19
Levi Byu We' Yao" Myi Ngai Myhi"
1 Israel byu qe kho:kham maqo" shiko" ra" pyad mae Ephrim bam le; mae Levi byu dayaug na: ra". Yao: wa yao" myingai kad' nae" qhid' mae" Yuda mung" Betlehem vogaung: mae" myiqe: nau" dayaug re yu: ra".
2 Ngadqere: ai: myiqe: nau" wa yao: re nhag' yo: mung: Betlehem mae" yao: pho" yham khyo phao: lo" byaug: ra". Aimung: yao: wa aimae lho" byid khye' na: jo; ra".
3 Ai: thao aiyaug wa yao" thao cao" ye: nae" myid: phyid' yang: yao: jhao" dam: tug' cao: lo nae" qhid' mae" yejhui: nae" seim" ra". Yao: wa yao" daui daui yaug we' loze shid' dau: re yao: we' daga" jhui" ye" ra". Ai: myiqe: nau" wa Levi byu re yao: pho" yham khyo jhui" vao ye: mung: yao: pho" aiyaug re myao lao"- ngaui bau: taung" lam: pang" yu: ra".
4 Yao: pho" tam" mung: yao: wa aimae sam ba thang: na: ra". Yao: shid' tao wa zo: shaug' mung: aimae thang: na: ako".
5 Byid ba ein: ba ne, seim no' mae" to" mung: seim" jin" ako". Ngadqere: ai: myiqe: nau" yao: pho" wa Levi byu re- daja: ja: shi" sao qhid' zho: ge,- ni" shid' tao zhao: zhao: ga: genae"- ai:thao lao" ni" shid' tao to" lo" ge,- ga: ta" ra".
6 Airumung: yao: shid' ug zo: wa gyo" zaung mung: daga" zo: shaug' ako". Ai: thao ai myiqe: nau" nho: yao: pho" wa yao: re- jeju khyo" damyi yab shiyang: zo: shaug' wa,- ga: ta" ra".
7 Levi byu wa to" lo" nae" to" li" ra"- ngadqere: yao: pho" wa yao: re thang shinae" tam" mung:- yao: wa aimae damyi dam: thang: na: ra".
8 Ngo" ba ein: ba ne, seim no' re yao: wa to" lo" na: ra". Ngadqere: myiqe: nau" yao: pho" wa jeju khyo" zo:ve zo: wa,- myi" thao ba gae: sho' lao" shi: wa,- ga: ta" ra". Airumung: yao: shid' ug zo: daga" zo: shaug' ako".
9 Ai: yaug we' yao" myingai- yao" daui daui yaug wa to" lo" nae" dalhang dam: seim" ako". Yao: pho" wa qu" wa,- ana" wa myi" thao mug: cad' lo" na: ava". Ana" myi re: thang shi: ge,- dazab re mug: cad' lo: li" nae". Cemae thang yang: pyo: pyo: na ge,- ne, mo" ba ne, seim no' to" mung: yham khyo lo" ge,- ga: ta" ra".
10-11 Ngadqere: aiyaug wa aimae gatau damyi manug: thang: na lomung: yao: we' yao" myingai myhi" wa yao: shid' tao: nho: daui daui yaug we' loze shid' dau: mae do: kai: mung: gyaung: to: lo" ako". Yao: bam Yebusi nhae khyo joe" lo ko" au: ba vao yo, ngad: ra". (Yebusi wa Yerusalem ngad: ra".) Airumung: daui daui yaug wa yao" asang re ngonhaung" ce: Yebusi vogaung: mae thang: re magai i? ga: ta" ra".
12-13 Ngadqere: yao" asang wa- Israel byu qe mangad: ko" ra" mo; vogaung: mae ngonhaung" mathang nae"- ngonhaung" lai: ye: mung: dazab ye: yang:- Gibea mangad: lao"- Rama mae ye: yab zai ngad:- ga: ta" ra".
14 Airumung: yao: bam wa Yebu re lai: ye: mung: gyaung: xo' su" lo" ako". Yao: bam Benyamin amyu" kaung qenho: mug: kyo:- Gibea khyo joe" ye: ko" au: ba vao: lo" byaug: ra".
15 Yao: bam wa ai: mae yeyab genae" qhid' mae" vao ye" lo" ako". Yao: bam vogaung: khyo vao ye: mung: vogaung: shava jao: mae yezaung: jo; ako". Ngadqere: ai: myiqhid' mae" yao: bam re khag' re: bang" malham: tug: yu ngad: ako".
16 Yao: bam aitau mae na: jo; shiko" au:- mao: zo: phug' dayaug myi" thao re yo khyo" phao: lo: ra". Yao: wa Ephrim bam mug: mae" na: li" yaug ngad: ra". Ngadqere: ana" yao: wa Gibea mae na: jo; ra". (Ai mae na ko" ra" gatau qe wa Benyamin amyu" kaung mae" mo, ngad: ako".)
17 Mao: zo: phug' wa vogaung" shava jao: mae" gyaung: su: yaug re myao mung: yao: re- nao khai: mae" li" yaug ngad: i? Khai: khyo ye: nae" i? ga: myid' ra".
18 Levi byu wa nga" shid' tao wa Yuda mung" Betlehem mae na: lo mo, ngad:- ana" nga" shid' tao: yham jo; ra" Ephrim bam mug: khyo phao: lo" na: ru ngad:.
19 Gug'nyhug' zo we' ngonhaung" nho: loze qhid' mae" khavho- ngo we' nga" myingai myhi" we' nga" daui daui yaug: qhid' mae" mug we' sabyi qang: ngonhaung" qo" sho' ngadqere: ana" myi khag' re: ngonhaung" re bang" malham: pang" yu ngad: ako". Ngonhaung" qo ca" gu: alhab' ngonhaung" qo" ga: tau" ra".
20 Ai: mao: zo: phug' wa- naonhaung" re nga" yham mae bang" nhao nae"- naonhaung" re ngo gun caung byid: nae"- vogaung: shava jao: mae naonhaung" ma yab ca"- ga: ta" ra".
21 Airumung: yao: wa yao: bam re yao: we' daga" yham khyo jhui" lo" mung: ai bam: loze jham re zho" ra". Yao" bang" vo qe wa khyid cid' pye' yang: zo:ve zo" ako".
22 Yao: bam airu: zo: pyo: shaug' pyo" na ko" au:- ai: vogaung: mae" gaung sho: jho" zam" khyo re mangad mangung: kad' ra" mo, alhab' wa nyag din taung" ai: yham re li" vang: geyang: kham: zang re li" ko' na: ako". Yao: bam wa mao: zo: phug' re- nao we' daga" yham khyo vao lo: ra" yaug re jhui" thug' li" byid: la,- ngonhaung" yao we' gaung sho: jho" zam" nug: ra"- ga: ta" ako".
23 Ngadqere: ai: mao: zo: phug' wa taung gaung khyo thug' ye: yang: yao: bam re- nga" ba nam qe we"- mangad: nae"- jeju khyo" airu" ra" makhyang" ra" mangad mangung ra" akyang qeim: ra" lo, mau" re dakad' ge,- ceyaug wa nga" bang" vo ngad: ra".
24 Qu" ge,- cemae yao" myingai myhi" we' nga" zo: zomyi: gyang" na: ako". Yao: shid' yaug re ana" ngo jhui" thug' li" byid: nae". Naonhaung" yao: shid' yaug we' jho" zam" ge,- naonhaung" o: khyo" kad' ge,- ngadqere: ce yaug re wa airu" ra" agyaug alhaung: ra" lo, mau" dakad' ge,- ga: ta" ra".
25 Ngadqere: yao: bam wa yao" dao: re matae" gyo: ko" ngad: ra". Airumung: Levi byu wa yao" myingai myhi" re jhui" yu yang: taung gaung khyo ye nha byid' ra". Yao: bam wa yao: re damyi geim" mae mug: bo" sho' mathang: lo: deim" zag: yab mung: yao: re mangad mangung: kad' ako".
26 Mug: bo" zo" re ai myiqe: wa yao" yham sang pho" na: ra" mao: zo: phug' nho: yham kham: dung: khyo lo, yheim" to: mung: lalang" jo; ra". Yao: wa mug: bo" sho' aimae lang" jo; ra".
27 Yao" yham sang pho" wa ai: ba ne, seim to" li" mung: yao" gyaung: khyo khyo su" ye" lo" nae" qhid' mae" kham: phung" ke' re- yao" myingai myhi" wa yham kheim: mae yao" lo, kham: dung: khyo yheim" to: mung: lolang" jo; rure yemyao: ra".
28 Yao: wa- to" se,- lo" lang: se,- ga: ta" ra". Ngadqere: matau: ngad: ra". Airumung: yao: wa ai: mao gaung re loze dao mae apyi khyo" dao: kai: yang: yao" yham khyo phao: lo" ra".
29 Yao: wa yham khyo joe" lo" lao"- yham khyo vao lo" mung: shae dakhyae: lo" yu: ra". Yao" myingai myhi" nho: mao re yu mung: daxe: shid' dau khyo" yang: je; phyid' ra". Israel amyu" kaung daxe: shid' kaung- kaung khao: ngo" khyo dadau dau vhin: ke' ra".
30 Aire myao: ra" mo, yaug khao: ngo" wa- ngonhaung" ceru" ru khonhae" re: magyo" qu"- Israel byu qe Egutu mung" mae" thug' lo: ra" ayo, mae" ana" joe" sho' ceru" ru maboe" qu" cekhyo we' sin: yang: daja: ja: kad' ca" ra". Pe" kad' nae" i? ga: ta" ako".