36
Caung:pa" Yham Mae Barug Mugsug' Dang: Re Nghe' Ra" Khyo
1 Yoshia nho: yauggai zo: Yehoiakim Yuda kho:kham kad' ru byid zin: ein: zin mae Asang wa ngore-
2 Mugsug' dang: re yu yu mung: Israel- Yuda we' byumyu" alhab' we' sin: yang: nao re ngo ta" to" ru ja: khao: ngo" re aimae tung" to: wa,- Yoshia kho:kham ngad: au:- ngo nao re sao qhid' dao: jhau: ra" ayo, mae" ana" joe" sho' mae ngo nao re ta" va" gu: ja: khao: ngo" re tung" to: wa,-
3 Ngo yao: bam: dao mae boe" nhao nae" yaung: to" ra" byo; qeim khyo alhab' we' sin: yang: Yuda byu qe the' gyo: gelao"- yao: bam: makhyang" ra" lo, mau" jham mae" to" qe phaug' lhang: lo ko" maba- ailao" yao: bam: makhyang" rure we' yao: bam: qobo jham re ngo khyad' byid: nae"- ga: ta" ra".
4 Airumung: Neria nho: yauggai zo: Barug re ngo khai: yu yang: Asang: yang ngore ta" to: va" gu: ja: khao: ngo" cao" tung" nae" ta" byid: va". Barug wa aire alhab' re mugsug' dang: mae tung" to" ra".
5 Ai: thao ngo wa Barug re o mae we' dakhyo: mho" shid' byid: va". Aiwa- ngo wa Caung:pa" Yham khyo ye: nae" akhang" maqo" lo:-
6 Ngadqere: thao: lhang mo,byu qe zo:ve jao" ra" ayo, mae ngo aikhyo ye: nug: ra". Asang: yang ngore ta" to: va" ru we' ngoyang nao re cao" tung" nae" ta" va" ru ja: khao: ngo" re yao: bam qhug' gyo: genae" qhid' mae" nao wa ai: mugsug' dang: re thoe qi: sho' ke' yang: nghe' nae" ngad: ra". Yao: bam: vogaung: jham mae" joe" li" ko" ra" Yuda byu qe bobo yang: yaug khao: ngo" ni" thoe re the' gyo: sho' ceru re kad' wa,-
7 Ce: byumyu" re yao" qu" gyaug qu" lhaung sho' ra" nhag' jam: yo" ru we' kyaug' nhin" va" ruyang yao: bam Asang re akyu" mho' mung: yao: bam: makhyang" ra" khyo jham mae" dam: qe phaug' lhang: lo ko" maba- ga" ru ngad: ra".
8 Aimung: Barug wa ngoyang yao: re kad' nae" ta" to" ru we' dakhyo: Caung:pa" Yham mae Asang: mungdao: re tab za: nghe' ra".
9 Yehoiakim Yuda kho:kham boe" ru ngo" zin ein: zin lho" gug khye' ein: khye' mae Asang: yang myo, nho byid' rure qo" yu nae" qhid' mae" amyu" byu qe zo:ve dalhang dam: jao" ako". Ai: zo:ve jao" rure Yerusalem mae" mo, alhab'- Yuda vogaung: jham mae" aikhyo joe" li" ko" ra" mo, alhab' jao" ako".
10 Ai: thao amyu" byu qe alhab' mo, tae" gyo" na ko" au: Barug wa ngo ta" to" ru ja: khao: ngo" re mugsug' dang: mae" nghe' kyo" ra". Yao: wa ceru re Caung:pa" Yham mae" jare" pho" Shaphan nho: yauggai zo: Gemaria nho: qe, mae kad' ra". Yao" qe, wa Caung:pa" Yham: nho: kham: sag' kham: dung: nhae mae" tho' mae jo; ra".
Zug: Qere Mugsug' Dang: Nghe' Kyo" Ru
11 Shaphan nho: yao: myid: Gemaria nho: yauggai zo: Mikhaia wa Asang ta" to" ra" mugsug' dang: mae" Barug yang nghe' ra" thoe re the' gyo" ra".
12 Ailao"- yao: wa kho:kham kho" gyezug: qe alhab' zab phaung phaung: na ko" ra" jare" pho" nho: qe, khyo ye" lo" ra". Aitau mae jare" pho" Elishama- Shemaia nho: yauggai zo: Delaia- Akbo nho: yauggai zo: Elnathan- Shaphan nho: yauggai zo: Gemaria- Hanania nho: yauggai zo: Zedekia we' gyezug gaje alhab' na: jo; ako".
13 Mikhaia wa mo,byu qere Barug nghe' kyo" rure yao: the' gyo" gu: ja: khao: ngo" yao: bam re ta" kyo" ra".
14 Ailao"- gyezug: qe wa (Kushi nho: myid: kai:- Shelemia nho: yao: myid:- Nethania nho: yauggai zo:) Yehudi re nhao: ke' mung: mo, byu qere yao: nghe' kyo" ra" ai: mugsug' dang: re cili" nae" qhid' mae" Barug re ta" nhao: ke' ako". Barug wa ai: mugsug' dang: jham re cilo byid' ra".
15 Yao: bam wa- gyo" zaung yang: ai: mug' sug' dang: ngonhaung" re nghe' kyo: la,- ga: ta" ako". Barug re: nghe' kyo" ra".
16 Yao: aire bin: nghe' thao byodin byosho: yao: bam yao: cao: jho" qu" yang: Barug re- cekhyo re ngonhaung" kho:kham pho" re lau lo" kyo: ca"- ga: ta" ako".
17 Ai: thao yao: bam wa yao: re- ana" cegu: alhab' re nao khoru: tung" i? Yeremia yang nao re cao" tung" nae" ta" ra" i? Ngonhaung" re ta" kyo: la,- ga: ta" ako".
18 Barug wa- Yeremia wa dao: kheim: khao:ngore- ngore cao" tung" nae" ta" mung: mhaug' yang ce: mugsug' dang: dao mae tung" to" ru ngad:- ga: tau" ra".
19 Ailao"- yao: bam wa yao: re nao we' Yeremia wa lo" phao: vho' ca" genae". Ni" shid' yaug khai: mae na: jo, ko" rure khag' rere: daba nhao ge,- ga: ta" ako".
Mugsug' Dang: Re Kho:kham Pho" Ngha" Khyo" Ra" Khyo
20 Gyezug: qe wa ai: mugsug' dang: re jare" pho" Elishama nho: qe, mae ke' to: mung: kho:kham kho" khyo ye: yang: ja: khao: ngo" re yao: bam: kho:kham re lau: lo" kyo: byid' ako".
21 Ai: thao kho:kham wa Yehudi re mugsug' dang: yu nhao: ke' ra". Yao: wa mugsug' dang: re Elishama nho: qe, mae" aire yu: yu mung: kho:kham pho" re we' yao" lhang" gam: ye; jo,ko" ra" gyezug qe alhab' re nghe' kyo" ra".
22 Ai: ayo, wa gyo, yo, ngad mung: kho:kham pho" wa yao" gyo, yo, mae na: ra" kho:kham kho" mae" myikhyeim" mae zaung: jo; ra".
23 Yehudi sam byid dau re bin: nghe' we' kho:kham pho" wa shae pyang angai: yang lhai" cad' mung: myi:khyeim" khyo pye' zaui: pye' ra". Mugsug' dang: geim" bin: nga" sho' yao: ceru: xo' kad' ra".
24 Ngadqere: cekhyo alhab' re the' gyo" ra" mo, kho:kham pho" re:- yao" gyezug: qere: gyaug re: magyaug- nhag' kaug' ra" ave, re: pe" maqhu" byid: ngad: ako".
25 Elnathan- Delaia- Gemaria bam wa ai: mugsug' dang: re mangha" pye' nae" qhid' mae" kho:kham pho" re mho' gesho' ngadqere: yao: bam re yao: pe" matae" gyo: byid: ngad: ra".
26 Ai: thao re yao: wa Yerahme kho:kham nau" re we' Azrie nho: yauggai zo: Seraia- Abde nho: yauggai zo: Shelemia bam re ngore we' nga" jare" pho" Barug re taung: nae" amyin" byid' ra". Ngadqere: Asang wa ngonhaung" re nyham" pye' ra".
Yeremia Mugsug' Dang: Gatau Dam: Tung" Ru
27 Barug re cao" tung" nae" ngoyang ta" ra" ai: mugsug' dang: re kho:kham Yehoiakim yang ngha" pye' thao- Asang wa ngore-
28 Mugsug' dang: gatau dalam: re dam: yu yang: qhid' phyao: mae" lam: mae bo: ru ja: khao: ngo" re ai: dao mae tung" nae" qhid' mae" ta" ra".
29 Asang wa kho:kham pho" re ta" nae" qhid' mae" ngore ta" ra". Aiwa- nao wa mugsug' dang: re ngha" pye' ava". Babelon kho:kham joe" li" mung: ce: mung"dan: re phyo' pye' nae"- ce: mung: dan: byu qe we' gug'nyhug' jham se' pye' nae". Pe"mung: yao: tung" ra" khyo re nao Yeremia re myid' ava".
30 Airumung: ana" kho:kham Yehoiakim nao re Asang ngo ta" ru wa- Davi nho: mung"dan: mae ni" myid:zo: qe dayaug re: maeib genae". Ni" mao gaung wa taung gaung shad' khyo shapye' pye' ru qhug' mung: na" mae wa ba re lhe' mung: myi" mae wa gyu: bam mae lang" jo; li" nae".
31 Naonhaung" alhab' mo; shad' lhoe" ko" ra" qobo mathao mae ngo wa nao we' ni" myid:zo: qe- ni" gyezug: qere qobo dae byid: nae". Nao re:- Yerusalem we' Yuda byu qere:- nga" nho: ta" peim: byid' rure dajhid' re: matae" gyo: ngad: ako". Airumung: ngo kyaug' nhin" to" ra" qug: khai: kyi" khyag' rure naonhaung" alhab' mo; dao mae boe" nhao nae"- ga: ta" ra".
32 Ailao"- ngo wa mugsug' dang: gatau dalam: re dam: yu mung: aire nga" jare" pho" Barug re byid'- yao: wa ngo ta" ru ja: khao: ngo" re cao" tung" ra". Yao: wa sao qhid' mae" mugsug' dang: mae bo: ra" mungdao: re yao: tung" mung: yao: re ngo ta" ra" mungdao: ru yao: tung" ra".