9
1 Nga" nho: au: lam: wa qid thaung: ngad: qa: we"-
aimung: nga" nho: myo, jid' wa ngug byid qid thug' ngad: qa: we"-
ailao" ngo wa- se' pye' qhug' ra" nga" byumyu" qe: qhid' mae" myi" re: na" re: qo" ngug nae" ngad: ra".
2 Nga" byumyu" qemae" qo" phao: na: qin" nae" din"pyad' yo dajo, qo qo" qa: we".
Yao: bam alhab' mo, wa jhaug' mazaug: ra" mo, phaug' lhag' lo" ra" byu phaung ngad: ako".
3 Yao: bam wa mhug' ta" nae" qhid' mae" khonhae" re jin" jin" ngad: ako".
Madangman" ru wa dangman" ru: atha" ai: mug: re eib: ra".
Asang wa- nga" byumyu" qe wa- makhyang" mashab: ru daja: bin daja: kad' ako".
Aimung ngore yao: bam: Mao"So khyo" masun: ngad: ako"- ga: ta" ra".
4 Yaug khao: ngo" wa yao" ba nam re nyang" lhaug' qu" na ca" ra".
Khag' re: yao" mao:nhaung: re magai: lam ngad: ra".
Pe"mung:ga"re- mao:nhaung: yaug khao: ngo" wa Yaku we' dakhyo: pyag' vhan" ako".
Aimung: yaug khao: ngo" wa- yao" ba nam qere mha: zo" ako".
5-6 Yao: bam alhab' mo, wa yao: bam: ba nam qere khyonghung: jhui" nghung: mung:- khag' re: dangman" ru dao: majhau ngad: ako".
Yao: bam wa- yao: bam: sho jham re- mhug' ta" mho" to" avako".
Aimung: qobo shad' rure to" pye' genae" mangad:- yao: bam wa aqan alan mau" daja: bin daja: kad' thug' na: ako".
Aimung: mhug' pyag' ru dalam: thao dalam: kad' ako".
Asang wa- ai: byumyu" qe yao: re ngag: lhaui" pye' avako"- ga: ta" ra".
7 Ce: mathao mae- qam: so' qi" ra" Asang ta" ra"- ngo wa nga" byumyu" qere to' re we' dakhyo: kyang" shao nae".
Aimung: yao: bam re ca: jham" qu" nae".
Nga" byumyu" wa- makhyang: mashab: ru kad' va".
Ngo wa yao: bam re gatau khoru: qo" kad' shi: nae" i?
8 Yao: bam nho: sho jham wa shid nhao ba: ra" myo: khe' jham we' dau: ako".
Aijham wa khonhae" re mhug' ta" na: ako".
Yaug khao: ngo" wa yao" yham kyo: re jhid'de; zam" khug: nau" nhae" dao: jham jhau: ako".
Ngadqere: gaigai: ga" re yao: bam qhid' mae" lha" thaung: to" ako".
9 Ngo wa yao: bam re cegu" mathao mae qobo dae mabyid: nae" ga" i?
Ngo wa ceru" ra" byumyu" re lage, maphaug' nae" ga" i?
Ngo Asang ta" to: va"- ga: ta" ra".
10 Ngo wa- bam jham: qhid' mae" kaug' nae". Mhin: gyoe, jham: qhid' mae" ngug nae".
Pe"mung:ga"re ai: jham wa kyaug' byaug mung:- aijham: dao: khyo" gyaung: khag' masu" lai ngad: ako".
Cad' kyaung" nung: kyaung" thoe mathe' gyo: lo: ngho' jham we' seyo: gug'nyhug' lae: jham alhab' phao: byaug: mung: mana lo: ko" ngad: ra".
11 Asang wa- ngo wa Yerusalem re byo; qeim: bam: jo, sho' kad' pye' nae".
Zagne jham na: ra" jo, qo kad' pye' nae".
Yuda vomo" jham wa khag' mana: ra" jo, qo- din"pyad' yo boe" shao" genae"- ga: ta" ra".
12 Ngo wa Asang re myid' gyo" qu" va". Ai: mug: myid wa pe"mung: byu malai: ra" din"pyad' yo we' dakhyo: cae: jhug tag boe" byaug: laug i? Ceru re qo" ba: gyo: sho' khag' pha,jhi" bo: laug i? Su gayaug re dam: qo" kai" xo' ta" nae" qhid' mae" khag' re nao ta" kyo" qu" i? ein: myid' gyo: va".
13 Asang wa nga" byumyu" qe wa yao: bam re ngo byid' to" ra" mho" shid' dao: jham re shapye' to: gemung: ceru: boe" lo: ru ngad: ra". Yao: bam wa- ngore maphug' cao" yao: bam re ngo ta" to" rure: makad' ngad: ako".
14 Ai: atha" yao: bam wa- sang: dang mung: yao: bam: phug' pho" qeyang kad' nhao: to: co' ko" ru we' dakhyo: Bala solho jham re- caung:pa" ako".
15 Aimung:- qam: so' qi" thao" ra" Asang Israel nho: Mao"So ngo kad' ke' nae" rure tae" gyo: ge,. Ngo wa nga" byumyu" qere kho" ra" qhovo: gae byid: zho: mung: khincid' myino; byid: jhaug' nae".
16 Ngo wa- yao: bam re- yao: bam re: magyo" qu" yao: bam: phug' pho" qere: magyo" qu" ra" byumyu" mung"dan: phaung khyo khe' sin" ke' mung: yao: bam re qo" phyo' qheim" dam" pye' sho' khe' zin: nae" gyetab jham re nhao: ke' byid: nae"- ga: phaug' ta" ra".
Yerusalem Vobyu Qe Bao" Yu Nae" Mho' Ko" Ru
17 Qam: so' bo: thao" Asang ta" ra".
Pe"mung: na: rure myid: qu" ge, sushid ngugji: yao" na: ra" myiqe: qe: nho: qhid' mae" kaug' ngug nae" byu qere khai: ke' ge,- ga: ta" ra".
18 Mung" byu qe wa-
yao: bam re phyad phyad li" mung: ngonhaung" nho: myo,jid' jham ngug byid byang" byaug mung:
ngonhaung" nho: myo, qid jham ngug yang: jhug' byaug sho' ngonhaung" qhid' mae" sushid poe ngug ji: yao" nhao byid: la, ga: ta" ako".
19 Ziun mae ngug: hug' na: ra" thoe re gyo: ge, ngonhaung" wa byo; qeim: shao" va".
Ngonhaung" wa bin sho' nga: yeim: bam va".
Ngonhaung" wa ngonhaung" nho: mug: myid re-
ngonhaung" nho: yham jham phyo' pye' qhug' va"- ga: ta" na: ako".
20 Ngo wa- myiqe: naonhaung" we" Asang re tae" gyo: ge,-
aimung: yao" myiqe: zo: qere khoru: kaug' ngug nae" mho" byid: ge,-
aimung: naonhaung" ba nam qere sushid ngugji: khoru: yao" khoru: caung: nae" mho" byid: ge,.
21 Shid: ru wa- ngonhaung" nho: bao: zo: kham: jham khyo" vao lo mung: ngonhaung" nho: kho:kham yham jham khyo vao lo va".
Aiwa hau" mo" khyo jham mae na: ra" zoshao qere qam" khyo" pye' mung: gai jao: jham mae na: ra" zolau: qere se' pye' ra".
22 Sushid maogaung jham wa- yo jham mae" myid xau we' dakhyo: gaug yad mo, thao mae yad: bam: to: mung:
khag' yang magaug: zhang: ra" gaug zo jham we' dakhyo: khyi" khao: ngo" mae jo; sin" bam: ako".
Ceru wa- ngore Asang: yang ta" nhao: ru ngad: ra" ein: ta" va".
23 Asang ta" ru wa-
pha,jhi" bo mo wa yao: bam: pha,jhi" qhid' mae" magai: phug-
qam: bo mo, re: yao: bam: qam: mae magai: phug: ta" jo,nho" qo" mo, re: yao: bam: jo,nho" mathao mae magai: phug-
24 Byu dayaug yaug phug nug: ngad: re- yao: wa ngore ba mung: ngore ba: gyo" ruyang gai: phug: ra".
Pe"mung:ga"re- nga" nho: jhid'de; myid wa mabaui mabyo, gang" tang: ra".
Aimung: ngo wa tarha" din:man" ru we' jo: rure kad' ra".
Aigu: wa ngore ngaui nhao: ra" gu: ngad: ra".
Ngo Asang ta" to: va"- ga: ta" ra".
25-26 Asang ta" ru wa- xae lang" phyid' ra" Egutu byu qe- Yuda byu qe- Edom byu qe- Amon byu qe- Moba byu qe we' din"pyad' yo mae" byu qere ngo qobo dae byid: nae" ayo, joe" li" na va". Ce: byu qe alhab' mo, wa au: qid lhai: khyo kham: yu mo, ngad ako",. Ngadqere: airu: aso: qhu" ra" dao: thang" re macao" ngad: ako". Ce: byumyu" qe mae" dayaug re:- aimung: Israel byumyu" mae" dayaug re:- nga" dao: thang" re macao" ngad: ako"- ga: ta" ra".