24
Pho' Ham" Shi: Shid' Gyan
1 Asang wa Caung:pa" Yham kheim: mae to" ra" pho' ham" shi: shid' gyan ngore qhu" byid' ra". (Ce wa Babelon kho:kham Nebugkhaneza yang Yehoiakim nho: yauggai zo: Yuda kho:kham Yehoiakhin re kyam: byu khyo" Yerusalem mae" Babelon khyo Yuda mung" mae" au: jhaung qe- lo, mau" kad' mo,- mau" zaui: jhao mo, we' daga" jhui" lo" thao boe" ru ngad: ra".)
2 Sao qhid' gyan mae no' mae" mhang" ra" pho' ham" shi: agai bo: ra". Gatau dalam: mae zo: magai: ra" pho' ham" shi: magai: ru bo: ra".
3 Ailao"- Asang wa Yeremia we"- nao pe" the' myao: i? ga: ngore myid' ra". Ngo wa pho' ham" shi: jham ngad: ra". Gai: ra" lam: wa gyai gai: ra". Magai: ra" lam: wa zo: nae" gyai yao: magai ngad: ra" ein: tau" ke'-
4 Aimung: Asang wa ngore-
5 Israel nho: Mao"So Asang ngo wa Babelon mung" khyo jhui" lo" qhug' ko" ra" amyu" byu qe wa ce: gai: ra" pho' ham" shi: jham we' dau gemung: ngo wa yao: bam re nyang" za: kad' nae".
6 Ngo wa yao: bam re lhaug' zaung" byid: mung: yao: bam re ce: mung" khyo dam: jhui" tug' lo byid: nae". Ngo wa yao: bam re zao: to' mung: yao: bam re maphyo' khyo" pye' nae". Ngo wa yao: bam re qho" yhaug' mung: yao: bam re maphan" pye' nae".
7 Ngo wa yao: bam re ngo Asang ngad: rure ba nae" kao bau myid ke' byid: nae". Ailao" yao: bam wa nga" byumyu" ngad: li" genae". Amung: ngo wa yao: bam: Mao"So ngad: li" nae". Pe"mung:ga"re yao: bam: nhag' lam: alhab' we' yao: bam ngojhao" tug' lo: li" genae".
8 Yuda kho:kham Zedekia- yao" lhang" gam: na mo, mung"dan: eib akhyo: ba mo,- ce: mung"dan: mae- mangad: lao" Egutu khyo qhui" ye: mo, ngad ko" ra" dang: ra" Yerusalem vobyu qere kam" wa- Asang ngo wa zo: nae" gyai yao: magai: ra" ce: pho' ham" shi: alhab' re we' dakhyo: yao: bam re kad' li" nae".
9 Ngo wa yao: bam: dao mae airu" ra" qug: khai: kyi" khyag' ru boe" nhao: ruyang mug: myid: dao mae" byumyu" qe alhab' wa gyaug: din: pye' li" genae". Byu qe wa yao: bam re jung"- yao: bam: khyo re qinug tu"- maphug' makhyad' kad' yao: bam: mang re ngoyang yao: bam re nha: sin" to" ra" khyi" khao: ngo" mae nhang: kheim: ke' rumae cili" genae".
10 Ngo wa yao: bam: dao mae gye poe- vae: moe' kyaug' ru- no boe" rure ngoyang yao: bam re we' yao: bam: phug' pho" qere byid' to" ra" mung"dan: mae dayaug re: madang losho' boe" nhao nae"- ga: ta" ra".