15
Shid' Lhang Ein: Lhang Jho" Jhau: Ru
(15.1- 21.34 )
Elipha
1-2 Elipha Yoba we"- dao: je dao: myid za: angad: dao: je dao: myid za: angad:-
3 Pha,jhi" bo: ru khag' dayaug re: nao re" ru: maqo" jhau-
airu" ru lajheim: mabo: dao: jham: yang re: yao: yao" gaung re khag' maqo" ta" vha: yu.
4 Nao wa naoyao" khyo khyo" lo" re Mao"So re khag' magyaug phug' genae"
khag' re: yao: re akyu" mamho' genae".
5 Nao ta" rumae ni" nho: makhyang: mashab: ru de: de: myao: thug' jo; ra".
Nao wa shab shab za; ta" ra" dao: kheim: jham: yang nghoe' pye' nae" seim" na: ra".
6 Ngoyang nao re qobo zhaug' maca"
naoyao: jhau: ke' ra" dao: kheim: khao: ngo" yang nao yao: dao: phyid' yu: ava".
7 Nao wa sao qhid' khau: qhid: ra" byu ngad ein: myid: i? Mao"So yang bam jham re kad' to" au: re aimae nao na: i?
8 Mao"So yaung: to" rure nao bothe' gyo" i?
Xao su byu: pha,jhi" wa nao za: qo" i?
9 Ngonhaung" maba: rure nao: yang ba: ga" ru pe" daja: re: majo,-
10 Ngonhaung" wa- ni" pho" makhau shi:mae" na mo, ngad mung:-
Ngonhaung" pha,jhi" re apyad qi: au: phyu mo, mae" mho" zhao: yu: va".
11 Mao"So wa nao re yaug yo za: na nae" akhang" byid' ava". Nao pe"mung: ngag: ha: na shi" i?
Ngonhaung" wa yao" qhid' mae" dao: yo dao: myan khyo" ta" va".
12 Ngadqere: nao wa nhag' lam: zhau mung: ngonhaung" re nhag' yo" ru we' zhaug' qu" ra".
13 Nao wa Mao"So re nhag' yo: mung: yao: re ta" phoe: ra".
14 Byu dayaug wa dang dang yao: qo" gyang" yaung" nae" laug i?
Byu dayaug wa Mao"So we' dakhyo: qo" dangman" nae" i?
15 Mao"So wa yao" mug: lagyo: jham re lhao" malam ngad: ra".
Yao: bam yao" qhid' kheim: mae matho' gyang" yaung" ngad: ako".
16 Aimung: byu wa makhyang: mashab: rure qid we' dakhyo: shaug' na: ra".
Ngad: ra"- byu wa- byo; qeim: ra". Byu wa pe" aphug' yao: made, ngad: ra".
17 Yoba we"- ana" ngo ba: ra" ja: re tae" gyo: wa,-
18 Pha,jhi" bo mo; yang ngore yao: bam: phug' pho" qemae" mho" yu: ra" dangman" ru jham re ngore mho" shid' avako".
Aimung: yao: bam wa pe" re: manghoe' nyham" to: ngad: ako".
19 Yao: bam: mug: mae taungbug: byumyu" mana ngad: ako".
Yao: bam re Mao"So mae" va: khyo jhui" phao: lo" nae" byu mana.
20 Gaje qere deim" zag zo" ra" makhyang: mashab yaug wa
yao: adaui: na na mae dayin dayo: kham zo" na: li" nae".
21 Gyaug: din yang: gyi: hug' thoe jham wa yao" notang: mae hug' myang thoe gyo" li" nae".
Aimung: yao: gug:gam: na: ga: myid: lam: na: au: re damya, jham yao: re khe' zin" li" genae".
22 Yao: wa mug: cad' mae" phao: loe, nae" khyo maqo" ngad: ra".
Pe"mung:ga"re- dajo, qo qo mae yao: re se' pye' nae" shae dakhyae: wa lao" na: ra".
23 Nangda jham wa yao" shid mao re zo: nae" ga: lao" na: ako".
Yao" nho: joe" lo nae" ayo, wa mug: cad' cad' jo; rure yao: ba: ra".
24 Kyi" khyag' ru wa- kheim: so' qi" ra" kho:kham we' dakhyo:
yao: re khe' zin: nae" ga: lao" na: ra".
25 Airu wa-
Mao"So re lo, zhab' qhu" mung: qam: so' bo: thao" yaug re
maphug' makhyad' jung" yaug: au: pa lo, kyo' ngad: ra".
26-27 Aiyaug wa ngad beim: mung: tau: lhan: myid bo: ra".
Yao: wa sang: dang taung" yao" go re zaui" ci mung:-
Mao"So re khe' zin: nae" ga: phin" ce' tao" ye" ra".
28 Aiyaug wa vomo" jham re lhad' sang: yu mung:
yham sang qe phao cug' to: ko" ra" yham jham re sang: yu: ako".
Ngadqere: gye poe wa- ai: vomo" jham we' yham jham re phyo' qheim" pye' li" nae".
29 Yao: wa myao" sho' jo,nho" qo" na nae" mangad:-
yao: sang: to" ru pe" re: myao" sho' madang: jo, nae".
Yao" nho: bao qab lhao" re: myao" sho' madang: jo, nae".
30 Aimung: yao: wa mug: cad' rumae" maqo" phao: loe, nae".
Yao: wa- myi" yang sag' kaung jham nga" pye' mung:
la: yang abu" jham hug' tao" lo" byaug ra" sag' gae we' dakhyo: dau: ra".
31 Yao: wa nhag' magyang: yang: makhyang: mashab: rure lam mung: khug: ngha: ngad: re
makhyang: mashab: ru wa yao" aphug' jhaung qhu" ngad: li" nae".
32 Yao: wa yao" ayo, madau shire jhoe' sham: byaug: li" nae".
Sag' kaung dakaung we' dakhyo: jhoe' sham: byaug mung: khonhae" re: madam: nyug yaung" lo nae".
33 Yao: wa- maqao" shi" ra" sabyi shi: jham shu: gyo" byaug: ra" sabyi naui ru:-
Abu" jham shu: gyo" byaug: ra" zhanlun gae ru: ngad: li" nae".
34 Mao"So re malam mo, wa myid:zo: maqo" nae".
Aimung: khug vag: ngaui: yang zhaug' to" ra" yham jham re myi" yang nga" pye' li" nae".
35 Qug: khai: re kyae: to: mung: makhyang: mashab: rure kad' na: ra" byu daqhae: na: ako".
Yao: bam: nhag' lam: wa khonhae" re: mhug' pyag' ru byang" jo; ako".