23
Joe" Lo Nae" Ayo, Re Myid: Lao" Ru
1 Yao" byumyu" re phyo' qheim" pye' mung: khe' sin" pye' ra" eib: ra" mo; dao mae Asang: dao: kho' ru wa khoqhi" byuxa: vaqoe, ngad nae" i?
2 Ce wa yao" byumyu" re gun caung byid: ga: mo, eib: ra" mo; khyo we' sin: yang: Israel Mao"So Asang ta" ru ngad: ra". Aiwa naonhaung" wa nga" byumyu" re magun caung ngad: ako". Naonhaung" wa yao: bam re abyi asin: kad' pye' mung: khe' lhae" pye' avako". Ana" ngo wa naonhaung" kad' lo: ra" makhyang" ra" lo, mau" qhid' mae" qobo dae byid: naeva".
3 Ngo wa yao: bam re ngoyang nha: sin" to" ra" mung"dan: jham mae" dang: ra" nga" byu qere zhang: yu mung: yao: bam: yham mug: khyo ngo dam: jhui" tug' lo byid: nae". Yao: bam wa zoshao myo: sho' qo" mung: myo" je" li" genae".
4 Yao: bam re gun caung byid: nae" zug qere ngo jaung byid: nae". Nga" byumyu" wa khonhae" re: gyaug: ru din: ru maqhug' lo: genae". Ngo yao: bam re qobo dae madam: byid: lo nae". Asang ngo ta" to: va"- ga" ru ngad: ra".
5 Asang wa Davi nho: myid:zo: din:man" ra" byu dayaug re kho:kham khyo" khyin: yu nae" ayo, joe" lo: na: ra". Ai: kho:kham wa pha,jhi" bobo za: eib mung: mung"dan: geim" mae jo: ru we' tarha" din: nyang: ru kad' li" nae".
6 Yao: kho:kham boe" li" lao"- Yuda mung" byu qe wa gug: gam qhug' li" genae". Israel byu qe wa ngaui pyo: yaug yo: za: qhug' na: li" genae". Yao: wa ngonhaung" Khyad' Yu: Asang ga: mhang" byid' ru qhug' li" nae"- ga: ta" ra".
7 Asang wa mung" byu qe wa Israel byu qere Egutu mung" mae" jhui" thug' lo: ra" kao so' daui: ra" Mao"So khyo" nga" mang re lao: mung: khonhae" re jham matang: genae" ra" ayo, wa joe" lo: li" nae".
8 Ai: atha" yao: bam wa Israel byu qere mug: am: shad' mung"dan: we' ngo: yang yao: bam re nha: sin" to" ra" mung"dan: gatau jham alhab' mae" jhui" thug' lo yaug kao so' daui: ra" Mao"So khyo" yang jham tang" li" genae". Ailao"- yao: bam wa yao: bam yao" mung"dan: mae qo" na: li" genae"- ga: ta" ra".
Lapa Qe We' Sin" Ra" Yeremia Nho: Mungdao:
9 Nga" nhag' lam: wa mhan" ngad: byaug va".
Amung: ngo wa ko, ko, nin" na: Asang: mathao mae-
yao" gyang" lho" mungdao: jham: mathao mae ngo wa yhid yid yaug we' dakhyo:-
sabyi qang: saung" shaug' ci yaug we' dakhyo: ngad: jo;-
10 Mung"dan: wa Mao"So re jhaug' mazaug mo, byang" jo; ra".
Yao: bam makhyang" ra" khyo" kao so' daui mung: yao: bam: kheim: so' re mangad' ra" khyo" ci: ako".
Mao"So: nhang: kheim: mathao mae mug: myid wa kaug' ngug mung: mhin: gyo, jao: jham wa kyaug' byaug: ako".
11 Asang wa lapa qe we' khinjaung qe wa- Mao"So mabo ngad: ako".
Yao: bam Caung:pa" Yham mae yao: makhyang" ra" mau" kad' na ko" rure ngo myao va".
12 Yao: bam su" ra" khyodang wa jhad' mung: mug: cad' jo; li" nae".
Ngo wa yao: bam re khyid au: the' thaung: lang: nhao nae".
Ngo wa yao: bam: dao mae qug: khai: kyi" khyag' boe" nhao nae".
Yao: bam qobo dae kham zo: nae" ayo, wa joe" li" na: ava".
Asang ngo ta" to: va".
13 Samari nho: lapa qe: qobo re ngo the' myao va".
Yao: bam Bala mang mae dao: jhau mung: nga" byumyu" re khyodae: jhui" dae" pye' avako".
14 Ngadqere: Yerusalem mae" lapa qe je: lhao" xo ko" rure ngo the' myao va".
Yao: bam wa myi: lao shad' mung: mhug' dao: ta" ako".
Amyu" byu qere shad' ra" mau" kad' nae" bao" byid' ako".
Airumung: khag' re: makhyang" ra" mau" kad' rure mathang: pye' ngad: ako".
Yao: bam alhab' wa ngore Sodom we' Gomora byu qe qhi" magai ngad: ako".
15 Airumung: ce wa Yerusalem mae" lapa qe we' sin: yang: qam: bo: ra" Asang ngo ta" ra" dao: ngad: ra".
Ngo wa yao: bam zo: nae" kho" ra" agae re byid: mung: shaug' nae" daug yao: bam re byid: nae".
Pe"mung:ga"re yao: bam wa mung"dan: geim" re Mao"So mabo: ra" lo, mau" byo: jo, nhao: ako"- ga: ta" ra".
16 Qam: bo: ra" Asang wa Yerusalem byu qere- lapa qe ta" ra" dao: re datae" gyo: ge,- yao: bam wa naonhaung" re myid: lao" khyo apyag' jham re za: pyang" byid' na: ako". Yao: bam wa yao: bam qhug' myid: rure naonhaung" re ta" mung: ngo ta" to" rure mata" ngad: ako".
17 Ngo ta" to" ra" dao: re matae" gyo: lo: ha: pye' ra" mo,byu qere yao: bam alhab' na: qo" na: dai: li" genae" ga: yao: bam xo' yang: ta" ako". Yao: bam wa nhag' lam: qao: ra" mo, yaug khao: ngo" re qug: khai: kyi" khyag' ru wa yao: re khonhae" re: maqo" tin: nae"- ga: ta" ako".
18 Ce: lapa qe mae" dayaug re: Asang: nyham" to" ra" myid qu" khyo re khonhae" re: maba: qu" ngad: ako". Yao: bam mae" khag' re: yao" mungdao: re magyo" qu"- maba: gyo" qu"- yao: ta" to" rure matae" gyo" qu"- nyang" za: magyo" qu" ngad: ako".
19 Yao" nho: nhag' yo" ru wa la qam" thin: ra" la ngad mung: makhyang" ra" mo; au: dao: mae hug' lai: lo" li" nae".
20 Amung: yao: kad' nae" yaung: to" ru ja: khao: ngo" re yao: mabin: kad' kad' wa ai: la mathang nae". Joe" lo nae" ba na jham mae yao" amyu" byu qe wa ceru re sho' sho' za: ba: gyo" li" genae" ein: ngo ta" va"- ga: ta" ra".
21 Asang wa ngo wa ce: lapa qere manhao: ke'- ngadqere: yao: bam thug' ye" lo" ako". Ngo wa yao: bam re pe" ja" mungdao: re: mabyid:- ngadqere: yao: bam nga" mang mae dao: jhau: na: ashiko".
22 Nga" nho: nyham" to" ra" myid: qu" khyo re yao: bam ba geyang: ngad: re- yao: bam nga" mungdao: re nga" byumyu" qere qo" ta" hau: mung: yao: bam: makhyang" ra" kao so' daui khyo re wa yao: bam kad' ra" makhyang" ra" mau" jham re yao: bam re qo" to" pye' nhao genae" ngad: ra".
23 Ngo wa khyi" khao: ngo" mae na: ra" Mao"So ngad mung: dajo, qo mae za: na: ra" yaug mangad:-
24 Khag' re: ngoyang mamyao: ra" jo, qo mae maqo" vho' na:- ngo wa mug: khaung we' myid gaung khyi" khao: ngo" mae na yaug ngad: rure naonhaung" maba ko" i?
25 Nga" mang mae mhug' dao: ta" mung: nga" mungdao: re yao: bam: yab mo, mae ngoyang yao: bam re byid: va"- ga: ta" ko" ra" ai: lapa qe ta" ko" rure ngo ba: ra".
26 Ai: lapa qe wa yao: bam myid: thug' yu ra" mhug' dao" yang nga" byumyu" re khomyhao" joe" sho' jhui" nghung" na shi: genae" laug i?
27 Yao: bam: phug' pho" qe ngore to" myhid' pye' mung: Bala shad' khyo phaug' lo" byaug vako" ru we' dakhyo: yao: bam ta" ra" yab mo, jham wa nga" byumyu" qe ngore to" myhid' pye' li" genae" ga: yao: bam jho: ako".
28 Yab mo, mo; ra" lapa wa ai wa yab mo, za: angad: ein: ta" ang: ra". Ngadqere: nga" mungdao: re the' gyo" yu: ra" lapa wa nga" mungdao: re jhaug' zaug za: ta" hau" kyo: ang: ra". Khovho wa jung: gaug we' jho" tau" yang: pe" akyu" bo: i?
29 Nga" mungdao: wa myi: we' dakhyo: ngad: laung: mo" baui re aje je, be; khyoe' pye' ra" be, dau we' dau: ra".
30 Yao: cao: yao" dao: re jho" yu mung: aijham re nga" mungdao: ngad: khyo" ta" hau" ra" mo, re ngo gye kad' va".
31 Yao: bam yao" dao: re jhau mung: aijham wa ngo mae joe" li" ra" dao: ngad: ga: ta" hau: ko" ra" lapa qere re: ngo gye kad' ra".
32 Asang ngo ta" ra" dao: re tae" gyo: ge,- mhug' pyag' dao: byang" jo; ra" yao: bam: yab mo, jham re ta" ko" ra" lapa qere ngo gye kad' ra". Yao: bam ce: yab mo, jham re ta" mung: yao: bam: mhug' pyag' dao: we' phug: ta" ra" dao" yang nga" byumyu" re khyodae: jhui" dae" ako". Ngo wa yao: bam re manhao: ke'- ye: genae" qhid' mae" re: yao: bam re amyin" mabyid: yao: bam wa amyu" byu qere dajhid' re: maqo" bao" byid: ngad: ako". Asang ngo ta" to: va"- ga: ta" ra".
Asang: Nho: Qo
33 Asang wa ngore- Yeremia we"- nga" byumyu" qemae" dayaug- mangad: lao"- lapa khinjaung dayaug Asang: mungdao: wa pe" i? ga: myid: gelao"- nao wa yao: re- nao wa Asang: qhid' mae" qo ngad: ra". Yao: wa nao re yu: pye' li" nae" ein: ta" nae" ngad: ra".
34 Nga" byumyu" mae" dayaug yaug- lapa dayaug yaug- khinjaung dayaug yaug Asang: qo ga" ra" dao: re ci yaug na: ngad: re ngo wa yao: re we' yao" yham khaung re qobo dae byid: nae".
35 Ai: atha" yaug khao: ngo" wa yao" ba nam qere we' yao" ba nam sang: cao: qere Asang pe" dao: phyid byid' to" ava" i? Asang pe" ta" ava" i? ein: myid: ang: ako".
36 Aimung: yao: bam wa Asang: qo ga" ra" dao: kheim: maci ca" lo: genae". Pe"mung:ga"re dayaug yaug ci yang: ngad: re- nga" mungdao: wa dang za: yao" qhid' mae" qo ngo boe" nhao nae". Amyu" byu qe wa qam: bo: ra" Asang daui: na: ra" Mao"So- yao: bam: Mao"So: dao: jham re tug' shai" pye' avako".
37 Yeremia we"- lapa qere- Asang naonhaung" re pe" dao: phyid' byid' ava" i? Asang pe" ta" ava" i? ein: myid: wa,-
38-39 Yao: bam nga" amyin" re maphug' cao" Asang: qo ga" ra" dao: re ci geyang: ngad: re ngoyang yao: bam re we' yao: bam: phug' pho" qere byid' to" ra" vogaung: re we' yao: bam re gaigai: yao: gaug: yu mung: yao: bam re ngo mae" va: sho' shapye' pye' nae".
40 Ngo wa yao: bam: dao mae apyad ato mae qho' phau" ru we' khonhae" re" matho' to" myhid' nae" ra" nga: yeim: ru boe" nhao nae"- ga: ta" ra".