YOBA
(JOB)
Dao: Phung"
Yoba mugsug' wa bin sho' kyi" khyag' qhug' ra" byu dayaug: khyo ngad: ra". Yao: wa yao: zo: alhab' we' jo,nho" alhab' ciphyaug' pye' mung: ca' pho: dae jad: no de, zo" ra". Ai: thao mugsug' tung" yaug wa- Yoba nho: ba nam qe we' Yoba yao: yao:- yao: mae airu: leim zo" ra" qug: khai: kyi" khyag' rure khoru: tug' phaug' rure dao: zham" sam lam: khyo" qhu" byid' ra". Lo" thao" mae xao su byu we' jho" jhau: rumae je: bobo: ra" Mao"So yao: Yoba re na: qhu" ra".
Yoba nho: ba nam qe wa yao: kham zo" ra" qug: khai: re thung" li re cao" ra" lalam lakhug: dao: jham re ci mung: sho' kyo" ako". Mao"So wa khonhae" re: gai: rure aphug' jhaung qhu" byid: mung: makhyang: mashab: rure qobo dae byid' ra" ruyang Yoba ana" qug: khai dayin dayo: kham zo" na: ru wa yao: shad' lhoe" va" ra" qobo jham: mathao mae ngad: ra" ga: yao: bam myid: jho: ako". Ngadqere: ceru wa Yoba qhid' mae" saung" laui saung" po" ra" dao: phyid ngad: ra". Pe"mung:ga"re Yoba wa gakai: lai sho' gai yaug ngad mung: gyai din:man: yaug ngad: ruyang yao: aiqhi" xo: ra" qug: khai: leim zo: nae" maman: qi" ngad: ra". Yao: ru" yaug re airu: boe" rure Yoba matho' ba: gyo: mung: Mao"So re qobo zhaug' ra" khyo" mazag mavae myo, byo; lhaung: ra". Yoba wa yao" lam khug: myid maciphyaug' pye' ngadqere: boe" lo: rure Mao"So: qhid' kheim: mae sho' kyo: nae" qhid' mae" we' byugai dayaug khyo" nga: dam: qo" nae" myid: lao" ra".
Mao"So wa Yoba nho: dao: myid: jham re dao: phyid mabyid: ngadqere:- dao: zham" we' pha,jhi" dao: khyo" yang Yoba nho: lam khug: myid re aung: nghoe' pye' ra" khyo" phaug' tau: byid' ra". Ailao" Yoba wa nyham: khyo" mung: Mao"So re pha,jhi" bo: ru we' qi" qhang: ra" ga: aso: so" xam" yu: ra". Aimung: yao: nhag' yo: dao: jhau: pye' rure shad' va"- ga: lhang: yu: ra".
Dao: myan dao: yo khyo" ce: mugsug' pin" rumae Yoba re sao qhid' yao: na: dai: ra" tho' lhao" je yang: dam: qo" nhao: ra" khyo tung" to" ra". Yoba kham zo" ra" dayin dayo: qug: khai: re yao" ba nam qe maba: gyo: ko" rure Mao"So: yang qeim: ra". Mao"So wa lalam lakhug: thung" li tho' je: qi" qhang: rure Yoba za: the' myid: beim: so" ra".
1
Yoba Re Satan Yang Jham" Qu" Ra" Khyo
1 Uza mug: mae Mao"So re caung:pa" mung: yao: re jhaug' zaug taung" na: ra" Yoba mang: ru dayaug na: ra". Yao: wa byugai ngad mung: makhyang: mashab: mau" pe" re: makad' sho' lha" yang na: ra".
2 Yao: wa yauggai zo: nhad' yaug we' myiqe: zo: sam yaug qo" ra".
3 Aimung: yao nhad' taung- gola:u sam taung- nung: dataung we' loze ngo" yo dau: qo" ra". Yao: wa daui daui okaung re: myo: sho' qo" mung: ba thug' shad' mung" mae alhab' tho' jo,nho" qo" thao" yaug ngad: ra".
4 Yoba nho: yauggai zo: qe wa dayaug dalhang poe kad' mung: mao:nhaung: gayaug qere: li" boleim: ko" ru we' yao: nhae: mo" sam zo: re lhaung" bokhai: ako".
5 Poe kad' bin khao: ngo" thao: ba ne,kao Yoba wa no' mae" yab so: to" mung: yao: zo: qe yaug khao: ngo" re kyang" san byid: nae" qhid' mae" xeim: lhaung" ngaui" byid' ra". Yao: khonhae" re: ceru: pe"mung: lhaung" kad' ga" re yao: zo: qemae" dayaug yaug qe thaug makad' lo: Mao"So re maphug' makhyad' ra" khyo" qobo shad' genae" laug ga: myid: yang: ngad: ra".
6 Mug:gaung mae na mo, Asang jhao" li" na: qhu" nae" ayo, joe" lo lao" yao: bam: phaung gaung: mae Satan re: ye: bona: jo; ra".
7 Asang wa yao: re- Nao pe" lhaung" kad' qin" i? ga: myid' ra". Satan wa- ngo wa cekhyo thoekhyo du" qin" mung: mug:myid kam" qin" ga: tau" ra".
8 Asang wa- Nga" daui daui yaug Yoba re qhug' myao: i? ga: myid' ra". Mug: myid dao mae yao: qhi" jhaug' zaug mung: gai ru dayaug re: mana. Yao: wa ngore caung:pa" na mung: makhyang: mashab: ru daja: re: makad' sho' lha" na: ra"- ga: ta" ra".
9 Satan wa- Yoba wa pe" akyu" mathe' yu lo: nao re caung:pa" li" nae" i?
10 Nao wa yao: we' yao" yham byu qere khonhae" re: gug:gam byid: mung: yao: qo" sang: to" ru alhab' re gug:gam byid' ra". Yao: kad' ru ja: khao: ngo" mae nao shaman" byid: mung: damung"dan: geim" re qo" da" zho: nae" nung: jham yao: re byid' to" ava".
11 Yao: qo" ru alhab' re nao qe sham" yu: pye' byid' ngad: re- yao: wa nao re ni" myo, khung: mae yao: nhang" li" nae"- ga: ta" ra".
12 Asang wa Satan re- gai va"- yao: qo" ru ja: khao: ngo" wa ni" kheim: so' khug mae ngad: jo; ra". Ngadqere: Yoba re wa nao dae magai: te' nae" lhe"- ga: ta" ra". Aimung: Satan wa to" lo" byaug: ra".
Yoba Zoshao Qe We' Jo,nho" Phyo' Pye' Qhug' Ru
13 Daba: ba na mae Yoba nho: yao: zo: qe wa yao: bam: mao: mo" nho: yham mae poe kad' na ko" au: re-
14 Lagyo: dayaug Yoba jhao" tao" li" ra". Yao: wa- ngonhaung" wa- nung: lo: jham: yang yothaung: phaug' na: au: re loze jham re: avai: ayae mae" mhin: gyo, jao: jham mae na: bam: ako".
15 Sheba byu qe nyang din taung" li" khe' zin: mung: aijham alhab' re lhad' yu: pye' avako". Yao: bam wa ngo mae" je yang ni" daui daui mo, alhab' re se' pye' ako". Nao re lau dao: ta" kyo: nae" ngo dayaug za: aphao: loe; lo:- ga: ta" ra".
16 Yao" dao: thao mazo, shire daui daui okaung dayaug dam: joe" lo mung:- yao jham we' yao zam: mo, alhab' re mug: geim: se' pye' va". Nao re lau dao: lota" kyo: nae" ngo dayaug za: aphao: loe; lo:- ga: ta" ra".
17 Yao" dao: thao mazo, shire daui daui: ru gatau dayaug dam: joe" lo mung:- Khalde byu sam phung: ngonhaung" re li" khe' zin: mung:- gola:u jham re lhad' yu: pye' byid' ako". Ngo mae" lai yang: ni" daui daui okaung geje alhab' rere: se' pye' ako". Nao re lau dao: lota" kyo: nae" ngo dayaug za: aphao: loe; lo:- ga: ta" ra".
18 Yao" dao: thao mazo, shire daui daui okaung gatau dayaug dam: joe" lo mung:- ni" zo: bam wa yao: bam: mao: mo" nho: yham mae poe kad' na ko" au: re-
19 Din" pyad' yo khyo" thin ra" aug' la hug' lo: ra". Ai: la qam" yang yham re lahug' khyoe' pye' mung: yao: bam alhab' mo; re nhai" se' pye' ava". Nao re lau dao: lota" kyo: nae" ngo dayaug za: aphao: loe; lo:- ga: ta" ra".
20 Ailao" Yoba wa to" ye; li" mung: yao" mai bau: re lao" cad' pye' ru we' kaug' ngug: na: ra". Yao: wa au: myhaug' pye' mung: myidgaung mae lamhaung: lagoe, goe; jo; ra".
21 Yao: wa- ngo pe" maci lo: khau: li" mung: pe" maci lo: shid: lo" nae". Asang: yang byid' ra"- ana" yao: dam: yu: pye' byid' ra". Yao" mang a re caung:khin" byid: vageshao: wo"- ga: ta" ra".
22 Yoba wa boe" lo: ru ja: khao: ngo" qhug' qere: Mao"So re qobo vhin: ra" khyo" qobo mashad' ngad: ra".