51
Yerusalem Re Nhag' Tang" Byid' Ra" Dao:
1 Asang wa-
Khyad' yu qhug' nug mo,-
bao" thaug' ru mho' nae" joe" li" mo, naonhaung" we"- ngore tae" gyo: gela,.
Naonhaung" thug' li" ra" laug baui- naonhaung" re dau" thug' yu: ra" laug khung: re myid: beim: ge,.
2 Naonhaung" nho: phug' pho" Abraham naonhaung" re khau: ke' ra" Sara re myid: beim: ge,.
Abraham re ngo khai: au:- yao: wa bug daung: ngad: ra".
Ngadqere: ngo wa yao: re shaman" byid: mung: yao: re zo: dau byid: va".
Ngo wa yao" myid:zo: qere myo" laug nhao va".
3 Ngo wa Yerusalem re nhag' khyag' myid qhu" byid: mung:
yao" byo; qeim: jo; rumae na ko" ra" mo, alhab' re nhag' khyag' myid qhu" byid: nae".
Yao" mung"dan: wa din"pyad' yo ngad sho' ngadqere:
ngo wa aire Edin: mae ngo qho" to" ra" khyae we' dakhyo: khyae kad' pye' nae".
Ngaui bau: ngaui lho" ru wa aimae jo; li" nae".
Caung: khin" nghaui" caung: jham we' ngore jeju so" ru aimae jo; li" nae".
4 Nga" byu qe we"- nga" dao: re tae" gyo: gela,-
ngo ta" rure tae" gyo: ge,.
Ngo wa byumyu" qere nga" mho" shid' khyo byid: va".
Nga" tarha" jham wa yao: bam re bo" bao byid' li" nae".
5 Ngo wa phyad za: joe" li" mung: yao: bam re khyad' yu nae".
Nga" aung doe; ru wa jhao" li" ava". Byumyu" qe: dao mae ngo yao: eib nae".
Va" ra" mung"dan: jham wa ngo joe" li" nae" rure lao" na: ako".
Yao: bam re khyad' yu nae" myid: lao" yang: ngore yao: bam lao" na: ako".
6 Mug: khaung khyo qu" ke' ge,- myid gaung re qu" ge,-
mug: khaung wa myikhug' we' dakhyo: baui" byaug: li" nae".
Myid gaung wa mai bau: xug' we' dakhyo: qeim" lo" byaug nae".
Yao" nho: byu qe wa yao khaung: jham we' dakhyo: shid: lo" li" genae".
Ngadqere: ngo cili" ra" khyad' yu: ru wa apyad ato mae dang: jo; li" nae".
Nga" aung doe; ru wa lo" thao" mae ngad: li" nae".
7 Jo: rure ba: ra" mo, nga" mho" shid' khyo re
naonhaung" nhag' lam: khug mae ke' to: va" mo, naonhaung" we"- ngore tae" gyo: gela,-
Byu qe jung" mung: roe" ko" au:- dagyaug ge,.
8 Yao: bam wa nhug: yang zo" pye' ra" mai bau: we' dakhyo: man: byaug: li" genae".
Ngadqere: ngo cili" ra" khyad' yu: ru wa apyad ato mae dang: jo; li" nae".
Nga" aung doe; ru wa ayo, byang" dang: jo; li" nae"- ga: ta" ra".
9 Asang we" so" li" ri:- amung: ngonhaung" re bao" thaug' byid: la,-
ni" qam: so' re ci yang: ngonhaung" re khyad' yu la,-
Aire qhid' phyao: ganhae" cilo: ruru: ci wa,-
panglai: mao jaung: Rahab re adau dau kad' pye' yaug wa nao ngad: ra".
10 Pang:lai:: re kin" ho: lo" nhao yaug re: nao ngad: ra".
Khyad' yu qhug' mo, qo" lai: phyid' lo" genae" qhid' mae" qid khyo" khyodang re phung" ra" yaug re: nao ngad: ava".
11 Nao: yang khyad' yu: to" ra" mo, wa Yerusalem khyo ngaui bau" ru we' nghaui"caung: mung:
bau: yang: zag: hug' zo" re" joe" lo: li" genae".
Yao: bam apyad ato mae ngaui pyo" li" genae".
Apyad ato mae nhag' kaug' ru we'- kaug' ngug: rumae" apyad ato loe; beim: li" genae".
12 Asang wa-
nao re qam: bo nhao yaug wa ngo ngad:-
Myo, gae tho' mae je sho' maqo" kham: ra" shid ba: ra" byu re pe"mung: gyaug ang: i?
13 Nao re phan" to: yaug- mug: khaung re phyid: nghoe' to: yaug-
myid gaung: nho: apan aqao: re zao: to: yaug Asang re nao to" myhid' pye' va" i?
Nao re zag zo: mo; nho: nhag' jam: yo" ru-
nao re phyo' qheim" pye' nae" jin" jin" ngad mo, re
abang mabyid nao pe"mung: gyaug: na nae" ang: i?
Yao: bam: nhag' jam: yo" ru wa nao re maqo" tin: lo nae".
14 Thaung: byu qe wa mamyao" re lhoe' ke' ru qhug' li" genae".
Yao: bam kao qhang sho' daui: na: li" genae".
Amung: yao: bam qo ca" ra" zo:ve alhab' qo" li" genae".
15 Ngo wa naonhaung" Mao"So Asang ngad:-
panglai: re ngo lhau: zhung" ke' ra".
Ainho: bang: lhung" re myang nhao: ke' ra".
Nga" mang wa qam: bo: ra" Asang ngad:-
16 Mug: khaung re ngo phyid: nghoe' ke'-
amung: myid gaung: nho: apan aqao: re zao: to"-
Ngo wa Yerusalem re nao wa nga" byumyu" ngad: ra".
Nga" mho" shid' khyo ngo nao re byid' to: va".
Amung: nga" lo; yang ngo nao re gug: gam byid' ra"- ga: ta" ra".
Jamjau Kham Zo" Ru Thao" Lo" Ra" Khyo
17 Yerusalem we"- so" li" ri: naoyao" gaung re nhug' mung: to" wa,-
nao re shaug' nae" byid' ra" Asang yao" nhag' yo" ra" qobo dae keim re nao shaug' ava".
Nao aire shaug' khyo" pye' mung: ai wa nao re apyi avhang: lang" be; lhau nhao: ra".
18 Nao re jhui: nae" khag' mana-
ni" byumyu" qe: phaung mae nao re lo; yang jhui" she nae" khag' mana.
19 Kyi" khyag' qug: khai: shid' zhao" ni" dao mae gyo" zao" ava".
Ni" mung"dan: wa gyekhe' poe: yang cae: jhug tag boe" byaug: ava".
Amung: ni" byu qe wa moe' kyaug' byaug: avako".
Nao re shono myid qhu" byid: nae" byu khag' mana.
20 Hau" mo" khyo khe' khao: ngo" nho: khyo jheim mae
ni" byu qe wa qam: nang: yang: gyang: lang" lo" ako".
Yao: bam wa sho: kung" yaug: nho: geim mae myi" ra" shocid we' dakhyo: ngad: ako".
Yao: bam wa Mao"So: nhag' yo" ra" qam: so' re kham zo" avako".
21 Dayin dayo: qug: khai: kham zo" na ko" ra" Yerusalem byu qe
naonhaung" yhid yid mo, we' dakhyo: apyi avhang: lang" be; lhau mo, naonhaung" we"-
22 Ni" Mao"So Asang wa nao re gye vha byid: mung:-
ngo nhag' yo: yang: nao re byid' to" ra" keim re ngo yu: pye' na: ra".
Nao re apyi avhang: boe" nhao: ra" sabyi qang: re nao mashaug' ca" lo nae".
23 Ngo wa aire- naonhaung" re zag zo: mo,-
hau" mo" khyo mae naonhaung" re lang" jo,nhao mo,-
naonhaung" re badan re" ru: zab: nhe" pye' mo, re ngo byid: nae"- ga: ta" ra".