12
Zoshao Bin: Khau Thao Kyang" San: Khyo Kad' Ru
1 Asang wa Moshe re-
2 O mae ta" to" ra" thung"li jham re Israel byu qe: qhid' mae" byid' ra". Myiqe: wa yao: mai ci: ra" ayo, gyo: mae we' dakhyo:- yauggai zo: re khau thao nhad' ba lam: lam: caung:pa" thung" khyo" masan masin" ngad: ra".
3 She' ba ein: ba mae ai: zoshao re au: qid lhai: khyo kad' byid: nae" ngad: ra".
4 Yao" sa: sheim: pye' rumae" caung:pa" thung" khyo" san sin" ru maboe" shire sam xe: sam ba na: jo, nae" ngad: ra". Yao: wa yao" kyang" san: pye' ra" ayo, magan gan wa gyang" lho" ra" ja: pe" ja: rere: magai: tin:- mangad: lao" gyang" lho" ra" Zaung khug khyo magai: vao ye: nae" ngad: ra".
5 Myiqe: wa yao: mai ci: ra" ayo, gyo: mae we' dakhyo:- myiqe: zo: re khau thao daxe: byid ba lam: lam: caung:pa" thung" khyo" masan masin" ngad: ra". Yao: sa: sheim: pye' rumae" caung:pa" thung" khyo" san sin" ru maboe" shire khyaug' xe: khyaug' ba na: jo, nae" ngad: ra".
6 Yauggai zo:khau yang: ngad: re ngad- myiqe: zo:khau yang: ngad: re ngad yao" kyang" san: pye' ra" ayo, bin lao"- yao: wa phad' ngaui" byid' ra" ngaui" xeim: qhid' mae" dazin byang" va" ra" yao nau" dadau:- qobo ngaui" xeim: qhid' mae" jid: au dadau:- mangad: lao" phaung" kyug' dadau: re Asang qhid' kheim: Zaung khinjaung pho" jhao" ciye: nae" ngad: ra".
7 Khinjaung pho" wa myiqe: myhi" nho: ngaui" xeim: Asang re qhaug' byid: nae" ngad mung:- yao" masan masin" rure yu: pye' byid: nae" caung:pa" thung" we' sin" ra" agin akhyao kad' mung:- yao: wa caung:pa" thung" khyo" san sin" li" nae". Ceru wa myiqe: dayaug zo: bin: khau thao re kad' ca" ra" khyo ngad: ra".
8 Ai: myiqe: wa yao nau" magai: boe" ngad: re yao: wa phaung" kyug' shid' dau:- mangad: lao" jid: au shid' dau: re dadau: re wa phad' ngaui" byid' ra" xeim: qhid' mae"- gatau dadau: re wa qobo ngaui" xeim: qhid' mae" ciye: nae" ngad: ra". Aimung: khinjaung pho" wa ai: myiqe" nho: masan masin" rure yu: pye' nae" qhid' mae" caung:pa" thung" we' sin" ra" agin akhyao re kad' nae" ngad: ra"- ailao" yao: wa caung:pa" thung" khyo" san sin" li" nae"- ga: ta" ra".