40
1-2 Yoba we"- nao wa qam: so' bo: thao" ra" Mao"So re mai qhi" nae" seim" ra".
Nao ana" lo, tau: pye' nae" i? mangad: lao" phaug' tau: nae" i?
3-4 Asang we"- ngo wa nhag' magyang" khyo" jhau vanhaung ngo pe" qo" phaug' tau: nae" i?
Ngo wa gatau pe" mata" lo nae".
5 Ngo wa ta" ang: tho' je yang: ta" pye' va".
6 Ailao" Asang wa Yoba re la qam" khug mae" dam: jhau: thug' li" ra".
Asang
7 Ana" nao gai lo: dayaug we' dakhyo: to" ye, wa,-
aimung: nga" nho: dao: myid: jham re phaug' tau: byid: la,.
8 Nao wa ngore shad' ga: mung: nao yao: wa jo: ga" khyo" ta" nae" qhid' mae"-
ngore matarha" ein: sagse: qhu" byid: nae" seim" na: i?
9 Nao wa ngo we' daqi" za: qam: bo: i?
ni" nho: thoe wa nga" nho: thoe qhi" mug: gyug: ru: qo" myang: i?
10 Airu: ngad: re- ni" nga: lho" ru we' ngad beim" ra" khyo" to" ye; ke' wa,
naoyao" gaung re kho:kham kheim: so' we' phungbao ve; ci: wa,-
11 Ngad beim: mo, re qu" ke' qu" wa, ni" nho: nhag' yo: re vhe' khyo" ke' mung:
yao: bam re nyham: gyo" lo" nhao wa,.
12 Ngad va"- yao: bam re qu" ke' mung: lao" khyo" pye' wa,
makhyang: mashab mo, re yao: bam ye; jo; ra" jo, qo mae khyoe' pye' wa.
13 Yao: bam alhab' re myidgaung khug khyo nyhab' pye' wa,-
yao: bam re movo: mug: mae taui" lhaung" to: wa,.
14 Ailao"- nao re ngo sao qhid' caung:khin" mung: nao wa
naoyao: qo" aung doe; yu: ra" ein: lhang: yu nae".
15 Qid myao: Behemod re qu" ke' qu" shi: wa,-
Ngo wa yao: re phan" phaug' to: mung: nao rere: phan" phaug' to: va".
Yao: wa nung: zang we' dakhyo: vohau: zo" ra".
16 Ngadqere:- yao" gaung khug mae khoru" qam: zang bo: ra" i?
Yao" nho: shogyi: jham khug mae khoru" kheim: so' mo" bo: ra" i?
17 Yao" nho: shomyi: wa- shaug' gae we' dakhyo: tau: zhaung: li" mung:
yao" khyid jham mae" shogyi: jham wa qam: bo: ako".
18 Yao" nho: shoqug: jham wa- gyid: bo" we' dakhyo: qao mung:
yao" khyid jham wa- jo, to' thaung: jham we' dakhyo: ngad: ako".
19 Ngo phan" phaug' to" rumae mug' thao" ja: ngad: ra".
Yao" nho: phan" Asang za: yao: re qo" aung: pye' ra".
20 Seyo: gug'nyhug' lhe: jham go" keim" ra" bug gaung jham: dao mae
yao: re zho" qhi: nae" vohau: yaug: ako".
21 Yao: wa- zau: kyi paung" jham: aqao: mae lang" jo, mung:-
tham: nheim" mae" qid phaung: sad' jam" mae vho' laung" jo; ra".
22 Qid zo: gyaung: yae mae" zau: paung" jham we'
qid phaung: gae jham wa yao: re ba sham qab byid' ako".
23 Yao: wa qid bug thin: ra" qid gyaung: re magyaug ngad: ra".
Yao" nho: myo, khung: mae Yodan gyaung: yug: be; rure sae za: tae" jo; ra".
24 Yao" nho: myo,jid' jham re khag' qo" thab' byid: mung: yao: re khag' qo" taung: nae" i?
Mangad: lao"- yao" nhad' bae re lha" mae khag' qo" myhi" nae" i?