37
Esaia Re Kho:kham Pho" Pha,Jhi" Mho' Ru
(2 Kh 19.1-7)
1 Kho:kham Hezekia wa yao: bam: lau re the' gyo: we' kaug' yang: yao" mai bau: re lao" cad' pye' yang: jid: mo" mai bau: ve, mung: Asang: Caung:pa" Yham khyo ye" lo" ra".
2 Yao: wa kho:kham kho" au: jhaung Eliakim- Kho:kham jo,nho" zam: Shebna- khinjaung mo" qere Amod nho: yauggai zo: Lapa Esaia jhao" nhao: ke' ra". Yao: bam re: jid: mo" mai bau: ve; ako".
3 Ce wa Esaia re yeta" nae" yao" yang aibam re ta" ke' ra" mungdao: ngad: ra". Aiwa ana" ba wa dayin dayo: qug: khai: kham zo" ra" ba na ngad: ra". Ngonhaung" wa qobo dae byid' ru qhug' na mung: nga: yeim: jo, va". Ngonhaung" wa zoshao khau nae" jin" jin" ngad: ra" myiqe: dayaug we' dau: ra". Ngadqere: airu: khau nae" qam: gyai nang" na: ra".
4 Asuri kho:sin" wa kao so' daui: na: ra" Mao"So re maphug' makhyad' roe" nae" qhid' mae" yao" gyezug: mo" re nhao: ke' ava". Ni" Mao"So Asang wa ai: maphug' makhyad' roe" dao: re gyo: byid: mung: airu: jhau: ra" mo, re qobo dae byid: vashao:- airumung: daui: na: ra" ngonhaung" amyu" byu qe: qhid' mae" Mao"So re akyu" mho' wa,- ga" ru ngad: ra".
5 Kho:kham Hezekia nho: mungdao: re Esaia the' gyo: lao"-
6 Yao: wa ce: mungdao: re dam: tug' pyang: ke' ra". Aiwa Mao"So wa nao re maqo" khyad' yu nae" ga: yao: bam ta" ko" ruyang Asuri byu qeyang nao re dakyaug' tin" nhao wa,- ga: nao re Asang ta" ra".
7 Asang wa kho:sin" pho" re madang: ra" lau dao: re gyo: nhao yang: yao" mung"dan: khyo yao: re dam: tug' lo" nhao: li" nae". Amung: yao: re aimae se' pye' li" nae" ga" ru ngad: ra".
Asuri Byu Qe Kyaug' Nhin" Dao: Dalhang Dam: Pyang: Ke' Ru
(2 Kh 19.8-19)
8 Asuri gyezug: pho" wa kho:sin" pho" Lakhi mae" to" lo" mung: Libna vogaung: nhae mae gyekhe' na: rure the' gyo" ra". Aimung: yao: we' byin phyo: yezin: nae" qhid' mae" ai: khyo ye" ra".
9 Egutu gyetab re Ethiopia kho:kham Tirhaka yang jhui" au: she mung: yao: bam re khe' zin: nae" qhid' mae" joe" li" na ko" ra" dao: wa Asuri byu qejhao" joe" lo" ra". Ceru re kho:sin" pho" the' gyo: lao"-
10 Nao wa nga" lo, mae magyo" vao nae" ga: nao lam khug: na: ra" Mao"So wa- nao re ta" ava". Ngadqere: ai: yang nao re damhug' pyag' nhao wa,-
11 Phyo' qheim" pye' nae" ga: yao: myid: phyid' to" ra" mung"dan: dalam: lam: re Asuri kho:sin" pho" yang pe" ru: kad' rure nao the' gyo" ava". Nao qo" phao: loe, nae" ein: jho: i?
12 Nga" phug' pho" qe wa Gozan- Haran- Rezep- vogaung: jham re phyo' qheim" pye' lo: ako". Amung: Telasa mae na ko" ra" Betheden byu qere se' tam" pye' ako". Yao: bam: so jham pe" ja" yang re: yao: bam re maqo" khyad' yu ngad: ako".
13 Hamad- Arpad- Sepharaim- Hena- Iva vomo" jham: nho: kho:kham qe wa khai: mae ngad: ako" i? ga: Yuda kho:kham Hezekia re mugsug' vhin: ke' ra".
14 Kho:kham Hezekia wa lagyo: qe: lo, mae" vhin tung" re yu: yu mung: nghe' ra". Ai: thao yao: wa Caung:pa" Yham khyo vao ye: mung: ai: vhin tung" re Asang: qhid' kheim: mae yeto" to: mung:-
15-16 Israel nho: Mao"So kherubin dao mae zaung: jo; ra" qam: bo: ra" Asang we" nao dayaug za: Mao"So ngad: mung:- mug: myid o mae" mung"dan: alhab' re eib: na yaug ngad: ra". Mug:gaung we' myid gaung re nao phan" to" ra".
17 Ana" Asang we"- ngonhaung" re gyo: byid: mung: ngonhaung" dao mae boe" na: rure qu" byid: la,- daui: na: ra" Mao"So nao re Senakherib yang nao re maphug' makhyad' ta" na: ra" dao: jham alhab' re tae" gyo: wa,.
18 Asang we"- byumyu" mung: dan: myo: sho' re Asuri kho:sin" qeyang phyo' qheim" pye' mung: yao: bam: mung"dan: jham re cae: jhug tag' kad' pye' byid' ako".
19 Amung: xao su byu: lo, yang kad' to: mung: sag' we' laug jham: nho: khyao dau alho za: ngad: ra" so jham mangad ko" ra" ai bam: so jham re ngha" pye' ko" rure ngonhaung" alhab' mo, ba: ra".
20 Ana"- ngonhaung" Mao"So Asang we"- nao dayaug za: Mao"So ngad: rure mug: myid geim" mae" byumyu" alhab' ba genae" qhid' mae" Asuri byu qe: lo, mae" ngonhaung" re khyad' yu la, wo"- ga: akyu" mho' ra".
Kho:kham Pho" Re Ta" Ra" Esaia Nho: Mungdao:
(2 Kh 19:20-37)
21 Ai: thao Esaia wa kho:kham pho" Hezekia re lau dao: kyo" ke' ra". Ai: lau dao: wa- Asang wa kho:kham pho" nho: akyu" mho' dao: re gyo: byid mung:-
22 Asang ta" ru wa Senakherib we"- Yerusalem vogaung: wa nao re qi: jung" pye' mung: nao re maphug' makhyad' kad' ava".
23 Nao re maphug' makhyad' roe" mung: jung" lo: ra" yaug wa khag' ngad: ein: jho: i? Nao wa Israel nho: gyang" lho" ra" Mao"So ngore maphug' makhyad' kad' lo: ru ngad: ra".
24 Ni" nho: myao: lhin" jham alhab' yang Lebanon bam mae" myhao: thao" ra" bam jham re aung: pye' va" khyo ngore phug: kyo: nae" qhid' mae" ni" daui daui mo, re nhao: ke' ra". Ai mae nao wa qhang: thao" ra" shaug' gae jham re we' gai: thao" ra" qhoje; gae jham re thau: lhang" pye' mung: no; thao" ra" sag' mo" yo khug khyo joe" ye" ra" khyo re nao phug: ra".
25 Taung bug mung"dan: jham mae nao qid thaung: jham dau: mung: qid khae shaug' ra" khyo- ni" gyezo: qe Nila gyaung: re zab: nhae" pye' ko" ra" khyo re nao phug: ra".
26 Cegu: alhab' re ganhae" gaco' mae" ngo yaung: to" ru ngad: rure nao khonhae" re: magyo" qu" i? Ana"- ngo aire kad' boe" thug' ke' va". Gyetab vogaung: jham re agyug: akhao: bam jham kad' pye' nae" qam: so' ngo nao re byid' to: va".
27 Ai mae na ko" ra" mo, wa qam: so' mabo ngad: ako". Yao: bam din: gyaug mung: mug' byaug: ako". Yao: bam wa ba thug' shad' mae" la laung lohug' zao" au: mae" yo mae yaug: ra" myo,- khaung dao mae yaug: ra" mhin: gae jham we' dau: ako".
28 Ngadqere: nao pe" kad' ru we' nao khai: ye" ru ni" khyo ja: khao: ngo" re ngo ba: ra". Nao ngore khoqhi" nhag' yo: gye kad' rure ngo ba:-
29 Ni" nho: nhag' yo" ru we' ngad beim" ra" lau re ngo qo" khae: yu va". Ana" ngo wa ni" nho mae anghoe: thung" kyao" ke' mung:- ni" nhad' mae nhad' kho' ke' byid: nae". Amung: nao li" ra" khyo khyo" nao re dam: tug' jhui" lo" nae" ga"- ru ngad: ra".
30 Ai: thao Esaia wa kho:kham Hezekia re- ce wa boe" li" nae" ra" ve, so: ngad: ra". Ana" zin we' sao nhag' wa gaug lae" re za: nao zo: ca" li" nae". Ngadqere: thao: zin khaung: mae wa gaug zo re qo" qho mung: aire qo" yad: yu: li" nae". Amung: sabyi naui re qho: mung: sabyi shi: jham qo" zo" li" nae".
31 Yuda mung" mae na: dang: jo; ra" mo, wa myid khug khyo agyi: no, sho' qo" cin" yang: ashi: zaui" ra" mo: ra" agae jham we' dau: li" genae".
32 Yerusalem mae na mo, we' Ziun bam dao mae na: ra" mung" byu qe wa na: dang: jo; li" genae". Pe"mung:ga"re qam: bo: ra" Asang wa ceru: boe" nae" myid: phyid' to" ava".
33 Ce wa Asuri kho:sin" we' sin: yang: Asang ta" to" ru ngad: ra". Aiwa ce: vogaung: khyo yao: maqo" vao nae" myo: dakhe' re: maqo" bag nae". Go ci: ra" gyezo: dayaug re: vogaung: khyo maqo" te' li" nae". Vogaung: re vang" ra" myid bam" jham dalam: re: maqo" zao genae".
34 Yao: wa ce: vogaung: khyo mavao lo:- yao: li" ra" khyodang khyo" dam: tug' lo" byaug nae". Asang ngo ta" to: va".
35 Ngo wa ngoyao" nga: ye, khyo mathao mae we' nga" daui daui yaug Davi re ngo byid' to" ra" dao:so: mathao mae ce: vogaung: re gyevha byid: mung: gug: gam byid: nae"- ga" ru ngad: ra".
36 Asang: mug: lagyo: dayaug wa Asuri byu qe: jamu khyo ye: mung: gyezo: 185,000 yaug re se' pye' ra". Thao: ba mug: bo" myi: re yao: bam alhab' mo, aimae shid: lang" jo; ako".
37 Ailao" Asuri kho:sin" Senakherib wa zad: phao: lo" mung: Nineve khyo tug' lo" byaug: ra".
38 Daba na mae caung:pa" yham mae yao" so Nisrog re caung:pa" na: au: yao" yauggai zo: tao ngad ko" ra" Adrameleg we' Shareze tao wa yao: shid' tao: nho: shae pyang" yang yao: re se' pye' ako". Amung: Ararad mung" khyo phao: loe; lo" byaug: ako". Yao" yauggai zo: qe mae" gatau dayaug ngad: ra" Esarhadon wa yao" khu mae khosin" xo' kad' ra".