5
1 Yoba we"- Hug' yao: ke' wa,- Dayaug yaug qe phaug' tau: genae" laug qu" wa,-
Nao lhang: qu" nae" mug: lagyo: dayaug yaug na: ra" i?
2 Nhag' yo: mung: naoyao" gaung naoyao: shid sho' myid myo" ru wa
lajheim: mabo: ra" ako" asho: mau" ngad: li" nae".
3 Gug: gam: na nhohab qu" mung: ra" nhag' magyang" byu qe ngo myao: qu".
Ngadqere:- yao: bam: yham jham mae ngoyang nhang: kheim: khai: khyo" byid'-
4 Yao: bam: yauggai zo: qe wa khonhae" re: gug:gam maqo" yu ngad: ako".
Yao: bam re tarha" yung" mae ta" vha byid: nae" dayaug re: mato" li" ngad: ako".
5 Vae: moe; mo, wa nhag' magyang: yaug: gaug zo re zo" li" genae".
Zau: kyi yo mae yaug: ra" gaug zo re lhao" zo" pye' li" genae".
Qid shab' mo, wa yao" jo,nho" re o: qu" byid: li" genae".
6 Myid xau mae makhyang: mashab: ru magai yaug ngad: ra".
Myidgaung khug mae" re: qug: khai: mayaug: thug' li" ngad: ra".
7 Ngad yao: mangad nae". Myi: mae" myijhang: zin: dao" lo"
ru we' xao su byu wa yao: yao" dao mae qug: khai: kad' yu: ra".
8 Ngo qe nao ru: ngad: re-
nga" mau" zo" re Mao"So jhao" ciye: byid: nae".
9 Ngonhaung" wa yao: kad' ra" qi" qhang: mau" zo" jham re maqo" ba: gyo:-
Aimung: yao" mug' pho: ve,lho jham wa thao" ga" ru majo,
10 Yao: wa myidgaung khyo mug: qu re nhao: ke' mung:
qhovo: yo jham re qhid sheim: byid' ra".
11 Ngad va"- nyham: khyo" mo, re tau: to' mung:
kaug' ngug mo, alhab' re ngaui bau: ngaui lho" ru byid: yaug wa Mao"So yao: ngad: ra".
12-13 Yao: wa apyag' avhan" byu qe: myid: yaung: rure
yao: bam kad' ra" mau" zo" maaung doe, nae" qhid' mae"
pha,jhi" bo mo, re yao: bam yao: kyae: to" ra" mau" mae myhi" pye' ra".
14 Na" gaung ba khaung tau yo, mae lhao" re: yao: bam soe' yam: qin" ako".
15 Ngadqere:- Mao"So wa myaung mo, re shid: rumae" khyad' yu: ra".
Yao: wa jo,nho" maqo" mo, re su: yang deim" zag zo" rumae" khyad' yu: ra".
16 Yao: wa myaung mo, re myid: lao" jo, qo byid: mung: makhyang: mashab mo, re sae za: tae" lo" nhao: ra".
17 Mao"So: yang mho" kyang" ru qhug' yaug wa ngaui lho" ra".
Yao" yang nao re qeim: ra" au: nhag' dayo:-
18 Mao"So wa- yao" yang te' ra" dae khu re phacug' yang dae thab' byid' ra"
yao" lo; yang nao re dae no nhao mung: yao" lo; yang dae gai byid' ra".
19 Dalhang: bin dalhang yao: wa nao re dae de' nae" rumae" khyad' yu: li" nae".
20 Bao" khug' khug' lo: ra" au: yao: wa nao re daui: na nhao: li" nae"
aimung: gye poe mae" yao: wa nao re gug:gam byid' li" nae".
21 Mao"So wa nao re mhug' vhan" zo: mo; lo, mae" khyad' yu: li" nae"-
byo; qeim: ru joe" lo: au: re yao: wa nao re khyad' yu: li" nae".
22 Nao wa aqan alan mau" we' moe, shab' rure qi: jung" pye' li" nae".
Amung: gug'nyhug' lhe: jham re magyaug ca" nae".
23 Nao phaug' ra" yo mae laug zang majo, nae"
gug'nyhug' lhe: jham wa nao re khonhae" re: gye makad' genae".
24 Ailao" nao wa ni" zaung khug mae ngaui pyo: yaug yo: ru we' qo" na: li" nae".
Ni" yao jham re nao qu" ke' re yao jham gug:gam: na: ru the' myao: li" nae".
25 Nao wa- mhin: gyo, jao: mae" vohau: vho' jham nho" myo" ra"
myid:zo: qe qo" li" nae".
26 Gaug yad yo, joe" sho' mhang" ra" jung: gaug we' dakhyo:
nao wa au: phyu zaui nae sho' daui: na: li" nae".
27 Yoba we"- ngonhaung" wa gyai myao" sho' mho" yu mung: cere ba: ru ngad:.
Airu wa dangman" ru ngad: ra" rumung: ana" aire khae: yu wa,-