42
Asang: Nho: Daui Daui Yaug
1 Asang wa-
Ngo yang qam: bo nhao yaug ngad: ra"- ngoyang khyin: yu: to: mung:
ngoyang o ngaui yaug nga" daui daui yaug cemae ngad: ra".
Ngo wa yao: re nga" byo we' pyang" to: byid: va".
Amung: yao: wa byumyu" khao: ngo" re tarha" din nyang: ru cili" byid' li" nae".
2 Yao: wa hug' re: mahug'- thoe re: mato' nae".
Hau" mo" khyo jham mae thoe qi: we' re: majhau nae".
3 Yao: wa nghaug' jo; ra" qid phaung: yao: re makhyug' pye' nae".
Kyi kyi mung: za: de; ra" myikaug' rere: mase' pye' nae".
Yao: wa alhab' mo, re mabaui mabyo; tarha" din nyang: ru cili" byid' li" nae".
4 Yao: wa myid: lao" ru malaui: nae" qam: re: magyug: nae".
Yao: wa myid gaung dao mae tarha" din: nyang: rure zao: to" li" nae"
mug: va: mae" mung"dan: jham wa yao" mho" shid' khyo re kao bau taung" lao" na: li" genae"- ga: ta" ra".
5 Mao"So wa mug: khaung re phan" mung: aire phyid: nghoe' to" ra".
Yao: wa myid gaung we' aimae na: gu: alhab' re lamyhung shaung: to" ra".
Yao: wa kao so' byid: mung: ainho: byu qe alhab' re so' ke' byid' ra".
Amung: ana" Mao"So Asang wa yao" daui daui yaug re-
6 Asang ngo wa myid gaung dao mae tarha" din:nyang: ru kad' to: va" rure qu" nae" qhid' mae" nao re khai: yu mung: qam: so' byid' to: va".
Ngo wa nao khyo" yang byu alhab' we' dao: thang" kad' nae".
Ngo wa nao khyo" yang byumyu" mung"dan: jham re bo" bao cili" byid: nae".
7 Nao wa myo, jid re myo, myao nhao: li" nae".
Mug: cad' thaung: khug mae na mo, re lhoe' ke' byid' li" nae".
8 Ngo dayaug za: ni" Mao"So Asang ngad:
gatau: so pe" daja: re: nga" phungbao mae maqo" bobo genae".
Ngo wa so alho jham re nga" caung:khin" rumae mabobo nhao nae".
9 Ngo lapa pa: to" ra" mau" jham ana" jab byang" li" ava".
Ana" ngo wa yao: bam lhao" re: maboe" li" shiko" ra" khyo asag' jham khyo naonhaung" re ta" kyo: nae"- ga: ta" ra".
Nghaui"caung: Dalam:
10 Asang re nghaui" caung: asag' we' nghaui"caung: caung: ge,.
Mug: myid alhab' we"- yao: re nghaui"caung: khin" ge,.
Pang:lai:: re gau: mo, naonhaung" we" yao: re caung:khin" ge,.
Pang:lai:: mae" gug'nyhug' alhab' we"- yao: re caung:khin" ge,.
Va" ra" mung"dan: jham we' aimae na mo, alhab' we"- Nghaui"caung: ge,.
11 Din" pyad' yo we' ainho: vogaung: jham wa Mao"So re caung:khin" vageshao:-
Keda byu qe wa yao: re caung:khin" vageshao:-
Sela vogaung: mae na mo, wa bam au: jham dao mae" ngaui" bau: yang: zag: hug' vageshao:-
12 Va" ra" mung"dan: jham mae na mo, wa
caung:khin" byid: mung: Asang re phungbao byid: vageshao:-
13 Asang wa gyekhe' sulhe: dayaug we' dakhyo: gyekhe' nae" thug' lo" ra".
Yao: wa gyekhe' poe qhid' mae" jin" jin" ngad mung: kao bau: na: ra".
Yao: wa gyekhe' thoe zag: hug' ra"- yao: wa yao" gyevo qere gye kad' ra" yao" qam: so' re qhu" byid' ra".
Yao" Byumyu" Re Bao" Thaug' Nae" Mao"So Dao:so: Byid' Ru
14 Mao"So wa-
Ngo wa ayo, myao" sho' sae za: na: jo, va".
Nga" byu qere dao: phyid ngo mabyid:-
ngadqere: ana" wa mau" zaui: nae" ayo, joe" lo: ava".
Ngo wa zo:khau: ra" myiqe: ru: zag: hug' ra".
15 Ngo wa bug gaung jham we' bam jham re phyo' qheim" pye' mung:
myo, gae we' sag' gae jham re kyaug' lo" nhao nae".
Ngo wa qid gyaung: lao: khaung: jham re din"pyad' yo kad' pye' mung:
qid tham: qid jham re kin" ho: lo" nhao nae".
16 Ngo wa nga" byumyu" myo, jid qere yao: bam khonhae" re:
masu" qu" ko" ra" khyodang jham khyo" jhui" lo" nae".
Ngo wa yao: bam: mug: cad' re bo" bao boe" nhao nae".
Seyo khyodang re yao: bam: qhid' au: mae khyojhad' boe" nhao nae".
Cejham wa nga" dao:so: jham ngad mung:
ngo wa aijham re manghung: losho' phug' cao" nae".
17 So alho jham re lam khug mo, alhab'- khyao dau sulho jham re
yao: bam: so jham ga: yao mo, wa qho' phau" ru we' nga: yeim: ru qhug' li" genae"- ga: ta" ra".
Israel Byu Qe Mazhao: Yu Ko" Ra" Khyo
18 Asang wa-
nojid: ra" nga" byu qe we"- tae" gyo: ge,-
myo, jid qe naonhaung" we"- te' te' za: qu" ge,.
19 Nga" daui daui yaug tho' myo, je: jid yaug khag' na ko" i?
Ngo nhao: ke' ra" nga" lagyo: tho' je: no: jid yaug khag' na ko" i?
20 Israel we"- nao wa myo: sho' re myao: ava".
Ngadqere: ai wa ni" qhid' mae" pe" lajheim: bo: i?
Nao wa gyo: nae" no: khye' qo" ra".
Ngadqere: gaigai: yao: nao pe" gyo: va" i? ga: ta" ra".
21 Asang wa khyad' yu nae" kao bau: ra" Mao"So ngad: ra".
Aimung: yao" tarha" jham re we' mho" shid' khyo jham re
yao: nga: yhe' mung: aijham re yao" byu qeyang nga: yhe' byid: nhao nug: ra".
22 Ngadqere: ana" yao" byu qe wa phyo' zo" pye' qhug' lo gemung:
yao: bam wa dung: gyan: mae pyid' lhaung" to: qhug' jo; ako".
Thaung: jham: khug mae nyham" to: qhug' ako".
Yao: bam wa lhad' zo" ru qhug' mung: phyo' zo" pye' qhug' ako".
Yao: bam re li" khyad' yu nae" khag' mana ngad: ra".
23 Naonhaung" mae" khoyaug cere tae" gyo: genae" i?
Ana" mae" thoegu: naonhaung" nyang" za: tae" gyo: genae" i?
24 Israel re lhad' zo: mo; lo, khyo khag' ab: pye' byid' ra" i?
Aiwa ngonhaung" yang gye kad' yaug Asang yao: yao: ngad: ra".
Yao: ngonhaung" re kao so' daui nhao nug: ra" khyo" ngonhaung" kao so' madaui-
Yao" yang ngonhaung" re byid' to" ra" mho" shid' khyo jham rere: maphug' cao"-
25 Airumung: yao: wa ngonhaung" re yao" nhag' yo" ra" qam: so' re kham zo: nhao: ra".
Gyekhe' poe nho: aqan alan mae dayin dayo: qug: khai: kham zo: nhao: ra".
Yao" nhag' jam: yo" ru wa myi: we' dakhyo:- Israel mung" geim" re nga" lo" byaug: ra".
Ngadqere: pe" boe" na: rure ngonhaung" khonhae" re: maba-
Ngonhaung" wa aimae" dajhid' re: pe" mazhao: yu.