43
Khyad' Yu Nae" Mao"So Dao:so: To" Ru
1 Israel we"- nao re phan" to" ra" Asang wa
dagyaug wa,- ngo nao re khyad' yu nae".
Ngo wa nao re mang lao: yang: khai: to: va"- nao wa nga" mae" ngad:-
2 Nao qid no, khyo" su" lai: lo" au: ngo nao we' daga" ngad nae".
Ni" nho: qug: khai: wa nao re ma aung: pye' nae".
Nao myi: khyo" su" lai: lo" au: nao manga" nae".
Thin: ra" jham" qu" ru joe" lo: re ai wa nao re dae mate' nae".
3 Pe"mung:ga"re ngo wa ni" Mao"So Asang nao re khyad' yu yaug Israel nho: gyang" lho" Mao"So ngad:- nao re lhoe' ke' byid: nae" qhid' mae" ngo wa Egutu re byid' pye' nae". Ngo wa Ethiopia we' Seba re byid' pye' nae".
4 Ni" kao so' re khyad' yu nae" qhid' mae" ngo wa byumyu" qe alhab' geim" re byid' pye' nae".
Pe"mung:ga"re nao wa nga" qhid' mae" phug' de; ra".
Pe"mung:ga"re ngo nao re jhid'de; mung: nga: ye; ru byid: nae".
5 Dagyaug wa,- ngo nao we' daga" na va" ra"
ba thug' shad' mae" we' va" thao" ra" ba vao shad' mae"
ngo wa ni" byu qere yham khyo jhui" lo nae".
6 Ngo wa mug: am re ai bam re nhao: ke' wa, ein: ta" mung:
mug: thao re ai bam re- matam" to: nae" ngo ta" nae".
Nga" byu qere va" ra" mung"dan: jham mae" we' mug: myid khyi" khao: ngo" mae" tug' lo nhao nae".
7 Yao: bam wa nga" byu qe ngad:- nga" phungbao re bao nhao nae"
ngo yao: bam re phan" to" ru ngad:- ga: ta" ra".
Israel Wa Asang: Sag Se: Ngad:
8 Mao"So wa nga" byu qere tarha" yung" khyo zhang" yu wa,-
Yao: bam myo, jid' de, gengadqere: yao: bam myo, jid ngad: ako".
Yao: bam nokhye' de, gengadqere: yao: bam nojid ngad: ako".
9 Tarha" ca: qu" nae" qhid' mae" byumyu" qere zhang: wa,.
Yao: bam: so jham mae" khoyaug lam: joe" lo nae" ayo, khyo re lapa qo" pa: i?
Aibam mae" khoyaug lam: ana" boe" na: rure lapa qo" pa: ta" ra" i?
Yao: bam jo: rure sagse: qhu" byid: nae" we'
yao: bam: dao: dangman" rure sagse: qhu" byid: nae" qhid' mae"
ce: so jham re yao: bam yao" sagse: qere jhui" li" nhao ge,.
10 Israel byu qe we"- naonhaung" wa nga" sagse: ngad: ako".
Nao ngore ba mung: lam" nae" we'- ngo dayaug za: Mao"So ngad: rure ba: gyo: nae" qhid' mae"
nga" daui daui yaug boe" nae" ngo nao re khyin: to" ru ngad:-
Ngo mae" je yang: so gatau mana- khonhae" re: mana: qu" khonhae" re: na nae" mangad:-
11 Ngo dayaug za: Asang ngad:-
Nao re qo" khyad' yu yaug ngo dayaug za: ngad:-
12 Pe" boe" nae" khyo re ngo lapa pa mung: nao re ngo bao" thaug' byid' ra".
Taung bug so khoja: re: cere khonhae" makad' qu" ngad: ako".
Naonhaung" wa nga" sagse: ngad: ra".
13 Ngo wa Mao"So ngad mung: khonhae" re: ngad: jo, nae".
Nga" qam: so' lo, mae" khag' dayaug re: maqo" phao: loe, ngad: ra".
Ngo kad' rure khag' re: maqo" tha" pye' ngad: ra"- ga: ta" ra".
Babelon Mae" Phao: Loe; Ru
14 Israel nho: gyang" lho" Mao"So- nao re khyad' yu: ra" yaug Asang wa-
nao re khyad' yu nae" qhid' mae" Babelon re gye kad' nae" gyetab datab ngo nhao: ke' nae".
Ngo wa vogaung: kham: jham re phyo' khyo" pye' nae".
Ai mae na: ra" byu qe: hug' thoe re gyi: ngug thoe boe" lo" nhao nae".
15 Ngo wa Asang ni" nho: gyang" lho" Mao"So ngad: Israel we"-
Ngo wa nao re phan" to: yaug ngad mung: ngo wa ni" kho:kham ngad:- ga: ta" ra".
16 Ganhae"- Asang wa panglai: khyo" lai: phyid' lo" ra" khyodang kad' ra".
Qid lhang" jham khyo" kho' lai: lo" ra" khyodang kad' ra".
17 Yao: wa phyo' pye' nae" qam: bo: ra"
gyetab gyekhe' myao: lhin" jham we' myao: jham re jhui" au: she: ra".
Yao: bam gyang: gyo" lo" byaug mung: khonhae" re: mato" ngad: ako".
Myikaug' myishae re we' dakhyo: mad: se' pye' ra".
18 Ngadqere: Asang wa-
lai: lo" ra" ayo, mae boe" ra" khyo jham mae nhag' dataui: ge,.
Ganhae"- boe" lai: lo va" akhyo dao mae ngha yang: dana ge,.
19 Ngo kad' nae" ngad: ra" mau" asag' re qu" ge,- boe" li" na: ava".
Naonhaung" aire ana" qo" myao: avako".
Ngo wa din"pyad' yo khyo" kho' lai: lo" ra" khyodang re kad' nae".
Aimae ngo naonhaung" re qid zo: gyaung: jham yug byid: nae".
20 Ngo khyin: yu: to" ra" byumyu" re qid byid: nae" din"pyad' yo mae
ngoyang qid gyaung: jham re yug nhao lao"-
seyo: gug'nyhug' lhe: jham lhao" re: ngore nga: yhe' li" genae".
Zag ne jham we' ngho' gola:u jham wa ngore caung:khin" li" genae".
21 Yao: bam wa ngoyao" qhid' mae" kad' to" ra" nga" byu qe ngad: ako".
Yao: bam wa ngore Nghaui"caung: khin" li" genae".
Israel Nho: Qobo
22 Asang wa-
Ngadqere: Israel we"- nao wa ngore phoe: pye' mung:
nao ngore macaung:pa" ngad: ra".
23 Nao wa ngore ni" nho: phad' ngaui" xeim: yao maci li" ngad: ra".
Ni" ngaui" xeim" yang ngore nao nga: mayhe' byid: ngad: ra".
Ngo wa nao re ngaui" xeim: byid: nae" mho' yang: qola: mavin nhao
sheim nae pyo: ja: mho' yang: nao re ngo mamyaung: nhao.
24 Nga" qhid' mae" nao sheim nae pyo: xau mavai byid:-
ni" nho: gug'nyhug' jham: nho: xau: yang re: ngore nhag' madag nhao.
Ai: atha" ni" qobo jham: yang ngore qola: nhao: ra".
Nao shad' lhoe" ra" shad' ra" mau" jham: yang ngore dug myaung: nhao: lo: ra".
25 Ngadqere: ngo wa ni" qobo jham re khyad' byid' ra" yaug Mao"So ngad:-
Ngo ga" yaug ngad: ruyang ceru re ngo kad' ra".
Ngo wa ni" qobo jham re xam" to: byid nae" mangad:.
26 Tarha" yung" khyo ye: gelang:- naonhaung" qobo zhaug' ra" khyo re cili" geri:-
naonhaung" jo: ra" shad' mae ngad: rure sagse: qhu" byid: nae" naonhaung" mau" si: re kai" qhu" ge,.
27 Qhid' phyao: mae" naonhaung" phug' pho" qe qobo shad' lo: ako".
Naonhaung" nho: au: jhaung qe wa ngore gye kad' yang: qobo shad' lhoe" ako".
28 Naonhaung" nho: zug: qe wa nga" gyang" lho" jo, qo re masan masin" kad' pye' ako".
Airumung: ngo wa Israel dao mae byo; qeim: ru boe" nhao mung:-
Ngo wa ngoyao" byumyu" re maphug' makhyad' roe" ru qhug' nhao nae"- ga: ta" ra".