41
1 Nao wa maojaung: Levithan re ngomyhad' yang qo" myhad' yu nae" i? mangad: lao"-
yao" sho re taui" yang qo" taui" yu nae" i?
2 Nao wa yao" nho mae nhoyu qo" thung: nae" i? mangad: lao"-
yao" ae cae: qug: mae anghoe: qo" te' byid: nae" i?
3 Yao: wa- yao: re nhao: ke' nae" qhid' mae" nao re mho' nae" i?
Yao: wa yao: re nao: yang nhag' khyag' yu nae" qhid' mae" nao re mho' yao nae" i?
4 Yao: wa nao we' myid vang" khyo to: mung:
nao re khonhae" re: caung da" byid: nae" ga: dao:so: to: byid' li" nae" i?
5 Nao wa ni" daui daui myiqe: nau" qere go" keim" nhao nae" qhid' mae"
yham mae khau: to" ra" ngho' nau" re we' dakhyo: yao: re taui" to: nae" i?
6 Ngo: kung" zo: mo, wa- yao: re gau jho mho genae" i?
Aung: zo: aung: shaug' phaga: byu qe wa yao: re phyo' aung" li" genae" i?
7 Nao wa yao" asad' re ngo: thug' lhae tad' jham: yang qo" ke' pyang" to: nae" i?
Mangad lao"- yao" au: lam: re ngo: thug' lakhyug: yang qo" geim: kyao" byid: nae" i?
8 Yao: re nao dalhang qo" zao" tin: thao nao madam: nug:-
tin: lo nae" nao wa ai jho" khe' se' rure khonhae" re: mato" myhid' lo nae".
9 Maojaung: Levithan re myao yaug khag' ngadqere:-
lhe: myid byaug: lo" mung: myidgaung khyo gyang: lang" lo" ako".
10 Yao: re nhug' to" ke' lao" yao: gyai tin" li" ra".
Yao" nho: qhid' kheim: mae khag' mavae" ye; jo, ngad: ako".
11 Yao: re khe' zin: mung: khag' qo" gug:gam: na: genae" i?
Mug: myid byu khag' dayaug re: airu: maqo" kad' ngad: ako".
12 Maojaung: Levithan nho: khyid jham: akhyo nao re ngo ta" kyo: mung:
yao: khoqhi" qi" qhang: ru we' qam: bo: ru sho' kyo: li"-
13 Yao" nho: gaung mae" akye' re khag' maqo" qhid' pye' byid:-
yao: ve, ci: ra" gyemai gyebau: rere: khag' maqo" thug' kyao" byid: ngad: ra".
14 Qu" gyaug taung" ra" zaui jham byang" sho' de; jo; ra"
yao" aekhao: re khag' qo" ho" nhao genae" i?
15 Yao" dao kao" mae wa laug zang ru: qao sho'
xo' taui" to" ra" go jham ajin jin de; ra".
16 Ai: go dakhye' we' dakhye' agyo: khyo"
so' lhao" magai: vao losho' tang tang jid' jid' za: xo' taui" to" ra".
17 Aijham alhab' wa pe" yang re:
maqo" phyo' sin" pye' losho' tang za: taui" zham: to" ako".
18 Yao: nho ag' ci" ci" ke' re bo" bao kyi: thug' li" ra"
aimung: yao" myi,jid' jham wa ba thug' li" ru we' dakhyo: thaung: bao: ke' ra".
19 Yao" nho: nhad' mae" myishae thug' ra".
Aimung: myijhang: jham dao" thug' lo: ra".
20 Ug' khug mae nga" na: ra" myo, jham mae" myikhug' we' dakhyo:
yao" nho khyo" myikhug' moe: thug' li" ra".
21 Yao" nho: so' wa myi: re ngha" te' qhid: ke' ra".
yao" nhad' khug mae" myishae thug' ra".
22 Yao" nho: lang zang: wa kheim: so' gyai qi: mung:
yao: we' qhug' mo, alhab' mo, gyaug: din: ako".
23 Yao" nho: shoqid mae qam: nang" ru dakhyi" re: majo,
aiwa jo, to' we' dakhyo: qao mung: pe" re: mazaug ngad: ra".
24 Laug zang ru: qao: ra" yao" nhag' lam: wa pe" rere: magyaug ngad: ra".
Aiwa laug lhang we' dakhyo: pe" mazaug koe, koe, ga: gyai qao: jo; ra".
25 Yao: to" ye; li" re qam: bo: thao" mo, lhao" gyaug: din: ako".
Yao: bam wa saung" gyaug mung: pe" maqo" kad' masho: majhin ngad: ako".
26 Yao: re dae qo" te' nae" shae pyang: majo, yao: re qo" no nhao: ra" lhae tad' ngad ngad-
myo: ngad ngad- lhae daung ngad ngad majo, ngad: ra".
27 Jo,to' wa yao" qhid' mae" khovho we' dakhyo: au" ra"-
aimung: gyid: bo" wa sag' qeim: we' dakhyo: nhae" ra".
28 Yao: re qo" tao" phao nhao: ra" myo: majo,-
yao" adao mae pye' gyan" ra" laug zang jham wa khovho khe' jham we' dau: ako".
29 Thaung kang wa yao" qhid' mae" khovho re"ru: angad: ra".
Aimung: byu jham lhae tad' geim: ke' re yao: qi: ra".
30 Yao" nho: vae: dug: mae" akye' jham wa asu: tho' ra" ug' je, we' dau: ako".
Aijham wa tham: bab: myid mae gaug nao: the" yang ru: kyo' kho' pye' ra".
31 Yao: wa panglai: re qid laung zhau: ru we' dakhyo: zhau: to' ke' ra".
Aimung: xau ug' we' dakhyo: nyab thug' ke' ra".
32 Yao: wa yao" thao mae qhi qhi mung: ra" khu dung nhao co' mung:
panglai: re nyab phyu boe" nhao: ra".
33 Yao: we' qo" tau" nae" ru myidgaung dao mae pe" mana-
yao: wa maba: gyaug: ra" gug'nyhug' daja: ngad: ra".
34 Yao: wa- ngad beim" thao" ra" gug'nyhug' jham re lhao" re: qu" ngai: pye' ra".
Yao: wa gug'nyhug' lhe: alhab' nho: kho:kham ngad: ra".