14
Mao Gae: Gai Thao Re Kyang" San: Khyo Kad' Ru
1 Asang wa Moshe re-
2 Mao gae: gai: lo" yaug: nho: kyang" san: ra" khyo we' sin" ra" o mae ta" to" ra" thung"li jham re byid' ra". Yao: re san sin" ra" ga: ta" pyo: ke' qhug' ra" ba na mae- yao: re khinjaung pho" jhao" jhui: ye: nae" ngad: ako".
3 Khinjaung pho" wa jamu zaung taung gaung shad' khyo yao: re jhui" thug' ye: mung:- yao: re yeca: qu" nae" ngad: ra". Mao gae: gai: lo" yang: ngad: re-
4 Khinjaung pho" wa caung:pa" thung" khyo" san sin" ra" ngho' shid' dau: re shaug' sag'
pye: dadau we' daga"- taui: ane- Husub kyao
dakyao re cili" nae" qhid' mae" amyin" byid: nae" ngad: ra".
5 Ai: thao khinjaung pho" wa aimae" ngho' dadau: re qid thug' qid asag' bo: ra" zhogam:
khug' dao mae se' nae" qhid' mae" amyin" byid: nae" ngad: ra".
6 Yao: wa ngho' gatau dadau: re taung" yu mung:- aire ngho' se' ke' to" ra" sa: khug mae shaug' sag' pye: dau we' taui: ne we' Husub we' daga" deim" jam nae" ngad: ra".
7 Yao: wa sa: re mao gae: gai: lo" mung: kyang" san: ru kad' nae" yaug: dao mae nhad' lhang vhag' sheim: nae" ngad: ra". Ai: thao yao: wa aiyaug re san sin" ra" ga: ta" pyo: ke' nae" ngad: ra". Yao: wa ngho' adaui dau: re mug:gaung khyo tao" ke' nae" ngad: ra".
8 Byu aiyaug wa yao" mai bau: re cid' pye' mung: xae alhab' qaug: pye' yang: gaung cid' nae" ngad: ra". Ailao" yao: wa caung:pa" thung" khyo" san sin" yaug ngad: ava". Yao: wa thang: na: ra" jamu khyo gai: vao ye" ra". Ngadqere: yao: wa yao" zaung taung gaung shad' mae nhad' ba na: jo, ca" nae" ngad: ra".
9 Nhad' ba ein: ba mae yao: wa yao" au:- nhad' maui:- myo, mug' we' yao" gaung mae" dang: jo; ra" shomug' alhab' re dam: qaug: pye' nae" ngad: ra". Amung: yao: wa yao" mai bau: jham re cid' pye' mung: gaung cid' nae" ngad: ra". Airulao" yao: wa caung:pa" thung" khyo" san sin" yaug ngad: li" nae".
10 She' ba ein: ba mae- dazin byang" mung: pe" qo mabo: ra" yao lo: nau" shid' dau: we' yao mo" dadau: re we' zhanlun xau we' lhag' to" ra" cinman" phaui: shid' joe: ko- zhanlun xau daphag' re cili" nae" ngad: ra".
11 Khinjaung pho" wa aiyaug re we' ai: ngaui" xeim: jham re Asang qhid' kheim: Zaung kham: dung: khyo jhui" ye: nae" ngad: ra".
12 Ai: thao khinjaung pho" wa yao lo: dadau: re- xau daphag' re daga" za: dam: khyug' byid' ra" ngaui" xeim: khyo" ngaui" byid: nae" ngad: ra". Yao: wa khinjaung pho" qhid' mae" Asang re qhaug' byid' ra" gakai: lai jhaung qhu" khyo" aijham re qhaug' byid: nae" ngad: ra".
13 Yao: wa ai: yao nau" re qobo ngaui' xeim: jham we' phad' ngaui" byid' ra" ngaui" xeim: jham qhid' mae" gug'nyhug' jham re se' ra" jo, qo ngad: ra" gyang" lho" ra" jo, qo mae se' nae" ngad: ra". Yao: wa ceru: kad' ca" ra". Pe"mung:ga"re dam: khyug' byid' ra" ngaui" xeim: wa qobo ngaui" xeim: we' dakhyo:- khinjaung pho" qhid' mae" ngad: ru we' aiwa gyai gyang" lho" ru ngad yang: ngad: ra".
14 Khinjaung pho" wa ai: yao nau" sa: daqhae: re yu mung:- caung:pa" thung" khyo" san sin" ra" ga: ta" hau: qhug' ra" yaug: nho:- lo, yo shad' nobyin: mae- lo, yo shad' lo, mo" cae: mae- lo, yo shad' khyid mo" cae: mae gyad byid: nae" ngad: ra".
15 Khinjaung pho" wa zhanlun xau daqhae: re yu mung: yao" lo, kaung: shad' lo, vo: mae vhe' zaui: yu mung:-
16 Aimae yao" lo, yo lo, nyhug' thug' jam mung:- aimae" daqhae: re Asang: qhid' kheim: mae nhad' lhang vhag' sheim: nae" ngad: ra".
17 Yao: wa yao" lo, vo: khug mae bo: ra" xau daqhae: re we' yao nau" sa: daqhae: re yu mung:- caung:pa" thung" khyo" san sin" ra" ga: ta" hau: byid: qhug' ra" yaug: nho: lo, yo shad' nobyin: mae- lo, yo shad' lo, mo" cae: mae- lo, yo shad' khyid mo" cae: mae gyad byid: nae" ngad: ra".
18 Yao: wa yao" lo, vo: khug mae dang: jo; ra" xau re aiyaug: nho: au: mae gyad byid: nae" ngad: ra". Ceru: kad' yang: yao: wa caung:pa" thung" khyo" kyang" san: ra" khyo re kad' nae" ngad: ra".
19 Airumung:- khinjaung pho" wa qobo ngaui" xeim: re ngaui" byid: mung: caung:pa" thung" khyo" kyang" san: pye' ra" khyo re kad' nae" ngad: ra". Ai: thao re- yao: wa phad' ngaui" byid' ra" xeim: qhid' mae" gug'nyhug' re se' mung:-
20 Cin ngaui" xeim: we' daga" phan dao mae ngaui" byid: nae" ngad: ra". Ceru: kad' yang: khinjaung pho" wa caung:pa" thung" khyo" kyang" san: pye' ra" khyo re kad' nae" ngad mung:- aiyaug wa caung:pa" thung" khyo" san sin" yaug ngad: li" nae".
21 Byu aiyaug wa myaung sho: mung: gatau maqo" she lo:ngad: re wa- yao: wa yao" kyang" san: ra" khyo qhid' mae" dam: khyug' byid: ra" ngaui" xeim: we' khinjaung pho" qhid' mae" gakai: lai Asang re qhaug' byid' ra" khyo" yao lo: dadau: re za: cili" nae" ngad: ra". Yao: wa cin ngaui" xeim: qhid' mae" re: zhanlun xau we' lhag' to" ra" cinman" phaui: dakyin: je we' zhanlun xau daphag' re za: cili" nae" ngad: ra".
22 Yao: wa phaung" kyug' shid' dau:- mangad: lao"- jid: au shid' dau: rere: cili" nae" ngad mung:- qobo ngaui" xeim: qhid' mae" dadau:- phad' ngaui" byid' ra" ngaui" xeim: qhid' mae" dadau: re ngaui" byid: nae" ngad: ra".
23 Yao" nho: kyang" san: pye' ru kad' ra" she' ba ein: ba mae yao: wa aijham re Zaung kham: dung: khyo khinjaung pho" jhao" ciye: byid: nae" ngad: ra".
24 Khinjaung pho" wa yao lo: nau" re we' zhanlun xau re yu mung:- khinjaung pho" qhid' mae" Asang re qhaug' byid' ra" gakai: lai jhaung qhu" khyo" qhaug' byid: nae" ngad: ra".
25 Yao: wa ai: yao lo: nau" re se' mung: sa: daqhae: re yu: yang: aiyaug: nho: lo, yo shad' nobyin: mae- lo, yo shad' lo, mo" cae: mae- lo, yo shad' khyid mo" cae: mae gyad byid: nae" ngad: ra".
26 Khinjaung pho" wa xau daqhae: re yao" lo, kaung: lo, vo: khug mae vhe' zaui: yu mung:-
27 Yao" lo, yo lo, nyhug' yang daqhae: re Asang: qhid' kheim: mae nhad' lhang vhag' sheim: nae" ngad: ra".
28 Amung: yao: wa xau daqhae: rere: yu: yu mung: sa: gyad byid' ru we' dakhyo: yao:- byu aiyaug: nho: lo, yo shad' nobyin: mae- lo, yo shad' lo, mo" cae:- lo, yo shad' khyid mo" cae: mae gyad byid' ra".
29 Yao" lo, vo: mae dang: jo, ra" xau gu: re wa yao: wa aiyaug: nho: au: mae gyad byid: mung:- ceru: kad' yang: caung:pa" thung" khyo" kyang" san: pye' ra" khyo re kad' nae" ngad: ra".
30-31 Ailao" yao: wa phaung" kyug' dadau:- mangad: lao" jid: au dadau: re qobo ngaui" xeim: khyo" ngaui" byid: nae" ngad mung:- gatau dadau: re wa phad' ngaui" byid' ra" ngaui" xeim: khyo"- cin ngaui" xeim: we' daga" ngaui" byid: nae" ngad: ra". Ceru: kad' yang: khinjaung pho" wa caung:pa" thung" khyo" kyang" san: pye' ra" khyo re kad' nae" ngad: ra".
32 Ce: tarha" wa mao gae: de; ra" yaug khag' ngadqere: yao" kyang" san: pye' ra" khyo kad' nae" qhid' mae qo ca" ra" ngaui" xeim: jham re maqo" she: ra" mo, cao" nae" tarha" ngad: ra".
Yham Jham Mae" Bao" Jaung"
33 Asang wa Moshe we' Arun tao re-
34-35 Bao" jaung" to" ra" yham jham we' sin" ra" thung"li jham re byid' ra". (Ai: thung"li jham wa Israel byu qere yao: bam: mung: myid khyo" Asang: yang byid: nae" ngad: ra" Khanan mung"dan: khyo vao ye: gethao re cao" nae" qhid' mae" byid' ra" thung"li jham ngad: ra".) Byu dayaug yaug wa yao" yham mae Asang: yang bao" jaung" to" nhao va" rure ba: lao"- yao: wa aikhyo re khinjaung pho" jhao" yeta" kyo: nae" ngad: ra".
36 Khinjaung pho" wa ai: yham mae" bao" jaung" re yao: maye: ca: qu" shire- yham khug mae" zai ja: khao: ngo" re tai: thug' pye' nae" qhid' mae" amyin" byid: nae" ngad: ra". Airu: mangad: lao"- yham khug mae" zai ja: khao: ngo" re masan masin" ga: ta" pye' li" nae". Ai: thao lao" yao: wa ai: yham khyo ye: mung:-
37 Bao" jaung" re yeca: qu" nae" ngad: ra". Ai: bao" jaung" khu wa nyug mung:- mangad: lao" byao byao ne yang: khinqae re zo" vao lo" na: ru ngad: re-
38 Yao: wa ai: yham mae" thug' mung:- nhad' ba lam: lam: kham: pyid' to: nae" ngad: ra".
39 Nhad' ba ein: ba mae yao: wa dam: loca: qu" nae" ngad: ra". Ai: bao" jaung" wa byo; sin" jo; ngad: re-
40 Yao: wa bao" jaung" de; ra" laugbaui re yu: pye' mung: masan masin" ra" jo, qo vomo" taung gaung shad' khyo yeshapye' pye' nae" qhid' mae" amyin" byid: nae" ngad: ra".
41 Ai: thao re yao: wa akhug shad' khinqae re khyag' khyo" mung: aphaui: jham rere: masan masin" ra" jo, qo vomo" taung gaung shad' mae yebam: to: nae" ngad: ra".
42 Ailao" ai: yu: pye' ra" laug zang jo, qo mae gatau laug zang jham re dam: ke' mung:- khinqae re Bilad zhomyid asag' yang jhid' pye' nae" ngad: ra".
43 Bao" jaung" wa laugbaui jham re yu: pye' thao yham rere: khyag' pye' yang: nghoe' pye' thao re bao" jaung" dam: to" li" ngad: re-
44 Khinjaung pho" wa yequ" nae" ngad: ra". Ai: bao" jaung" wa je" do, lo" ngad: re- ai: yham wa masan masin" ngad: ra".
45 Ai: yham re phyo' pye' mung:- ainho: laugbaui jham- sag' vo: jham zham: ra" Bila zhomyid jham alhab' re masan masin" ra" jo, qo vomo" taung gaung shad' khyo tai: khyo" pye' ca" nae" ngad: ra".
46 Ai: yham re kham: pyid' to" ra" ayo, gyo: mae ai: yham khyo vao ye" ra" yaug khag' ngadqere: myi" thao joe" sho' masan masin" ngad: jo; li" nae".
47 Ai: yham mae lang" jo,- mangad: lao" zo: shaug' ra" yaug khag' ngadqere: yao" mai bau: jham re cid' pye' qo: ra".
48 Yham re dam: pho: zham: to: thao khinjaung pho" li" qu" ra" au:- bao" jaung" madam: to" laung: ngad: re wa yao: wa ai: yham re caung:pa" thung" khyo" san sin" ra" ga: ta" pyo: ke' nae" ngad: ra". Pe"mung:ga"re ai: bao" jaung" wa bin sho' baui" byaug va" rumung: ngad: ra".
49 Ai: yham re kyang" san: pye' nae" qhid' mae" yao: wa ngho' shid' dau: we' shaug' sag' pye: daqhae:- taui: ne dakhe'- husub kyao dakyao re yu: yu nae" ngad: ra".
50 Yao: wa ai: ngho' mae" dadau: re qid thug' qid ke' to" ra" zhokhug' dao mae se' nae" ngad: ra".
51 Ai: thao yao: wa qhoje; sag' pye:- husub taui: ne we' ngho' daui: re yu mung: ngho' sa: khug' mae deim" jam nae" ngad: ra". Amung: yao: wa ai: yham re nhad' lhang vhag' sheim: nae" ngad: ra".
52 Ceru: kad' yang: yao: wa ai: yham re- ngho' sa:- qid gyang"- ngho' adaui- shaug' sag' pye:- husub we' taui: ane jham: yang kyang" san: pye' nae" ngad: ra".
53 Ai: thao re yao: wa ngho' daui dau: re vomo" taung gaung shad' mug:gaung khyo dao" lo" nhao nae" ngad: ra". Ceru: kad' yang:- yao: wa ai: yham qhid' mae" caung:pa" thung" khyo"- kyang" san: pye' ra" khyo re kad' nae" ngad mung:- ai wa caung:pa" thung" khyo" san sin" ra" yham ngad: li" nae".
54 Ce: tarha" jham wa mao gae: aja: ja:-
55-56 Dae jad: jham- byang jham- mangad: lao"- laung: cu" jham we' mai bau: jham- mangad: lao" yham jham mae to" ra" bao" jaung" jham: khyo we' sin" ra" tarha" jham ngad: ra".
57 Ce: tarha" jham: yang san sin" ru we' masan sin" rure ta" phyid' nae" ngad: ra".