14
1 Ngonhaung" alhab' wa qam: nang" ru we' khau: li" mung: pe" maqo" kad' masho: majhin ngad:-
Aimung: dakhyo: za: lang" ra" kao so' li" daui: na: bam:-
2 Ngonhaung" wa bin: jham we' dakhyo: phyad phyad yaug mung: sham: lo" bam va".
Ngonhaung" wa bao qab we' dakhyo: lai: lo" ra".
3 Mao"So we" nao ngore qu" khalhao" qu" mung:
mangad: lao" tarha" yung" mae yung" gau" mung: ngo re dao: kho' nae" i?
4 Byu ru"ru magyang" yaung" yaug mae" gyang" yaung" ru
daja: re: malhaung" gai: thug' li" ngad: ra".
5 Yao" nho: kao so' khoqhang" ngad nae" rure no' mae" ka" phyid' to: byid: gau ngad: ra".
Yao: lho" khonho" khye' na nae" rure tau" to: gau: ngad: ra".
Nao wa aire dang: to: va" rumung: magai: lhai" pye' nae".
6 Yao: bam mae" va: khyo qu" ke' mung: yao: re za: nha: to: wa,-
Gai: boe" re yao: bam qug: khai: apyad mae pyo: pyo: na vashao:-
7 Thau: khyang: pye' va" sag' gae: qhid' mae" myid: lao" nae" jo; ashi"-
Aiwa dam: daui: li" mung: anyaug dam: gai: tad' li" ra".
8 Ai: sag' gyi: mao" qeim" byaug mung:
ai: sag' pan wa myidgaung mae shid: jo, qere:-
9 Airu wa qid: yang sag' zo: gae re we' dakhyo: anyaug dam: gai: tad' li" nhao: ra".
10 Ngadqere: byu dayaug shid: lo" re aiwa yao" qhid' mae" athao" ngad: ava".
Yao: wa shid: lo" mung: khai: mae lo" na: i?
11 Yug: thang: lo" ra" qid gyaung: we' dakhyo:
kyaug' ho: byaug: ra" qid tham: we' dakhyo:-
12 Byu jham shid: lo" mung: khonhae" re: madam: to" lo:ngad: ako".
Mug:gaung agang" tang: jo; jo; mae wa yao: bam madam: so" li" lo: genae".
Yao: bam yab: jo; rure khonhae" re: lhau: zhung" to" ke' ru maqhug' genae".
13 Nao: yang ngore movo: mug: mae qo" nyham" to" qa: we"-
ni" nhag' yo: gyo" sho' ngore qo" nyham" to" qa: we"-
Ai: thao ngore dam: myid: beim: nae" ayo, re qo" so" to" qa: we" ein: lhaung" taung" myid:-
14 Byu dayaug shid: lo" re- yao: wa qo" dam: gai: daui: li" nae" i?
Ngadqere: ngo wa je: gai: ra" ayo, re lao" na nae"
ce: qug: khai: ayo, lai: lo" sho' lao" na nae"-
15 Ailao" nao ngore yao mung: ngo tau: nae"-
Aimung: nao wa nao: yang phan" to" ra" ngore myid: ngaui bau: nhag' dag: li" nae".
16 Ailao" nao wa nga" khyid bye khao: ngo" re lhaug' qu" ngadqere:-
nga" qobo jham re nao macao" qu" qin" lo nae".
17 Nao wa ai: qobo jham re khyad' pye' byid: mung: shalhaui" pye' byid" li" nae".
Nao wa ngo kad' shad' lo: ru alhab' re jhad' za: sad' pye' li" nae".
18 Bam jham bad: gyo" ra" ayo, joe" lo lao"
gang" tang: ra" laug byo, jham qui" lo" ako".
19 Laug bam jham re qid: yang phad' tai: lo" li" nae".
Aimung: mug: mo" qu: ru wa myid zhai: re pyaung" khyad' lo" li" nae".
Ai we' dakhyo: nao wa byu: nho: kao so' daui: na nae" myid: lao" khyo re phyo' qheim" pye' ra".
20 Nao wa byu tho' qam: je: qi: mung: yao: re apyad ato mae khe' pye' ra".
Yao" nho: myo,khung: wa shid: rumae nyhaung: jhoe' lo" ra".
21 Yao" yauggai zo: qe wa nga: lho" gengadqere: yao: wa aire khonhae" re: maba-
yao: bam khonhae" nga: yeim phau" zo" au: rere: yao: re khag' yang mata" kyo:-
22 Yao: wa yao" gaung mae no: rure za: ba mung: yao" nhag' lam: mae kaug' rure za: aba: ra".