11
Gai: Zo" Ra" Gug' Nyhug' Jham
(Mpm 14.3-21)
1 Asang wa Moshe we' Arun tao re-
2 Israel byu qe: qhid' mae" o mae ta" to" ra" thung"li jham re byid' ra".
3 Naonhaung" wa khyid sin: go; ra" gug'nyhug' we' zo dam: tug' vo" ra" taung gaung mae" gug'nyhug' pe" ja: rere: gai: zo" ako".
4-6 Ngadqere: naonhaung" wa gola:u- jalha:- thao lho- magai: zo: ngad: ako". Aijham re wa masan masin" ra" ja: khyo" myid: jho ca" ra"- yao: bam wa zo:ve dam: tug' vo: ge ngadqere: khyid sin: mago; ko" ngad: ra".
7 Vo, sho: dazo: ge,- aire masan masin" ra" ja: khyo" myid: jho ca" ra". Aiwa khyid sin: go, ngadqere: zo madam: tug' vo: ko" ngad: ra".
8 Ce: gug'nyhug' jham re dazo: ge,- mangad:lao" yao: bam: maogaung re lhao" re:- datin: ge,- aijham wa masan masin" ru ngad: ako".
9 Ngo: daung we' ngokye' de; ra" ja" ngo: pe" ja" ngo: rere: naonhaung" gai: zo" ako".
10 Ngadqere: qid khug mae daui: na: ra" gu: mae" daung we' ngokye' made; ra" ja: pe" ja: rere: magai: zo: ngad: ra".
11 Airu" ra" daui nam re wa masan masin" ra" ja: khyo" myid: jho: yu ca" ra". Naonhaung" wa aijham re dazo: ge,- mangad: lao" ai: ngo: shid jham re lhao" re:- datin: ge,.
12 Naonhaung" wa qid khug mae daui: na: ra" ja: mae" daung we' akye' made; ra" ja: re magai: zo: ngad: ako".
13-19 Naonhaung" wa o mae ta" to" ra" ngho' jham daja: rere: dazo: ge,- aijham wa zeim baung:- khaung: bab:- zeim kyao:- zeim kyao: myiku"- zeim kyao: ma"- vozoe- nangda- kano,-qo, gola:u- panglai: phaung" kyug'- qid ngho'-qid ngho'khyid qhang- vun pu ngho'- vogyao mangad: lao"- pho'qhid' jham ngad: ako". \p
20-21 Thug' byae: ra" ja: mae" je yang:- daung de; ra" bathaung bajin: alhab' wa masan masin" ru ngad: ako".
22 Naonhaung" wa khyag' phaung"- vin pang- jhin khyag' jham re gai: zo" ako".
23 Ngadqere: gatau daung de; ra" ngai: ra" ja: alhab' we' yoe" lhau: ra" ja: alhab' re wa masan masin" ra" ja: khyo" myid: jho: yu ca" ra".
24-28 O mae ta" to" ra" gug'nyhug' ashid gaung re tin" ra" yaug khag' ngadqere: yao: wa myi" thao joe" sho' masan masin" ngad: jo; li" nae". Khyid sin: mago; gug'nyhug' we' zo madam: tug' vo" ra" ja: alhab'- byid khyid de; mung: lo,vo" yang su" ra" gug'nyhug' alhab' ngad: ako". Yao: bam: shid mao re dao: pye' ra" yaug khag' ngadqere: yao" mai bau: jham re cid' pye' qo: ra". Ngadqere: yao: wa myi" thao joe" sho' masan masin" ngad: jo; li" nae".
29-30 Qug qhug' jham- qug phyu jham- qug no, jham we' zao gyaung jham re wa masan masin" ra" khyo" myid: jho: yu ca" ra".
31 Aijham re- mangad: lao"- aijham: nho: maogaung re the' tin" ra" yaug khag' ngadqere: myi" thao joe" sho' masan masin" ngad: jo; ra".
32 Amung: yao: bam: ashid gaung jham: yang daja: ja: mae gyo" zo" yang: ngad: re airu wa masan masin" ru boe" li" nae". Cejham wa sag' yang kad' to" ra" zai jham- mai bau: jham shoqid zai jham- jid:mo" pin: zai jham- ai: qhid' mae" ci: ra" zai jham pe" ja: ngad: re ngad ta" ru ngad: ra". Ai: zai re qid mae jam: to: nae" ngad: ra"- ngadqere: airu wa myi" thao joe" sho' masan masin" ngad: jo; ra".
33 Amung: yao: bam: shid mao jham zhogam: ug' dao mae gyo" zao" lo" yang: ngad: re ai: khug mae bo: ra" gu: ja: khao: ngo" wa masan masin" ru boe" li" nae" ngad: ra". Amung: naonhaung" wa ai: ug' re be; kho' pye' ca" ako".
34 Zo:ve ja: khao: ngo" re azhao we' dakhyo: gai: zo" ra". Ngadqere: airu" ra" ug' mae" qid vhe' sheim" zao" ra" zo:ve wa masan masin" ru boe" li" nae"- ai: ug' khug mae" shaug' ja: alhab' re: masan masin" ru ngad: ra".
35 Zhogam: myikhyeim" mangad: lao"- myikhung:- dao mae ashid gaung gyo" zao" ra" ja: pe" rere:- be; kho' pye' ca" ra".
36 Ai: ashid gaung re tin" ra" ja: gatau ja: khao: ngo" masan masin" ru ngad sho' ngadqere:- qid thug'- mangad: lao"- qid lhao: wa san sin" jo; ra".
37 Ai: ashid gaung daja: ja: wa qho: nae" kad' to" ra" qhovo: shi: dao mae gyo" zao: yang: ngad: re- ai: qhovo: shi: wa san: sin" jo; ra".
38 Ngadqere: ai: qhovo: shi: wa qid mae to" to: au: ashid gaung daja: ja: ai: khug khyo gyo" vao: lo" yang: ngad: re ai: qhovo: shi: wa masan masin" ngad: ra".
39 Zo: gai: ra" ja: gug'nyhug' daja: ja: shid: ngadqere: aire the' zao" ra" yaug khag' ngadqere:-myi" thao joe" sho' masan masin" ngad: jo; ra".
40 Amung: ai: gug'nyhug' mae" sho: daja: ja: re zo" ra" yaug wa yao" mai bau: jham re cid' pye' ca" ra"- ngadqere:- yao: wa myi" thao joe" sho' masan masin" ngad: jo; ashi"- amung: ai: ashid gaung re dao: pye' ra" yaug khag' ngadqere: yao" mai bau: jham re cid' pye' ca" ra". Ngadqere: yao: wa myi" thao joe" sho' masan masin" ngad: jo; shinae".
41 Naonhaung" wa myidgaung mae du" lhau: ra" gug'nyhug' angai ja: jham pe" rere: magai: zo: ngad: ako".
42 Yoe" lhau: ra" ja: ngad: re ngad- byid khyid: yang su" lhau: ra" ja: ngad: re ngad- khyid myo: sho' de; ra" ja: ngad: re ngad- aijham re magai: zo: ngad: ra".
43 Aijham re zo: ra" khyo" yang: naonhaung" yao" gaung re masan masin" daboe" nhao ge,.
44 Ngo wa naonhaung" Mao"So Asang ngad mung:- naonhaung" yao" gaung re gyang" lho" sho' kad' ca" ako". pe"mung:ga" re ngo wa gyang"lho" yaug ngad: ra".
45 Ngo wa naonhaung" Mao"So qo" boe" nae" qhid' mae"- naonhaung" re Egutu mung" mae" jhui" thug' lo: ra" yaug Mao"So Asang ngad: ra". Ngo wa gyang"lho" yaug ngad: ruyang naonhaung" gyang"lho" ca" ako".
46 Airumung: ceru wa gug'nyhug' jham we' ngho' jham- qid khug mae na ko" ra" ja: alhab' we' myidgaung mae du" lhau: ra" ja: alhab' we' sin" ra" tarha" ngad: ra".
47 Aimung: naonhaung" wa caung:pa" thung" we' sin: yang: masan masin" ra" ja: we' san sin" ra" ja: re nyang" za: ba: kho' yu mung:- zo: gai: ru we' mazo: gai: ra" gug'nyhug' jham rere: ba: kho' nae" qhid' mae" lha" na ge,.