50
1 Asang ta" ra"-
yao" yham sang myhi" re kao" pye' ra" yauggai we' dakhyo: ngo wa nga" byu qere nhao: ke' nae" ngad: ein: naonhaung" jho ko" i?
Aire kao: mugsug' khomae ngad: i?
Jeim khyo" yao" zoshao qere aung: zo" pye' ra" byu dayaug we' dakhyo:
ngo wa nao re thaung laung" nae" khyo aung: zo" pye' ra" ein: jho: i?
Mangad:- nao kyam: byu khyo" cao" lo" ru wa naoyao" qobo mathao mae ngad: ra".
Nao nhao: ke' qhug' ru wa ni" yug: mau" mathao mae ngad: ra".
Ni" myhi" kao" pye' qhug' ru wa ni" qobo yug: yang ngad: ra".
2 Ngo yao: bam re khyad' yu nae" yao: bam jhao" ye" au:-
nga" byu qe wa aire pe"mung: maphaug' tau: lo: kad' ko" ra" i?
Ngo yang yao: bam re khai: au: yao: bam pe"mung: matau: ko" ra" i?
Ngo wa yao: bam re khyad' yu nae" qam: saung" nang: yaug ngad: i?
Qid maqo" yang: aimae na ko" ra" ngo: jham shid nae" qhid' mae" ngo wa amyin" dao" yang panglai: re qo" kin" ho: lo" nhao mung:
qid gyaung: re din"pyad' yo qo" kad' pye' ra".
3 Ngo wa su shid re kaug' ngug: ru we' dakhyo: mug:gaung re qo" cad' no; lo" nhao: ra".
Asang: Nho: Daui Daui Yaug: Nho: Mho Dao: Gyo" Ra" Khyo
4 Dug myaung: mo, re ngo qam: qo" byid: nae" qhid' mae" Asang kho:kham wa
ngo khoru: ta" nae" rure ngore mho" shid' ava".
Ne, seim khao: ngo" yao: ngore mho" shid' nae" rure gyo: nug kao bau myid ke' byid' ra".
5 Asang wa ngore ba: gyo" ra" myid byid' to: mung: ngo geim lau mato"-
yao: mae" re: ngo maphaug' lo".
6 Ngo re be; ra" mo, re nga" dao gaung: cin re ngo khae byid'-
yao: bam ngore roe" ko" au: ngo yao: bam re matam" pye'.
Nga" nhad' maui: re yao: bam phan" ko" au: we'
nga" myo, khung: re khota: phoe" sheim: ko" au: ngo yao: bam re matam" pye'.
7 Ngadqere: Asang kho:kham: yang ngore bao" thaug' byid' ruyang
yao: bam roe" ru wa ngore dae maqo" te' ngad: ra".
Ngo aijham re qo" zang: qhao" nae" ngo yao" gaung re ngo phin" ci: ra"
ngo nga: mayeim nae" rure ngo ba:-
8 Pe"mung:ga"re Mao"So wa ajhao" mae na mung:
ngo pe" qobo maqo" ra" khyo re yao: sagse: qhu" byid' li" nae".
Ngo re gye kad' yaug: qobo khag' qo" zhaug' i?
tarha" yung" khyo daga" ye: gelang:-
Yao" nho: qobo zhaug' ra" khyo jham yao: re cili" nhao ge,.
9 Asang kho:kham yao: yao: ngo re gye vha byid' ra".
Aire ngore qobo qo" ra" ga: khoyaug sagse: qo" qhu" i?
Ngo re qobo zhaug' mo, alhab' baui" byaug: li" genae".
Yao: bam wa nhug: yang zo" pye' ra" mai bau: we' dakhyo: man" byaug li" genae".
10 Asang re nga: yhe' byid: ko" ra" mo, alhab' we' yao" daui daui yaug: mho dao: re tae" gyo: mo, we"-
Naonhaung" su" ra" khyodang wa gaigai: cad' re cad' jo, nae".
Ngadqere: Asang re lam khug mung: naonhaung" Mao"So re ngha ge,.
11 Su gaje qere phyo' qheim" pye' nae" gye khug' kad' mo, naonhaung" alhab' wa
naonhaung" yao" gye khug' kad' ra" mau" yang yao: phyo' qheim" pye' ru qhug' li" genae".
Asang yao: yao: ceru re boe" nhao: li" nae".
Naonhaung" wa nhag' lam: mamyan: makhyad' dayin dayo: qug: khai: kham zo" li" genae".