6
Yoba
1-2 Nga" qug: khai: jham we' kaug' qhui: ru jham re jao mae qe lag: ngad: re-
3 Aijham wa- panglai: mae" ma coe jham tho' je: la: genae".
Aimung: nga" dao: thin wa nao re magai: mug' nhao nae".
4 Qam: so' bo: thao" ra" Mao"So wa yao" myo: jham: yang ngore bag: zao" ava".
Aimung: aijham: myono; wa nga" gaung geim" mae byo: lo" va".
Mao"So wa yao" gyaug din ja: re nga" qhid' mae" daja: bin daja: jaung: to" ava".
5 Loze wa vohau: zo" na: au: nhag' dag: ra".
Nung: jaung zang re: khovho zo" na: au: sae za: tae" to" ra".
6 Ngadqere: min mabo xo: mangae: ra" zo:ve re khag' qo" zo: nae" i?
Qo, au" au" shae mae pe" min bo: ra" i?
7 Airu" zo:ve re ngo nhad' myho' thoe magyo:-
Aimung: ngo zo" ru ja: khao: ngo" wa ngore nhag' no nhao: ra".
8 Ngo mho' ja: re Mao"So pe"mung: ngore mabyid: nae" i?
Nga" akyu" mho' dao: re pe"mung: yao: matau: byid: nae" i?
9 Yao" yang shi" ngore se' pye' qa: we"-
10 Yao: airu: kad' nae" ngo qe ba: ngad: re ngo khoqhi" no: na qere:-
ngo wa ngaui bau: ngaui lho" athug' jhu" qin" nae" ru-
Mao"So wa Gyang" lho" rure ngo ba: ra".
Yao: amyin" byid' rure ngo khonhae" re: mangag: thaug' pye' qu"-
11 Ngo xo' daui: na nae" qhid' mae" ngo mae pe" qam: o: qo" i?
Ngo mae myid: lao" nae" khyo majo; ru- pe"mung: ba: xo' daui: na nae" i?
12 Ngo re laug zang: yang kad' to" i? Nga" gaung khyao wa gyid: bo" ngad: i?
13 Ngoyao" gaung re khyad' yu nae" qam: o: ngo mae mabo lo:-
ngore bao" yu nae" qhid' mae" lhang: ye: nae" jo, qo majo,-
14 Mao"So re ngo shapye' pye' va" ru ngad ngad mashapye' ngad: re ngad-
Ceru" ru qug: khai: qhug' ra" au: re ngo wa- jhaug' zaug: ra" ba nam qe qo: ca" ra".
15 Ngadqere:- nga" ba nam qe naonhaung" wa-
mug: maqu lao" kyaug' ho: lo" ra" qid zo: gyaung: we' dakhyo: ngore mhug' pyag' zo" ako".
16 Qid zo: gyaung: jham re gyu: we' gyukhai" jham byang: jo, ngadqere:-
17 Laung: li" lao" aijham baui" lo" ako".
Aimung: qid zo: gyaung: kao" jham wa myid cin kyaug' ho: jo; ako".
18 Phaga: gyaung: qhang su: mo, wa qid re qho: qin" mung: khyodae: dae" ako".
Yao: bam wa du" lae" qin" mung: din"pyad' yo mae shid: lo" ako".
19 Sheba mung" we' Tema mung" mae gyaung: qhang su: mo, qho: qin" ako".
20 Ngadqere:- kyaug' ho: jo; ra" qid zo: gyaung: nhae mae yao: bam: myid: lao" khyo thao" byaug: ako".
21 Naonhaung" wa- nga" qhid' mae" ai: qid zo: gyaung: jham we' dau: ako".
Naonhaung" wa nga" au: pa lo,kyo' re myao mung: gyaug: ru we' naung zad: zad' phao: lo" ako".
22 Ngo wa naonhaung" re jhaung qhu" byid: gela, ein: mho' qu" i?
Mangad: lao"- dayaug yaug re nga" gaung tha" khyo" khug vag: jhaung qhu" byid: nhao: qu" i?
23 Mangad: lao"- gyevo dayaug yaug la, zag zo" ra" zug: dayaug dayaug: lo, mae" la, ngore khyad' yu nae" mho' qu" i?
24 Gai va"- ngore mho" shid' gela, nga" qobo jham re ceim" shid' gela,-
Ngo sae za: tae" jo; mung: naonhaung" dao: re tae" gyo: nae".
25 Din:man" ra" dao: jham wa lam ga" ra".
Ngadqere:- naonhaung" wa pe" lajheim: mabo: ru ta" na: ako".
26 Naonhaung" wa ngore la za: mad: na: ra" ga: myid: jho: ako".
Airu: ngad: re- pe"mung: yang: nga" nhag' lam: thao" ra" dao: kheim: jham re tau: byid: ko" i?
27 Naonhaung" wa- Cug' zo: nau" jeim qe: qhid' mae" lhao" re: pha" ce' khyo" ako".
Aimung: naonhaung" te" thao" ra" ba nam qe: dao mae lhao" re" jo,nho" qo" sho' kad' zo" li" genae".
28 Nga" myo,khung: re zhaug' qu" gela, ngo mamhug' nae".
29 Naonhaung" dao: saung" jhau: lai: avako". Matarha" rure thang: to: gese,.
Ngore dao: daphyid' gela,- ngo wa jo: yaug ngad:.
30 Ngadqere:- naonhaung" wa ngo mhug' na: ra" ga: myid: jho: ako".
Naonhaung" wa ngore- jo: ru we' shad" rure maba: ta" yaug ngad: ra" ga: myid: jho: ako".