20
Israel Byu Qe Gye Khe' Poe Qhid' Mae" Seim" Jin" Ru
1 Mug: am: shad' Dan mae" mug: thao shad' Bersheba joe" sho' mae" Israel byu qe alhab'- ba thug' shad' Gilead mung" mae" mo, alhab' wa ai: khai thoe re tau" ako". Yao: bam wa Mizpa jo, qo mae Mao"So: qhid' kheim: mae daphung: za: kad' yang zang" ham: na: jo; ako".
2 Israel amyu" kaung alhab' mae" au: jhaung qe wa ce: Mao"So: byu qe zang" ham: na: rumae bobo: ako". Aimae gyezo: 400,000 yaug ngad: ako".
3 Ai: ayo, mae Benyamin kaung mae" mo, wa Mizpa jo, qo mae Israel byu alhab' mo, zang" ham: na ko" ra" thoe re the' gyo" ako".
Israel byu qe wa- ce: yug: mau" re khoru: boe" ra" khyo ngonhaung" re ta" kyo: ge la,- ga: myid' ako".
4 Yao" myingai myhi" se' pye' qhug' ra" ai: Levi byu wa- ngo we' nga" myingai myhi" wa yethang: yab nae" qhid' mae" Benyamin mug: mae" Gibea khyo ye" lo"-
5 Gibea vobyu qe wa ngore li" taung" yu nae" qhid' mae" myi" re yham re li" lhang" gam" ako". Yao: bam wa ngore se' nae" seim" ako". Ai: atha" nga" myingai myhi" re deim" zag: yab gemung: yao: shid: lo" ra".
6 Ngo wa yao" mao gaung re yu mung: adau dau je; phyid' yang: Israel amyu" daxe: shid' kaung khyo dakaung re dadau dau vhin: ke' byid' ru ngad:- ce: byu qe wa makhyang" ru we' ave, made; ra" lo, mau" ngonhaung" phaung mae shad' lhoe" avako".
7 Cemae- naonhaung" alhab' mo, wa Israel byu qe ngad: ako". Ce khyo we' sin: yang: ngonhaung" pe" kad' nae" i? ga: ta" ra".
8 Byu alhab' mo, wa daga" to" ye, mung: ngonhaung" khag' re: zaung mae na yaug ngad ngad- yham mae na yaug ngad ngad yham maphao nae".
9 Ngonhaung" ceru: kad' nae"- ngonhaung" wa pha" ce' khyo" yang: Gibea byu qere zin: nae" byu daqhae: re khyin: yu nae".
10 Israel mung" mae" yaug ai daxe bam mae" dabam wa gyezo: qe: qhid' mae" zao: khao bao" thaug' byid: nae". Gatau dang: ra" mo, wa ye: yang: Israel byu qe: phaung mae yao: bam shad' lhoe" vako" ra" ce: ave, made; ra" lo, mau" qhid' mae" Gibea vobyu qere qobo dae byid: nae" ngad: ra".
11 Airumung: Israel mung" mae" yauggai qe alhab' mo, wa myid: qang khyo dakhe' za: zang" ham mung: ai: vogaung: re gyezin" ako".
12 Israel byumyu" kaung qe wa Benyamin amyu" kaung qe: mug: myid jao: sho' khyo byu nhao: ke' yang:- naonhaung" shad' lhoe" ko" ra" ce: yug: mau" wa pe" ru: ngad: i?
13 Ana" ai: mashab: ra" Gibea mae" mo, re ngonhaung" lo, mae ke' byid: gela,- airulao" ngonhaung" wa yao: bam re qo" se' pye' yang: Israel byumyu" mae" ce: makhyang" ra" mau" re qo" yu: pye' nae" ngad: ra"- ga: ta" nhao: ke' ako". Ngadqere: Benyamin byu qe wa gaje Israel byu qe: dao: re matae" gyo: ko" ngad: ra".
14 Gaje Israel byu qere gye zin: nae" qhid' mae" Benyamin mug: vogaung: alhab' mae" mo, Gibea khyo joe" li" ako".
15-16 Yao: bam wa ai: ba mae yao: bam wa vogaung: jham mae" gyezo: shid' tug khyaug' taung yaug khai: yu: ako". Ai tho' mago" gakai: lai khyin: yu: ra" Gibea mung" byu lo, kaung: kaung: mo, nhad' yo zo: re: zang" ham: na: ako". Yao: bam mae" yaug khao: ngo" wa xae khe' re lhao" mashad' lo: zao" sho' laug lhaui: ba: lhaui" pye' ra" mo, ngad: ako".
17 Israel byu qe wa Benyamin amyu" kaung re mabo: nghe' lo:- gye mho" mho" to" ra" gyezo: 400,000 yaug zang" ham: na: ako".
Benyamin Amyu" Kaung Qere Gye Khe' Ra" Khyo
18 Israel byu qe wa caung:pa" jo, qo Bethela khyo ye: mung: aimae yao: bam wa- Benyamin amyu" kaung qere kho: amyu" kaung qe shi" sao qhid' gye yezin: zai i? ga: Mao"So re myid' ako".
Ailao" Asang wa Yuda amyu" kaung qe shi"- ga: tau" ra".
19 Airumung: Israel byu qe wa thao: ba ne, seim re to" ye: mung:- Gibea vogaung: nhae mae jamu yete" na: ako".
20 Yao: bam wa Benyamin kaung mae" gyezo: qere gye yezin: nae" qhid' mae" gyezo: qere vogaung: khyo myo,nho qang yang: jo, qo khyo" to" ako".
21 Benyamin kaung mae" gyezo: qe thug' li" mung: ba mavao shire yao: bam wa Israel gyezo: shid' tug re se' pye' ako".
22-23 Airumung: Israel byu qe wa caung:pa" jo, qo khyo ye: mung: Mao"So: qhid' kheim: mae myi" thao joe" sho' ye kaug' ngug: na: ako". Yao: bam wa yao: re- ngonhaung" mao:nhaung: Benyamin qere gye zin:nae" ngonhaung" dam: ye: shi zai i? ga: myid' ako".
Asang wa- ye: ge,- ga: tau" ra". Airumung: Israel byu qe wa qam qo" mung:- qhid' ba we' dakhyo: yao: bam: gyezo: qere jo, qo khyo" to" ako".
24 Shid' lhang ein: lhang Benyamin gyezo: qere gye yedam: zin" ako".
25 Ce: shid' lhang ein: lhang rere: Benyamin byu qe Gibea mae" thug' li" mung: ce lhang mae yao: bam wa gye mho" mho" to" ra" Israel gyezo: datug: she' taung zo: re se' pye' ako".
26 Airumung: Israel byu qe alhab' Bethela khyo do, ye: gemung: ye kaug' ngug: ako". Yao: bam wa ai jo, qo Mao"So: qhid' kheim: mae myi" thao joe" sho' mazo: mashaug' lo: na: jo; ako". Yao: bam wa Asang qhid' kheim: mae zam" khug: ra" xeim: re ngaui" byid: mung: xeim: daqhae: re dau: geim" phad' ngaui" byid' ako".
27-28 Ai: pyad mae Mao"So: Dao: Thang" Ban" wa Bethela mae jo; ra". Arun nho: yao: myid: Eleaza nho: yauggai zo: Phineha aire qu" caung yaug ngad: ra". Mo,byu qe wa Asang re- ngonhaung" mao:nhaung: Benyamin qere ngonhaung" gye yedam: zin: zai i?mangad: lao"- ngonhaung" to" pye' zai i? ga: myid' ako". Asang wa- yezin: ge,- ne, mo" ba- ngo wa naonhaung" re yao: bam re aung: pye' nhao nae"- ga: tau" ra".
29 Airumung: Israel qe wa gyezo: daqhae: re Gibela lhang" gam: mae vho' jo, nhao: ako".
30 Ai: thao sam ba ein: ba mae Benyamin gyezo: qere yezin: nae" to" ye: mung: qhid' phyao: we' dakhyo: yao: bam: gyezo: qere Gibea shad' khyo myo, khung: qang yang: jo, qo khyo" to" ako".
31 Benyamin byu qe wa gye zin: nae" ga: thug' li" mung: aijham re vogaung: mae" va: khyo jhui" ye" lo" ako". Yao: bam wa qhid' phyao: kad' ko" ru we' dakhyo:- Bethela khyo ye" ra" khyodang we' Gibea khyo ye" ra" khyodang khaung: pa: din" mae Israel byu qere se' pye' ako". Yao: bam wa Israel byu sam xe yaug ko re se' pye' ako".
32 Benyamin byu qe wa ngonhaung" wa yao: bam re qhid' phyao: we' dakhyo: aung: pye' va" ga: ta" ako". Ngadqere: Israel byu qe wa naung zad: zad' phao nae" yaung: to: gemung:- yao: bam re vogaung: mae" khyodang jham khyo jhui" pyag' ye" lo" ako".
33 Airumung: Israel gyetab zang phao: qhui: mung: Balatama mae dam: jho" qham gelao"- Gibea lhang" gam: mae vho' jo, ko" ra" mo, wa nyag din taung" yao: bam vho' jo, ko" ra" vogaung: lhang" gam: laug byo; khaung: mae" tao" thug' li" ako".
34 Israel byu alhab' mae" gakai: lai khyin: to" ra" gyezo: datug wa Gibea re yezin" ako". Gyekhe' poe wa gyai xo sho' ngad: ra". Benyamin byu qe wa yao: bam jeim" lo" na: rure mabeim: ko" ngad: ra".
35 Asang wa Israel byu qere Benyamin qere aung: pye' nhao: ra". Israel byu qe wa ai ba mae gyevo 25,100 zo: re se' pye' ako".
36 Ailao"- Benyamin byu qe wa yao: bam seim" va" rure beim" ako".
Israel Byu Qe Khoru: Aungdoe; Ko" Ra" Khyo
Israel gyetab zang wa Gibea lhang" gam" mae yao: bam: yang vho' jo, nhao: ra" mo, re lam" khug ngha geyang: Benyamin byu qe mae" zad: phao: ako".
37 Ai: byu qe wa Gibea khyo phyad za: tao" ye" lo" ako". Yao: bam vogaung: khyo byo sin" vao ye: mung: aimae" yaug khao: ngo" re se' pye' ako".
38 Israel gyetab zang we' vho' jo; ra" mo, wa ave, jho" byid: nae" nyhang" to" ako". Vogaung: khug mae myikhug' thaui: mo" thug' do, li" rure yao: bam myao gelao"-
39 Gyekhe' jao: taung gaung mae na ko" ra" Israel byu qe wa dam: tug' lo: ako". Celhang wa Benyamin byu qe Israel byu qere sam xe yaug re bin: se' pye' avako". Yao: bam wa- ngonhaung" qhid' phyao: we' dakhyo: aung: pye' va"- ga: jho" ta" ako".
40 Ai: thao ve, lho thug' li" ra". Vogaung: mae" myikhug' thaui: thug' do, li" ra". Benyamin byu qe wa yao: bam: nhaung thao" khyo qu" ke' mung:- vogaung: geim" myi: nga" lo" na: rure qu" mug' ako".
41 Ailao" Israel byu qe wa tug' lo: ako". Benyamin byu qe wa yao: bam se' tam" pye' qhug' nae" va" rure beim: geyang: byo: din byo: sho: mung: pye' ako".
42 Yao: bam wa Israel byu qemae" zad: phao: lo" gemung: pa din" khyo tao" lo" ako". Ngadqere: yao: bam maloe, ko" ngad: ra". Yao: bam wa gyetab zaung we' ana" vogaung: mae" thug' li" ra" mo; agyo: mae taung" yu qhug' gemung: yao: bam alhab' se' pye' qhug' ako".
43 Israel byu qe wa gyevo qere lhaung" to: mung:- Gibea ba thug' shad' gye au: joe" sho' mathang mano: cao" khe' yang: cao" se' pye' ako".
44 Benyamin gai lo: gyezo: datug: she' taung se' pye' qhug' ako".
45 Gaje wa tug' gemung: Rimmon laug byo, shad' pa:din" khyo tao" phao: ako". Yao: bam mae" ngo" taung wa khyodang jham mae se' pye' qhug' ako". Israel byu qe wa dang: ra" mo, re Gidom khyo xo' yang: cao" khe' gemung: shid' taung se' pye' ako".
46 Alhab' re- ai: ba re se' pye' qhug' ko" ra" Benyamin gyezo: qe wa shid' tug: ngo" taung yaug ngad: ako". Yao: bam mae" alhab' mo, wa sulhe: gyezo: qe ngad: ako".
47 Ngadqere: khyaug' yo yaug wa Rimmon laug byo, khyo qo" phao: loe; lo" ako". Yao: bam aimae lho" byid khye' yena: ako".
48 Israel byu qe wa dang: ra" Benyamin byu qe gye dam: tug' kad' geyang: yauggai- myiqe: zoshao qe we' gug'nyhug' jham rere: alhab' re se' pye' ako". Ai: khaung: mae" vo khao: ngo" re yao: bam ngha" pye' ako".