13
Sang: Yu Ca" Shi" Mug: Myid
1 Ana"- Yoshu wa gyai mao" ava". Asang wa yao: re nao wa gyai mao: ava". Ngadqere: sang: yu ca" shi" ra" mug:myid myo: sho' jo, ashi".
2 Philisti mug:myid alhab' we' Geshu mug:-
3 Mug: thao shad' Avim mug:myid alhab'- (Egutu mug: kyo: Shiho gyaung: zo: mae" Khanan mung" mae bo: ga: myid: to: ko" ra" mug: am: shad' Ekron joe" sho'- Gaza- Ashdod- Ashkelon- Gat- Ekron mae na ko" ra" Philisti kho:kham qe bobo: ako".)
4 Khanan byu qe: mung" alhab' we' Meara (Aiwa Sidon byu qe sang: ru ngad: ra") Amori mug: kyo: mae" Apheg joe" sho'.
5 Gebalid byu qenho: mug:myid ngad: ra"- ba thug' shad' mae jo; ra" Lebanon mug:myid alhab'- Hermon bam nho: mug: thao shad' mae jo; ra" Balgad mae" Hamad bam gyo: joe" sho' ngad: ashi".
6 Ceru wa Lebanon bam jham we' Misrephod Maim agyo: mae" bam mug: mae na ko" ra" Sidon byu qenho: mug:myid alhab' bobo: ra". Israel byu qe qhid' khyo jhin" ye" lo" au:- ai: byumyu" alhab' re ngo khe' thug' pye' nae". Nao kad' nae" qhid" mae" ngo amyin" byid' to" ru we' dakhyo:- ai: mug:myid re Israel byu qe: gyo: mae nao kho' byid: ca" ra".
7 Ana"- yao: bam: jo,nho" khyo" yao: bam qo" sang genae" qhid' mae" ce: mug:myid re gatau amyu" gug kaung we' Manashe amyu" agaung: daqi" re kho' byid: wa,- ga: ta" ra".
Yodan Gyaung: Ba Thug' Shad' Mug:
8 Rubin- Gad we' Manashe amyu" agaung daqi" gu: wa Asang: daui daui yaug Moshe yang byid: to: va" ruyang : mug:myid qo" gau ngad avako". Aiwa Yodan gyaung: ba thug' shad' mae ngad: ra".
9 Yao: bam: mug:myid wa Aroe (Arnon lao: khaung: thao) we' ai: lao:khaung: agaung: mae jo; ra" vogaung: joe" sho' we'- bug gaung jao: dae alhab' bobo yang Medeba mae" Dibon joe" sho' lu: ra".
10 Aiwa Ammonid mug: kyo: joe" sho' we' Heshbon mae eib: lo: ra" Amori kho:kham Sihon yang eib: qu" ra" vogaung: jham alhab' bobo yang: ngad: ra".
11 Aiwa Gilead- Geshu we' Makha mung"- Hermon bam alhab' Saleka joe" sho' Bashan mung" alhab'- joe" sho' ngad: ra".
12 Ashterod we' Edri re eib: lai: lo: ra" Rephaim amyu" lo" thao" yaug ngad: ra" Oga nho: mung"dan: bobo: ra". Moshe wa aibam re khe' aung: mung: khe' thug' pye' ra".
13 Ngadqere: Israel byu qe wa Geshu we' Makha byu qere makhe' thug' pye' ngad: ako". Yao: bam Israel mung" mae na: jo; ashiko".
14 Moshe wa Levi amyu" qere mug:myid mabyid: ngad: ra". Asang: yang Moshe re ta" ru we' dakhyo:- yao: bam: jo,nho" khyo"- Israel nho: Mao"So Asang re phan dao mae phad' ngaui" byid' ra" ngaui" xeim jham mae" gae bam re yao: bam qo" yu nae" ngad: ako".
Rubin Amyu" Re Jaung byid' Ra" mug: Myid
15 Yao: bam: jo,nho" khyo" sang: yu nae qhid' mae" mung"dan: dadau re Rubin nho: yham khaung qere Moshe byid' to" ra".
16 Yao: bam: mug:myid wa Aroe (Arnon lao: khaung: thao mae jo; ra") mae" ai: lao: khaung: agaung: mae jo; ra" vogaung: we' Medeba lhang" gam: bug gaung jao: dae alhab' joe" sho'-
17 Heshbon we' bug dam: jao: dae mae jo; ko" ra" Dibon- Bamod Bala- Bed- Bal Meon-
18 Yaha- Kedemod- Mephad
19 Kiriathaim- Sibma- lao:khaung: mae" bug gung mae jo; ra" Zeret Shaha-
20 Bethpeora- Pisga kha" gyo" we' Bed Yeshimod jham bobo: ra".
21 Aiwa bug gaung jao: dae mae jo; ra" vogaung: alhab' we' Heshbon mae eib: lai: lo: ra" Amori kho:kham Sihon nho: mung"dan: geim" bobo: ra". Moshe wa yao: re aung: pye' mung: Midian zug: qe ngad ko" ra" Evi- Rekem- Zura- Hu we' Reba bam rere: aung: pye' ra". Yao: bam alhab' mo, wa ai: mug:myid re Sihon kho:kham nho: qhid' mae" eib: lai: lo: ako".
22 Israel byu qeyang se' pye' ra" mo, mae bedin: qu" yaug Beo nho: yauggai zo: Balam re: bobo: ra".
23 Yodan gyaung: wa Rubin amyu" qenho: ba vao shad' ngad: ra". Aijham wa yao: bam: jo,nho" khyo" Rubin amyu" nho: yham khaung qere byid' ra" vomo" we' vogaung: jham ngad: ako".
Gad Amyu" Re Jaung byid' Ra" Mug: Myid
24 Yao: bam: jo,nho" khyo"- mung"dan: dadau rere: Gad amyu" nho: yham khaung qere: Moshe kho' byid' ra".
25 Yao: bam: mug:myid wa- Yaze we' Gilead vogaung: jham alhab'- Ammonid mung" agaung: daqi" mug:- Raba ba thug' shad' Aroe joe" sho'-
26 Heshbon mae" Ramad Mizpa we' Betonim joe" sho'- Mahanaim mae" Lodeba mug: kyo: joe" sho' ngad: ra".
27 Yodan lao:khaung: mae wa Bed Haram- Bethnimra- Sukhod- Zaphon we' Heshbon kho:kham Sihon nho: mung"dan: dang: ra" gu: jham ngad: ako". Yao: bam: ba vao shad' mug: kyo: wa Yodan gyaung:- mug: am: shad' khyo Galile tham: joe" sho' ngad: ra".
28 Aijham wa yao: bam: jo,nho" khyo" Gad amyu" yham khaung qere byid' ra" vomo" jham we' vogaung: jham ngad: ako".
Ba Thug' Shad' Manashe Amyu" Re Jaung byid' Mug: Myid
29 Yao: bam: jo,nho" khyo"- mung"dan: dadau re Manashe amyu" agaung: daqi" mae" yham khaung qere Moshe kho' byid' ra".
30 Yao: bam: mug:myid wa- Mahanaim mae" Bashan mung" ngad: ra"- Bashan kho:kham Oga nho: mung"dan: geim"- Bashan mae jo; ra" Yaira vogaung: ngai khyaug' xe alhab' re:-
31 Gilead mug: agaung: daqi"- Bashan mung" mae" Oga nho: mung"dan: mae vomo" ngad ko" ra" Ashtarod we' Edri vomo" shid' lam: re:- bobo: ako". Ce alhab' wa Makhira nho: yauggai zo: Manashe mae" na: gyo" li" ko" ra" yham khaung agaung: daqi" re kho' byid' ra" gu: ngad: ra".
32 Aiwa Moba pa:din" mae yao: na: jo, au: Yerikho ba thug' shad' we' Yodan mug:myid re Moshe khoru: kho' byid' ra" khyo ngad: ra".
33 Ngadqere: Moshe wa Levi amyu" qere mug:myid dacug' re: makho' jaung byid: ngad: ra". Moshe wa yao: bam re- yao: bam: jo,nho" wa Israel nho: Mao"So Asang re qhaug' byid' ra" ngaui" xeim: jham mae" gae bam khae: yu genae" qhid' mae" ta" ra".