37
Zedekia Yang Yeremia Re Mho' Ra" Khyo
1 Babelon kho:kham Nebugkhaneza wa Yuda kho:kham Yoshia nho: yauggai zo: Zedekia re Yehoiakim nho: yauggai zo: Yehoiakhin nho: khu mae Yuda kho:kham kad' nhao: ra".
2 Ngadqere: Zedekia re:- yao" gyezug: qere:- mung" byu qere: Asang: yang ngore byid' ra" mungdao: re magyo: ngad: ako".
3 Kho:kham Zedekia wa Shelemia nho: yauggai zo: Yehukha we' Maseia nho: yauggai zo: khinjaung Zephani re nhao: ke' mung: ngonhaung" nho: byumyu" gaung tha" ngonhaung" nho: Mao"So Asang re akyu" mho' nae" qhid' mae" ngore ta" ke' ra".
4 Ngo wa thaung: mae lhaung" to" ru maqhug' shi: mung: mo,byu qe: phaung mae galin: gago: qo" du" lhau shi" ra" ayo, ngad:-
5 Babelon gyetab wa Yerusalem re vang" ci: ako". Ngadqere: Egutu gyetab wa Egutu mug: kyo: re lai: phyid' li" ko" ra" ga" thoe re the' gyo: gelao"- yao: bam dam: zad' phao: lo" ako".
6 Ailao" Israel nho: Mao"So Asang wa Zedekia re- ceru: ta" nae" qhid' mae" ngore- ta" ra". Ai wa-
7 Egutu gyetab wa nao re bao" thaug' byid: nae" khyo mae ngad: ako". Ngadqere: yham khyo dam: tug' lo" li" nae".
8 Ailao" Babelon byu qe wa dam: joe" li" mung: vogaung: re gyekhe' mung: aire sang: yu mung: ngha" pye' ako".
9 Nao yao" gaung re Babelon byu qe wa madam: joe" li" nae" ga: myid: jho: yu yang: mhug' pyag' ru maqhug' nae" qhid' mae" Asang ngo ta" peim: byid: va". Pe"mung:ga"re yao: bam joe" li" genae" ngad: ra".
10 Nao wa Babelon gyetab geim" re khe' aung: pye' mung: yao: bam: zaung khug mae lang" jo, yang: dae de' ra" mo, za: dang losho' ngadqere: ai: byu qe wa to" li" mung: ce: vogaung: re myid gaung khyo qo" ngha" pye' shigenae" ngad: ra" ga" ngad: ra".
Yeremia Taung" Yu Qhug' Yang: Thaung: Khug Mae Lhaung" To: Qhug' Ra" Khyo
11 Egutu gyetab te' li" na ko" ruyang Babelon gyetab wa Yerusalem mae" zad phao: lo" ako".
12 Airumung: ngo wa Yerusalem mae" thug' lo" mung: nga" nho: yham khaung jo,nho" zai yo bam re lo" sang: yu nae" qhid' mae" Benyamin mug: myid khyo ye" lo"-
13 Ngadqere: Benyamin kham: khyo ngo joe" ye: lao"- aimae mau" ang: ra" gyezo: qenho: au: jhaung gyezug: pho" Hanania nho: yao: myid:- Shelemia nho: yauggai zo: Lriya ga: mang yaug wa ngore tam" pye' mung:- nao Babelon byu qe: shad' khyo phao: de; lo" na: ra"- ga: ta" ra".
14 Ngo wa- airu: mangad:- ngo phao: ru mangad: ein: ngo phaug' tau: byid'- ngadqere: Iriya wa nga" dao: re manug: tae" gyo: byid: ngad: ra". Ai: atha"- yao: wa ngore taung: mung: zug: qejhao" ngore jhui" ye" lo" ra".
15 Yao: bam wa ngore nhag' jam: yo: mung: ngore be, yang: kho:kham jare" pho" Yonathan nho: yham khug mae pyid' lhaung" nae" amyin" byid' ako".
16 Ngo re myid khug mae" qe, mae ke' to: mung: aimae ayo, myao" sho' lhaung" to" ako".
17 Thao re kho:kham Zedekia wa byu nhao: yang: ngore khai yu nhao mung: kho:kham kho" mae yao: wa ngore sae za:- Asang mae" joe" li" ra" mungdao: gatau jo; ra" i? ga: ngore myid' ra". Ailao" ngo wa jo; ra" ein: tau: mung: nao wa Babelon kho:kham lo, khyo ab byid' pye' ru qhug' li" nae" ein: bo ta" va".
18 Ai: thao ngo wa nao ngore thaung: lhaung" nae" qhid' mae" nao rere:- ni" gyezug: qere re:- ce: amyu" byu qere re: ngo pe" qobo shad' lhoe" va" i?
19 Nao re we' mung"dan: re Babelon kho:kham gye mali" khe' nae" ga: nao re ta" ko" ra" ni" lapa qe pe" boe" avako" i?
20 Ana" Asang kho:kham pho" we"- nga" dao: re tae" gyo: mung: ngo ta" rure cao" kad' wa,- nao re ngo mho' ra" Yonathan nho: yham mae" thaung: khug khyo jeju khyo" ngore dadam: lo" nhao la, ein: mho' ra". Nao airu: kad' ngad re ngo aimae shid li" nae".
21 Airumung: kho:kham Zedekia wa kho:kham vang" khug mae ngore lhaung" to: nae" qhid' mae" amyin" khyo" ke' ra". Ngo wa aimae na: jo, mung: vogaung: khug mae" mug alhab' gan: lo" yo, joe" sho' mug kad' ra" jao: mae" dane, re mug dathaung: thaung: ngore byid' ako".