36
Asuri Byu Qe Yerusalem Re Kyaug' Nhin" Ra" Khyo
(2 Kh 18.13-27; 2 Km 32.1-19)
1 Yuda kho:kham Hezekia kho:kham kad' ru daxe: byid zin ein: zin mae Asuri kho:sin" Senakherib wa Yuda mung" mae" gyetab vogaung: jham re khe' zin: mung: aijham re aung: yu: pye' ra".
2 Ai: thao yao: wa yao" gyezug: au: jhaung re kho:kham Hezekia aseim" byid: lo, tau sho' yeta" nae" qhid' mae" gyetab qi: we' daga" Lakhi mae" Yerusalem khyo ye: nae" amyin" khyo" ke' ra". Gyezug: pho" wa tho' qid kyaung" mae" qid she: yu: ra" qid khyo: nhae- mai bau: zab mo, mau" zaui" ra" khyodang re vang" yu: pye' ra".
3 Yuda byu sam yaug yao: re li" tug: yu nae" thug' li" ako". Ai bam wa kho:kham kho" au: jhaung ngad: ra" Hilkia nho: yauggai zo: Eliakim- kho:kham kho" jo,nho" zam: Shebna we' tung" xam: au: jhaung Asab nho: yauggai zo: Yoahaza bam ngad: ako".
4 Asuri gyezug: pho" wa yao: bam re kho:kham Hezekia wa aiqhi" pe" ja: re myid: lam: na: ra" khyo re khosin" pho" ba nug: ra" khyo ta" ra".
5 Yao: wa nhad' dao: thoe jham wa gye we' sin: yang: jhao: ru we' qam: so' jo, qo mae atha" qo" yu nae" ein: naonhaung" jho ko" i? Asuri re tau: lhan: gye kad' rure naonhaung" re khag' qo" bao" byid' li" nae"- ein: jho ko" i?
6 Egutu yang naonhaung" re li" bao" yu: li" nae" ga: naonhaung" myid: lao" ako". Ngadqere: ai wa qid phaung: yao: re zaung: bao" kad' ci: ru we' dakhyo: ngad mung:- ai wa naonhaung" lo, khug mae gyug' lo" mung: the' thug' yu: ako". Aiwa dayaug yaug yao: re ngha: ra" au: Egutu kho:kham wa airu: dau: byaug: li" nae"- ga: ta" ra".
7 Asuri gyezug: pho" wa xo' yang:- mangad: lao"- naonhaung" Mao"So Asang re naonhaung" ngha: na ko" ra" khyo ngore ta" genae" i? Yuda we' Yerusalem byu qere phan dalam: mae za: caung:pa" genae" yao: ta" au: Asang: phan yham we' phan jham re phyo' pye' yaug wa Hezekia yao: ngad: ava".
8 Ngo wa kho:sin" pho" nho: mang mae- naonhaung" we' gau jho jho" ta" nae". Naonhaung" myao: qo" jui: ko" ra" byu myo: sho' na ko" re wa ngo naonhaung" re myao: shid' taung dau: byid: nae".
9 Naonhaung" wa Asuri nho: nyham: thao" ra" gyezug: aya: qo" yaug we' lhao" re: mai jho" qhi" nae" maman" ra" mo, ngad: ako". Ai ngadqere: Egutu byu qeyang myao: lhin" we' myao: jui: byu qe naonhaung" jhao" nhao: ke' byid: nae" rure myid: lao" ako".
10 Asang: yang bao" thaug' ru mabo lo:- naonhaung" mung"dan: re gyekhe' zin: yang: phyo' qheim" pye' va" ein: naonhaung" jho ko" i? Aire gyekhe' mung: phyo' qheim" pye' nae" ngore ta" yaug wa Asang yao: ngad: ava"- ga: ta" ra".
11 Ailao"- Eliakim- Shebna- Yoahaza bam wa gyezug: pho" re- ngonhaung" re Aramig myan" khyo" jhau la,- ngonhaung" aire ba: gyo"- Hebre myan" dajhau wa,- vang dao mae na: ra" vobyu qe tae" gyo" na: ako"- ga: ta" ako".
12 Yao: wa- kho:sin" pho" wa naonhaung" we' kho:kham pho" re za: cegu: alhab' re ta" kyo: nae" ngore nhao: ke' ru ngad ein: naonhaung" jho ko" i? Mangad: lhe" ngo wa vang dao mae zaung: jo, ko" ra" vobyu qere re: ta" na: ru ngad:- ai bam wa naonhaung" we' dakhyo: yao: bam yao" khyid' re zo:- yao: bam yao" yhid' re shaug' ca" li" genae"- ga: ta" ra".
13 Ai: thao gyezug: pho" wa- to" ye, yang: Hebre myan" khyo"- Asuri kho:sin" naonhaung" re ta" na: ra" dao: re tae" gyo: ge,.
14 Hezekia yang naonhaung" re mamhug' pyag' nhao genae" qhid' mae" yao: naonhaung" re ta" peim" ra". Hezekia wa naonhaung" re maqo" khyad' yu ngad: ra".
15 Asang re khug ngha nae" qhid' mae" yao" yang naonhaung" re dangaui: yu nhao ge,. Asang wa naonhaung" re khyad' yu mung: naonhaung" vogaung: re ngonhaung" Asuri gyetab: yang lhad' sang: yu: rumae" qo" tam" pye' li" nae" ein: dajho ge,.
16 Hezekia dao: re datae" gyo: ge,- Asuri kho:sin" wa naonhaung" re vogaung: mae" thug' li" mung: aseim" kham lo, tau genae" qhid' mae" naonhaung" re amyin" byid' ke' ra". Naonhaung" alhab' re naonhaung" yao" sabyi naui mae" sabyi shi: re we' naonhaung" yao" pho' ham" gae mae" pho' ham" shi: re zo: nhao nae". Aimung:- naonhaung" yao" qid thaung: mae" qid re shaug' nhao nae".
17 Ai: thao re- kho:sin" pho" wa naonhaung" yao" mung"dan: we' gyai dau: ra" gatau mung"dan: mae naonhaung" re na nhao mung:- aimae sabyi khyae wa sabyi qang: byid: yang:- mug kad' nae" qhid' mae" gaug zo qo" li" genae".
18 Asang: yang naonhaung" re khyad' yu: li" nae" ga: myid: jho sho' Hezekia yang naonhaung" re ago dakad' nhao ge,- gatau: mung"dan: jham mae" so jham daja" yang yao: bam: mung"dan: jham re Asuri nho: kho:sin" lo, mae" khyad' yu: qu" ra" i?
19 Hamad we' Arpad nho: so jham wa ana" khai: mae ngad: ako" i? Sepharaim nho: so jham wa khai: mae ngad: ako" i? Samari re khag' yang khyad' yu: ra" i?
20 Ce: mung"dan: jham alhab' nho: so jham mae" pe" ja" so: yang ngonhaung" nho: khosin" pho" nho: lo, mae" yao: bam: mung"dan: re khonhae" khyad' yu: qu" ra" i? Aire Yerusalem re Asang: yang qo" khyad' yu: ra" ein: naonhaung" pe"mung: myid: jho ko" i? ga: ta" ra".
21 Mung" byu qe wa Hezekia yang yao: bam re ta" to" ru we' dakhyo: sae za: na: jo, mung: pe" dakheim: re: mata" ko" ngad: ra".
22 Ailao" Eliakim Shebna- Yoahaza bam wa kaug' yang: yao: bam: mai bau: jham re lao" cad' pye' ako". Yao: bam phao: lo" mung: Asuri gyezug: pho" ta" ra" dao: kho:kham pho" re lau lo" ta" shid' ako".