7
1 Nga" byumyu" Israel re ngoyang no gai byid: nug: au: we' yao: bam re dam: na: dai nhao nug: au: ngo the' myao: ru wa yao: bam nho: makhyang: mashab: ra" mau" jham we' yao: bam kad' ra" makhyang" ra" mau" za: ngad: ra". Yao: bam yao: cao: jho" pyag' vhan" zo: mung: yham khug khyo cad' vao ye" ru we' khug' zo" ako". Yao: bam wa byu qere hau" mo" khyo mae mo, byu qere lhad' zo" ako".
2 Ce: makhyang: mashab: ra" mau" re ngo myid: beim: nae" ga" ru yao: bam: au: mae khonhae" re: mavao ngad: ra". Yao: bam: yug: no qobo jham kam" wa yao: bam re lhang" kham" to" ra". Aimung: yao: bam re mamyao sho' ngo maqo" jao" pye' ngad: ra"- ga: ta" ra".
Kho:kham Kho" Mae Byuse' Pha,jhi" Khug' Khyug' Ru
3 Asang wa- mung" byu qe wa yao: bam: makhyang: mashab: ra" pha,jhi" khug' khyug' ruyang kho:kham we' yao" nho: zug: ade, qere mhug' pyag' pye' ako".
4 Yao: bam alhab' wa mhug' pyag' ru we' jhaug' mazaug mo, ngad: ako". Yao: bam: nghang" ru wa myikhyeim" mo" khug mae" myi: we' dakhyo: aso' hab' pye' ra". Ai: myi: wa mug kad' yaug: yang jung: cinman" re mug kad' nae" jin" jin" ngad: sho' malhau: zhung" ke' ra" myi: we' dau: ra".
5 Kho:kham: nho: poe ba na mae yao: bam wa kho:kham pho" we' yao" zug: ade, qere yhid jhaug' mung: sabyi qang" yang yid nhao: ako".
6 Ngad va"- yao: bam wa khyeim" mo" myi: we' dakhyo: yao: bam: magai: ra" byin phyo: mau" mae nga" laung: na: ako". Yao: bam: nhag' yo" ru wa damyi khyeim geim" myi: am: am" jo, mung: mug: bo" li" re myishae laung: de; thug' li" ra".
7 Yao: bam: nhag' jam: phin" yo" laung: li" au: re yao: bam wa yao: bam: zug: ade, qere se' pye' ako". Yao: bam: kho:kham qe wa dayaug bin dayaug khug' se' pye' qhug' ako". Ngadqere: bao" thaug' yu nae" qhid' mae" ngore khag' re: akyu" mamho' ngad: ako"- ga: ta" ra".
Israel We' Byumyu" Mung"dan: Jham
8 Asang wa- Israel byumyu" wa phad' yhui" to" ra" mug dakhai" we' dau: ra". Yao: bam wa yao: bam: avai: ayae mae" byumyu" qere myid: ngha mung:-
9 Taung bug qere khug ngha: ru wa yao: bam nho: qam: re lhad' yu: pye' rure mabeim: so: ngad: ako". Yao: bam: ba na jham wa thao" jo, va". Ngadqere: yao: bam wa aire ba lhao" re: maba ngad: ako".
10 Israel byumyu" qenho: ngad beim" ru wa yao: bam re gye tug' kad' hug' yao: ako". Airu: ja: khao: ngo" boe" lai: lo ngadqere:- yao: bam wa yao: bam nho: Mao"So Asang ngo jhao" matug' lo ngad: ako".
11 Israel wa- nhag' magyang" ra" jid: au we' dakhyo: myo,nho qho: yam: qin" ra"- sao qhid' mae yao: wa Egutu jhao" bao" thaug' yu nae" yemho' ra". Ai: thao yao: bam wa Asuri jhao" tao" ye" ako".
12 Ngadqere: ngo wa- myho khae: to: mung: yao: bam lai: lo" ra" au: re ngho' jham re we' dakhyo: lham" pye' nae". Ngo wa yao: bam re- yao: bam kad' lai: lo vako" ra" makhyang: mashab: mau" zo" jham: mathao mae qobo dae byid: nae".
13 Yao: bam wa jeim" lo" avako". Yao: bam wa ngore to: co' mung: ngore tau: lhan" ako". Yao: bam wa phyo' qheim" pye' ru qhug' li" genae". Yao: wa yao: bam re khyad' yu nug ngadqere:- yao: bam: yang ngore caung:pa" ru wa majo maang: ra" khyo" ngad: ra".
14 Yao: bam wa nhag' lam: din: din: za: ngo re akyu" mamho' ko" ngad: ra". Yao: bam wa yao: bam: gaung re airu: kad' nae" atha" shapye' lhang" ke' mung: taung bug qe we' dakhyo: ngug: yao: yao" ako". Gaug zo we' sabyi qang: qo" nae" akyu" mho' au: re Mao"So re malam mo, we' dakhyo: yao: yao" gaung re lhai" cad' mung: dae te' yu: ako". Yao: bam wa khoru" tau: lhan: mo, ngad: ako" i?
15 Ngo wa- yao: bam re khau: qhi: mung:- yao: bam re qam: bo nhao yaug ngad sho' ngadqere:- yao: bam wa ngore gye khug' kad' ako".
16 Yao: bam wa xo' yang: ngo mae" va: khyo phao: lo" mung: pe" kheim: so' mabo: ra" so daso jhao" ye" ako". Yao: bam wa kaui: ra" lo, la: we' dakhyo: lam maga" ra" mo, ngad: ako". Yao: bam: au: jhaung qe wa ngad: beim: dao: ta" ra" mathao mae yao: bam wa mai: shid mung: li" genae". Aimung: Egutu byu qe wa qi: jung" li" genae"- ga: ta" ra".