33
Bao" Thaug' Ru Qhid' Mae" Akyu" Mho' Dao:
1 Ngonhaung" gyevo qe wa jeim" byaug: avako". Yao: bam wa lhad' zo: mung: gyevo qe: lo, khyo ab byid' lo: ra" mo, ngad gesho' ngadqere: yao: bam re wa khag' yang malhad' zo: khag' rere: ma ab byid: ngad: ako". Ngadqere: yao: bam: lhad' zo: ko" ru we' ab byid' pye' ra" ayo, wa thao" lo" li" nae". Yao: bam yao: yao: lhad' zo: qhug' mo,- phyo' zo: qhug' ra" zo boe" genae".
2 Asang we"- ngonhaung" re nhag' khyag' yu la, wo"- ngonhaung" wa nao re myid: lao" na:- ngonhaung" re daba we' daba gug: gam byid: mung: qug: khai: qhug' ra" ayo, mae ngonhaung" re khyad' yu la, wo"-
3 Ngonhaung" qhid' mae" nao gyekhe' byid: lao"- byumyu" qe wa gyekhe' jao: hug' thoe mae" tao" phao: lo" ako".
4 Yao: bam sang: ra" zai jham wa yedeim" zag: lhad' ru qhug' mung: lanyab khyo" lhad' yu: pye' ru qhug' ako".
5 Asang wa qi" qhang yaug ngad: ra" wo"- yao: wa cao jab alhab' re eib yaug ngad: ra". Yao: wa Yerusalem re tarha" din nyang: man" ru we' jhaug' zaug: ru byang" jo, nhao: li" nae".
6 Byumyu" re tang nhao nae". Yao: wa khonhae" re: yao" byumyu" re gug: gam byid: mung: yao: bam re pha,jhi" we' laba lajhao re byid' li" nae". Yao: bam: phug' de; thao" ra" jo,nho" wa Asang re gyaug phug' ru ngad: li" nae".
7 Sulhe: qe wa bao" thaug' rure mho' yao: na: ako". Ngaui pyo: yaug yo khyo re vin: li" ko" ra" mug: va: lagyo: qe wa alokho: sho' gyi: ngug: na: ako".
8 Hau" mo" khyozang jham wa gyaung: su: mo, khag' mana yang: gyai gyaug ci" pho: boe" jo; ra". Myid vang" mugsug' wa byo; qeim: lo" mung: myid vang" khyo jham wa lhoe" pye' qhug' ava". Khag' re: aire maphug' lo:ngad: ako".
9 Mung"dan: wa pyad lad sade: cae: jhug tag boe" jo; ra". Lebanon sag' mo" yo wa sham: jhoe' lo" mung: myid xau gai: ra" Sharon lao: khaung: wa din"pyad' yo we' dau mung: Bashan mung" we' Khame bam dao mae yaug: ra" sag' gae jham mae" sag' vho' jham shu: gyo" na: ako".
Yao" Gyevo Qere Asang Ta" Peim: Ru
10 Asang wa byumyu" mung"dan: jham re- ana" ngo mau" zaui: naeva". Ngo khoqhi" qam: bo yaug ngad: rure qhu" byid: nae".
11 Naonhaung" wa pe" phug' made; ra" mau" jham re yaung: to: mung: naonhaung" kad' ru ja: khao: ngo" wa aje amyid ngad: ra". Nga" byo wa naonhaung" re phyo' qheim" pye' nae" ra" myi: we' dakhyo: ngad: ra".
12 Naonhaung" wa shaqhui: phad' nae" laug baui jham we' dakhyo: man" byaug: li" genae". Myimhab nga" jeim" lo" ra" zau: kyi gae jham we' dakhyo: ngad: li" genae".
13 Ava: ajhao" mae" yaug khao: ngo" re ngo kad' va" mau" khyo re the' gyo: nhao mung: nga" qam: so' re lhang: yu nhao ge,- ga: ta" ra".
14 Ziun mae na ko" ra" qobo jab qe wa gyaug yang: ko, ko, nin" na: ako". Yao: bam wa- Mao"So: dao: kho' ru wa apyad ato mae nga" na: ra" myi: we' dau: ra". Airu" ra" myi: mae" ngonhaung" khag' dayaug qo" na: dang nae" i? ga: ta" ako".
15 Naonhaung" jo: ra" dao: jham- jo: ra" lo, mau" kad' geyang: ngad: re naonhaung" qo" na: dang genae". Myaung sho: mo, re pyag' zo: nae" naonhaung" qam: so' re daci ge,- khug vag: re dakhae: yu ge,- byuse' nae" we' makhyang" ra" gatau mau" jham kad' nae" yaung: to" ra" mo, we' dazam" ge,.
16 Airulao"- naonhaung" gug: gam qo" genae". Naonhaung" wa tang: ra" gyetab mae na mo, ru: gug: gam qo" li" genae". Naonhaung" wa zo:ve we' shaug' qid qo" li" genae".
Phung Bao Bo: Ra" Joe" Lo Nae" Ayo,
17 Shad' khao: ngo" khyo ce" ye" lo" ra" mung"dan: mae phung qam: so' we' eib: ra" kho:kham dayaug re naonhaung" dalhang dam: the' myao: li" genae".
18 Naonhaung" ganhae" gyaug: lo ko" ra" taung bug khang: gaug mo, we' jin" byu qe alhab' wa axam: aso: za: angad: byaug: li" genae".
19 Naonhaung" maba: gyo" myan" re jhau mung: ngad beim" ra" taung bug byu qe dayaug rere: naonhaung" mathe' myao logenae".
20 Ngonhaung" nho: caung:pa" thung" poe jham re kad' ra" jo, qo ngad: ra" Ziun vogaung: re qu" ge,. Yerusalem re qu" ge,- ai wa khoqhi" gug' ra" na jo, qo ngad nae" i? Aiwa khonhae" re: maqhui" ra" zaung we' dau: li" nae". Ainho: zaung lao" din" ra" daung" zang jham re khonhae" re: maphan"- aijham re taui" ra" taui: jham khonhae" re: maman mabyid nae".
21 Asang wa yao" phungbao ngonhaung" re qhu" byid' li" nae". Ngonhaung" wa lu: ra" qid gyaung mo" we' qid zo: gyaung: ayae mae qo" na: li" nae". Ngadqere: gye kad' ra" lha jham wa ai: dao mae magau: genae".
22-23 Ai: lha jham mae" taui: jham wa aje amyid ngad: ra". Lha kau: mo, lha gau: pin: re maqo" phyid: ke' ngad: ako". Ngonhaung" wa gyevo gyetab jham: nho: jo,nho" alhab' re qo" sang: yu: li" nae". Saung" laug yang: khyid qeim qe lhao" re: gae bam qo" yu: li" genae". Asang yao: yao: wa kho:kham ngad: li" nae". Yao: wa ngonhaung" re eib mung: gug: gam byid' li" nae".
24 Ngonhaung" mung" mae na ko" ra" mo, khag' dayaug re: no yang: khonhae" re: madam: nyhung lo: genae". Qobo alhab' wa khyad' pye' byid: qhug' li" nae".