14
Yodan Gyaung: Ba Vao Shad' Mae" Mug: Myid
1 Yodan gyaung: ba vao shad'- Khanan mung" re Israel byumyu" gyo: mae khoru: kho' jaung byid' ra" japhin: ngad: ra". Khinjaung Eleaza- Nun nho: yauggai zo: Yoshu we' Israel amyu" qenho: yham khaung au: jhaung qe wa ai: mug:myid re amyu" byu qe: gyo: mae kho' jaung: ako".
2 Asang: yang Moshe re amyin" byid' to" ru we' dakhyo:- Yodan gyaung: ba vao shad' mae" amyu" gug kaung we' dakaung nho: agaung: daqi" qenho: mug:myid: jham re wa pha" ce' khyo" yang: jho" kho' nae" myid: phyid' ako".
3-4 Moshe wa Yodan gyaung: ba thug' shad' mug:myid re gatau shid' kaung we' dakaung: nho: agaung: daqi" re kho' jaung byid: gau ngad: ra". (Yoseb nho: myid:zo: qe wa Manashe we' Ephrim ga: shid' kaung kho' pye' ako".) Ngadqere: Moshe wa Levi amyu" kaung qere mug:myid mabyid: ngad: ra". Ai: atha" yao: bam wa na nae" vogaung: we'- yao: bam: nung: kyaung"- yao kyaung" qhid' mae" pa:din" qo" khae: yu: ako".
5 Israel byu qe wa Asang: yang Moshe re amyin" byid' to" ru we' dakhyo: mug:myid re jho" kho' yu: ako".
Khaleb Re Hebron Mug: Byid' Ra" Khyo
6 Daba mae Yuda amyu" kaung mae" mo, wa Gilgala khyo Yoshu jhao" joe" li" ako". Yao: bam mae"- Kenizi kaung mae" Yephune nho: yauggai zo: Khaleb wa Yoshu re- Kade Barne mae nao we' nga" khyo we' sin: yang: Mao"So: byu Moshe re Asang pe" ta" ra" rure nao ba gau ngad: ra".
7 Ngo wa ce: mung" khyo jin" byu yequ" nae" qhid' mae" Kade Barne mae" Asang: daui daui yaug Moshe yang ngore nhao: ke' au:- apyad byid xe zin ngad va" ngo wa yao: re lau dao: dangman" jo: ra" khyo" lo kyo: byid: va".
8 Ngadqere: ngo we' daga" cao" ra" mo, wa amyu" byu qere gyaug nhao: ako". Ngadqere: ngo wa nga" Mao"So Asang re jhaug' zaug za: phug' cao" va".
9 Ngo airu kad' ra" mathao mae ngo we' nga" zo: dau qe wa ngonhaung" nho: jo,nho" khyo"- ngo su" lai: lo" ra" mug:myid re gaigai: yao: qo" khai: yu nae" ga: Moshe wa ngore dao:so: byid' ra".
10 Ngadqere: ana" qu" wa,- Asang Moshe re ta" rumae" byid xe: ngo" zin ngad: byaug va". Israel byu qe din"pyad' yo mae lai: phyid' lo: au: Asang yao: dao:so: byid' ru we' dakhyo: ngore ana" ba joe" yao: kao so' daui nhao: ra". Ngo re qu" la,- ngo wa she' xe: ngo" zin ngad va".
11 Ngo wa Moshe ngore nhao: ke' au: we' dakhyo: ana" ba re: ngo wa qam: bo kung: jo, shi"- ngo wa gyekhe' poe qhid' mae" re: gatau pe" ja" qhid' mae" re: qam: bo: jo; shi".
12 Ana" ngo we' nga" byu qe lau thoe lokyo: byid' ra" ba na mae Asang: yang ngore dao:so: byid' ra" ai: bam mug: ngore byid: la,- Anag ga: mhang" ra" gaung qi" ra" byu damyu" wa aimae vang qi: jham: yang zao: to" ra" vogaung: mae na ko" ra" khyo nao re ngonhaung" ta" kyo: va". Asang wa ngo we' daga" na mung:- Asang ta" to" ru we' dakhyo:- ngo wa yao: bam re khe' thug' pye' nae"- ga: ta" ra".
13 Yoshu wa Yephune nho: yauggai zo: Khaleb re shaman" byid: mung: yao" jo,nho" khyo"- yao: re Hebron vogaung: byid' ra".
14 Hebron wa Kenizi kaung mae" Yephune nho: yauggai zo: Khaleb nho: myid:zo: qe sang: ci ashiko". Pe"mung:ga"re yao: wa Israel nho: Mao"So Asang re jhaug' zaug taung" mho dao: gyo: yaug: ngad: ra".
15 Qhid' phyao:- Hebron re Arba vogaung: ga: mhang" ako". (Arba wa Anakim myid:zo: qemae" qi" thao" yaug ngad: ra".) Ana" mung"dan: mae ngaui pyo: yaug yo: jo; ra".