34
Mao"So Wa Yao" Gyevo Qere Qobo Dae Byid: Nae"
1 Byumyu" mung"dan: alhab' we"- lo geri: lhang" gam: li" ham: na mung: tae" gyo: ge,- mug: myid geim" we' aimae na: ra" mo, yaug khao: ngo" cekhyo li" mung: tae" gyo: ge,.
2 Asang wa byumyu" mung"dan: alhab' re we' yao: bam: gyetab jham alhab' re nhag' yo" ra". Yao: wa yao: bam re phyo' khyo" pye' nae" dao: phyid' ava".
3 Yao: bam: mao gaung jham wa nyhab' shaung: ru maqhug' genae". Aitau mae bab: nae: ha" lang" jo; li" genae". Bam jham wa sa: za: byao byao ne: jo; li" nae".
4 Ba- lho"- kyi jham wa badan boe" sho' man" byaug genae". Mug:gaung wa dang" lham" lo" ru we' dakhyo: byaug: lo" li" nae". Kyi jham wa sabyi naui mae"- mangad: lao" pho' ham" gae mae" avho' jham shu: gyo" lo" ruru: gyo" lo" li" nae".
5 Asang yao" shae pyang: re mug: khaung dao mae nyhang" jaung: to" ava". Aiwa ana"- phyo' pye' nae" yao" yang dao: phyid' to: va" mo, ngad ko" ra" Edom byu qere qam" li" nae".
6 Yao" shae pyang: wa aibam: nho: sa: we' xau: yang dag: jo; li" nae". Aiwa ngaui" xeim: ngaui" byid' ra" yao we' cad' be, jham: sa: we' xau we' dau: li" nae". Asang wa ce: ngaui" xeim: re Bozra vogaung: mae ngaui" byid' li" nae". Yao: wa Edom mung" mae je: xo sho' se' rure kad' li" nae".
7 Mo,byu qe wa nung: lae" lo: we' nung: jaung lo: nau" jham ru: gyang: lang" lo" genae". Mug: myid wa sa: za: byao byao ne: jo, mung: xau: yang dag: jo; li" nae".
8 Ce: ayo, wa Asang: yang Ziun re khyad' yu mung: yao" gyevo qere lage, phaug' byid: nae" ayo, mae boe" li" nae" ngad:.
9 Edom qid gyaung: jham wa khyomyhung: nhai: boe" lo" byaug mung: myid zhai: wa vhang boe" lo" byaug nae". Mung"dan: geim" wa khyomyhung: nhai: nga" ru we' dakhyo: nga" lo" nae".
10 Aiwa myi" re: na" re: nga" na mung: myi khug' wa apyad ato mae aimae" khug' do, li" nae". Amung: myid wa dapyad mae" dapyad mug: gao: boe" jo, mung: ai: khyo" khag' dayaug re: gyaung: madam: su" lai: ye: genae".
11 Khaung: bab: we' kano, jham wa aimae byang" jo; li" genae". Aiwa phan" to" ru majo, shimae" we' dakhyo: Asang wa aire mug: gao: kad' pye' li" nae".
12 Ai: mung"dan: re eib: ra" kho:kham mana nae". Au: jhaung qe alhab' mo, baui" byaug: li" genae".
13 Zau: gae we' zau: kyin jham wa kho:kham kho" alhab' mae we' vang bo: ra" vogaung: alhab' re yaug: nghoe' pye' li" genae". Aijham: khug mae zag ne we' khaung: bab: jham na: jo; li" genae".
14 Seyo: gug'nyhug' lae" jham wa aimae du" lhau mung: yui jham wa yao: cao: jho" yao: li" genae". Myi" yui jham wa ai: mae dugno: nae" jo, qo li" qho: li" genae".
15 Khaung: bab: jham wa yao: bam: asad' li" sad' mung: au" khyo" yang: anau" ab' phaug' yu mung: aitau mae khau: qhi" yu: li" genae". Nang da ngho' jham wa dadau" thao dadau: aikhyo zang" li" li" genae".
16 Asang: mugsug' paug' re phung" nghe' ge,. Ai: gug'nyhug' jham mae" dadau: re: mabyaug nae". Dadau: re: yao" byin cao: mabyaug nae". Asang wa airu: ngad nae" amyin" khyo" to" ava". Yao: yao: aijham re daga" zhang: yu nae".
17 Aijham re mug: myid kho' byid: mung: aijham mae" dau: khao: ngo" re gae bam byid: nae" yaug wa Asang ngad: ra". Yao: bam wa ai: mug: myid mae dapyad thao dapyad na: li" genae". Apyad ato mae aire yao: bam sang: li" genae".