10
Sulho No' Ru We' Dang Man" Ra" Caung:pa" Khyo
1 Israel byumyu" qe we"- naonhaung" qhid' mae" Asang: mungdao: re tae" gyo: ge,-
2 Yao: wa-
gatau: byumyu" qenho: khyo mae dacao" ye: ge,.
gatau: byumyu" qe gyaug: din gengadqere: mamyao: qu" ra" mug:gaung dao mae" myao jao: jham: mathao mae myid dashug ge,.
3 Ce: byumyu" qe: nho: lalam lakhug wa pe" akyu" mabo ngad: ra".
Seyo mae sag' gae dagae re thau: khyang: ke' va".
Aire sag' lag sama lo; yang co' kyaung" to" ra".
4 Aimung: ngaui we' qhang: yang dam: thab' shaung: pye' ako".
Aire magyang: lang" lo" nae" qhid' mae" tin" zi: yang be, jin" to" ako".
5 Ai: solho jham wa lashau: yo mae" jo kyaug' jham we' dau: ako".
Aijham wa maqo" jhau ngad: ako". Yao: bam maqo" su: gemung: yao: bam re vo; qin" ca" ako".
Aijham re dagyaug ge, yao: bam wa naonhaung" re pe" dae maqo" te' ngad: ako".
Aimung: yao: bam wa naonhaung" re gai: rure: maqo" kad' byid ngad: ako".
6 Asang we"- nao we' dau: ru khag' mana ngad: ra".
Nao wa qam: so' qi" ra" aimung: ni" mang wa qi" qhang mung: kheim: so' thin: ra".
7 Byumyu" alhab' nho: kho:kham nao re nga: mayhe' nae" khag' na: i?
Nao wa phug' myao: mung: nga: yhe' byid: nae" man: qi" ra".
Byumyu" qenho: pha,jhi" bo mo, khug mae ngad ngad yao: bam: kho:kham khoyaug mae" ngad ngad nao we' dau ru khag' mana ngad: ako".
8 Yao: bam alhab' mo, wa nhag' magyang: mung: adu: adae: ngad: ako".
Sag' solho jham mae" yao: bam pe" qo" mho" yu genae" i?
9 Yao: bam: solho jham wa Spain mae" ngaui: yang thab' pye' mung: Upha mae" qhang: yang: sheim" pye' ra".
Lo,mau" ba mo; mau" zo" za: ngad: ra".
Aijham wa- jhao: ra" qo,gin: qo, mo, qo; to" ra" khalhae: nyhug we' mai: mai: mung: ra" pin: cug' jham: yang vhe' to" ako".
10 Ngadqere: Mao"So we"- nao wa dangman" ra" Mao"So agyang" ngad: ra".
Nao wa kao so' daui: ra" Mao"So ngad mung: apyad ato mae" kho:kham ngad: ra".
Nao nhag' yo: lao" mug: myid nin" ra".
Byumyu" qe wa- ni" nho: nhag' yo: re matho' zang" kham ngad: ako".
11 (Mung" byu naonhaung" khyo" yang myid gaung we' mug:gaung re makad' to" ra" so jham re phyo' qheim" pye' nae" ein: yao: bam re ta" kyo: ca" ako". Aijham wa myid gaung dao khai: mae re: majo, lo: genae".)
Mao"So Re Caung:khin" Ra" nghaui" caung: Dalam:
12 Asang wa myid gaung re yao" qam: so' yang kad' to" ra".
Yao" nho: pha,jhi" yang mung"dan: mug: myid re phan" to: mung: mug:gaung re myhung" to" ra".
13 Yao: amyin" byid' ke' lao" mug:gaung tho' mae" qid myang: li" ra".
Yao: wa jham thaui: jham re myid gaung thao" mae" khai: yu: ra".
Yao: wa lhe' cad' re mug: qu khug mae cad' ke' nhao: ra".
Aimung: la hug' re zai to: kug qe, mae" nhao: thug' ke' ra".
14 Cere the' myao gelao"- byu qe wa nhag' cad' noyaug mung: lo" ako".
Solho jham re kad' to: mo, wa myid myo: byaug: ako".
Pe"mung:ga"re- yao: bam kad' to" ra" so jham wa apyag' ngad mung: kao so' mabo ngad: ako".
15 Aijham wa pe" aphug' made, mung: ca' nghang" pye' ca" ra".
Yao: bam re Asang: yang dao: phyid' nae" ga: li" ra" au: phyo' qheim" pye' ru qhug' genae".
16 Yaku nho: Mao"So kam" wa aijham we' madau ngad: ra".
Yao: wa ja: khao: ngo" re kad' to: yaug ngad: ra".
Aimung: yao: wa- Israel byumyu" re yao" qhid' mae" khyin: yu: to" ava".
Qam: so' qi" thao" Asang ga: ru wa yao" mang ngad: ra".
Joe" Li" Na: Va" Pyaung" Nha: To: Qhug' Nae" Ru
17 Yerusalem vobyu qe we"- naonhaung" wa khe' lhaung" to: qhug' ako". Naonhaung" nho: jo,nho" zai jham re gaug: zhang ge,.
18 Asang wa naonhaung" re ce: mug: myid mae" khe' thug' ke' naeva". Yao: wa naonhaung" re- dayaug re: madang losho' khyoe' se' pye' naeva" myao: Asang ta" to" ava".
19 Yerusalem mae" vobyu qe hug' yao: ako".
Ngonhaung" wa gyai yao: dae no: bam vanhaung.
Ngonhaung" nho: dae jham wa magai: byaug lo nae".
Aimung: ngonhaung" wa ceru re qo" zang" kham nae" ein: lhaung" jho:-
20 Ngonhaung" nho: zaung jham wa phyo' pye' qhug' va".
Aijham re myag: to" ra" taui: jham wa byid: shao" byaug va".
Ngonhaung" nho: zoshao qe alhab' mo, wa phao: shao" byaug: avako".
Naonhaung" nho: zaung khyae: jham re dam: tau: zhaug' nae" khag' mana lo:-
aijham: nho: pin: lung: jham re gaug: lhao: byid: nae" khag' mana lo:- ga: ta" ra".
21 Ngo wa- ngonhaung" nho: au: jhaung qe nhag' magyang" ngad: ako".
Yao: bam wa Asang re bao" yu nae" mamho' ngad: ako".
Cemung: yang yao: bam maaung doe, mung: ngonhaung" nho: byumyu" qe byo: sin" lo" avako".
22 Tae" gyo: ge,- lau dao: joe" lo va"- mug: am: shad' mae" byumyu" damyu" mae lhau: zhung: mung: yhau: na: ako".
Ai: byumyu" nho: gyetab jham wa Yuda vomo" jham re-
zagne jham na: ra" din"pyad' yo boe" nhao: pye' li" genae" ein: phaug' tau: va".
23 Asang we"- khag' re: yao: yao" au: pa lo, kyo' re maqo" sang: ru ngo ba: ra".
Khag' re: yao: yao" kao so' re maqo" eib: ru ngo ba: ra".
24 Asang we"- ni" nho: byumyu" qere mho, jhao" yu wa, ngadqere:-
ngonhaung" dao mae dae xo sho' dakad' nao nhag' yo" au: re ngonhaung" re qobo dae dabyid: la, ai wa ngonhaung" na: thao" ru ngad: li" nae".
25 Nao re macaung:pa" ko" ra" byumyu" qejhao" ni" nhag' yo" rure lhang: phaug' ke' wa, aimung: nao re ngag: ha: lhaui" pye' ra" byumyu" qejhao" lhang: phaug' ke' wa,-
Yao: bam wa ni" nho: byumyu" re se' pye' ako".
Yao: bam wa- ngonhaung" re bin: sho' phyo' qheim" pye' mung: ngonhaung" nho: mung"dan: re byo; qeim: jo, nhao: to: co' ako".