho' masan
masin" ngad: ra". Byu ai: yaug zaung: ra" ja:
pe" ja: re ngad ngad vo; ra" yaug khag' ngad
qere: yao" mai bau: jham re cid' pye' mung:-
gaung cid' pye' ca" ra". Yao: wa myi" thao joe"
sho' masan masin" ngad: jo; ra".
11 Dae bab: qang: yug: ra" byu dayaug wa yao" lo, re shi" sao qhid' macid' pye' lo: dayaug yaug re the' tin: yang: ngad: re- ai: yaug wa yao" mai bau: jham re cid' pye' mung:- gaung cid' pye' ca" ra". Yao: wa myi" thao joe" sho' masan masin" ngad: jo; ra".
12 Byu ai: yaug the' tin" ra" zhogam: ug' kholam: re ngadqere: be; kho' pye' ca" ra". Amung: yao: the' tin" ra" sag' khug' kholam: re ngadqere: cid' pye' ca" ra".
13 Byu ai: yaug wa yao" dae bab: qang: yug: ru gai: byaug thao re yao: wa nhad' ba lao" na ca" ra". Ai: thao re yao" mai bau: jham re cid' pye' mung:- qid thug' qid gyaung: mae gaung cid' pye' nae" ngad: ra". Ailao" yao: wa caung:pa" thung" khyo" san sin" yaug ngad: li" nae".
14 She' ba ein: ba mae yao: wa phaung" kyug' shid' dau:- mangad: lao"- jid: au shid' dau: re Asang: qhid' kheim: Zaung kham: dung: khyo cili" mung: aijham re khinjaung pho" re ab byid: nae" ngad: ra".
15 Khinjaung pho" wa aimae" dadau: re- qobo ngaui" xeim: khyo" ngaui" byid: mung:- gatau dadau: re wa phad' ngaui" byid' ra" ngaui" xeim: khyo" ngaui" byid: nae" ngad: ra". Ceru: kad' yang: yao: wa byu ai: yaug: qhid' mae" caung:pa" thung" khyo" kyang" san: pye' khyo re kad' byid: nae" ngad: ra".
16 Yauggai dayaug wa ashug' ma: sheim: ra" au:- yao: wa gaung geim" re gaung cid' pye' ca" ra"- amung: yao: wa myi" thao joe" sho' masan masin" ngad: jo; ra".
17 Ashug' gyo" zao" ra" mai bau:- mangad: lao" shoqid pe" ja: re ngadqere: cid' pye' ca" ra". Aiwa myi" thao joe" sho' masan masin" ngad: jo; ra".
18 Gaung sho: jho" zam" bin thao re yauggai we' myiqe: shid' yaug geim" gaung cid' pye' ca" ra". Yao: shid' yaug wa myi" thao joe" sho' masan masin" boe" jo; ra".
19 Myiqe: dayaug yaug wa mai ci: ra" ayo, ngad lao"- nhad' ba lam: lam: masan masin" ngad: jo; ra". Yao: re the' tin" ra" yaug khag' ngadqere: myi" thao joe" sho' masan masin" ngad: jo; ra".
20 Yao: mai ci: ra" ayo, gyo: mae yao: zaung: ra" ja: pe" re: yao: lang" jo; ra" ja: pe" ja: ngadqere: masan masin" ngad: ra".
21-23 Ai: myiqe: myhi" nho: yab jaung:- mangad: lao" yao: zaung va" ra" ja: pe" ja: mae ngad ngad- the' tin" ra" yaug khag' ngadqere: yao" mai bau: jham re cid' pye' mung:- gaung cid' pye' ca" ra". Yao: wa myi" thao joe" sho' masan masin" ngad: jo; ra".
24 Yauggai dayaug yaug wa mai ci: ra" ayo, gyo: mae ai: myiqe: we' gaung: sho: jho" zam" yang: ngad: re ai: myiqe: nho: masan masin" ruyang maca' majhad' boe" nhao mung: nhad' ba lam: lam: masan masin" ngad: jo; ra". Ai: yauggai lang" jo; ra" yab jaung: kholam: ngadqere: masan masin" ngad: ra".
25 Myiqe: dayaug yaug wa mai ci yo, mangad: lo: myo: sho' ba sheim: na: ngad: re- mangad: lao" yao" mai ci yo, tho' lai yang: sa: sheim: ngad: re- yao" mai ci: ra" ayo, gyo: mae we' dakhyo:- sa: xo' yang: sheim: na: ra" ayo, myhao" masan masin" ngad: jo; ra".
26 Ce: ayo, gyo: mae yao: lang" jo; ra" yab jaung: we' yao: zaung: ra" ja: pe" ja: ngadqere: masan masin" ngad: ra".
27 Aijham re the' tin" ra" yaug khag' ngadqere: masan masin" ngad: ra". Yao" mai bau: jham re cid' pye' mung:- gaung cid' pye' ca" ra". Yao: wa myi" thao joe" sho' masan masin" ngad: jo; ra".
28 Yao: sa: sheim: ru thang lo" byaug thao re- yao: wa nhad' ba lao" na ca" ra". Ai: thao re yao: wa caung:pa" thung" khyo" san sin" yaug ngad: li" nae".
29 She' ba ein: ba mae yao: wa phaung" kyug' shid' dau: mangad: lao"- jid: au shid' dau: re Asang: qhid' kheim: Zaung kham: dung: khyo khinjaung pho" jhao" ciye: nae" ngad: ra".
30 Khinjaung pho" wa aimae" dadau: re qobo ngaui" xeim: khyo" ngaui" byid: mung:- gatau dadau: re: wa phad' ngaui" byid' ra" ngaui" xeim: khyo" ngaui" byid: nae" ngad: ra". Ceru: kad' yang: yao: wa ai: myiqe: myhi" nho: kyang" san: pye' ra" khyo re caung:pa" thung" cere cao" yang: kad' nae" ngad: ra".
31 Asang wa Moshe re- yao: bam wa thang: na: ra" jo, qo agaung: mae jo; ra" yao" qhid' kheim: mae" jamu re maca' majhad' makad' pye' genae" qhid' mae" yao: bam: san sin" khyo we' sin: yang: Israel byu qere ta" peim: byid: nae" qhid' mae" ta" ra". Yao: bam maca' majhad' kad' ko" re wa se' pye' ru qhug' li" genae".
32 Ce: thung"li jham wa dae bab: qang: yug: ra" yauggai we' ashug' ma: ra" yauggai-
33 Mai ci: ra" myiqe: we' caung:pa" thung" khyo" masan masin" ra" myiqe: re gaung sho: zam" ra" yauggai we' sin" ra" thung"li jham ngad: ra".