6
Byumyu" Qenho: Madangman" Ra" Nhag' Lam: Tha" Ru
1 Asang jhao" dam: tug' lo" gelang:- yao: wa ngonhaung" re dae no nhao: ava". Ngadqere: yao: wa ngonhaung" re dang dang yao: dae gai byid' li" nae". Yao: wa ngonhaung" re dae te' ava". Ngadqere: yao: wa ngonhaung" nho: dae jad: re phacug' thab' byid' li" nae" mangad: i?
2 Shid' sam ba: gyo: mae yao" yang ngonhaung" re dam: daui: li" nhao nae". Aimung: ngonhaung" wa yao" qhid' kheim: mae qo" na: li" nae".
3 Ngonhaung" wa Asang re ba nae" qhid' mae" qam: ke' gelang:- yao: wa ne, seim mug: bo" li" ru we' dakhyo: myidgaung re jhug' byid' ra" zin vao kheim: mug: we' dakhyo: ngonhaung" jhao" li" lo nae"- ga: ta" ako".
4 Ngadqere: Asang wa- Israel we' Yuda we" ngo wa naonhaung" we' pe" jho" sin" i? Ngo re naonhaung" yang jhid'de; ru wa- ne, seim mae" lao" khyam" we' dakhyo: phyad phyad baui" byaug: ra". Ai wa na" mae byaug: lo" ra" nghin we' dau: ra".
5 Ai: mathao mae- ngo wa nga" lapa qere dao: kho' ru we' phyo' qheim" ra" lau dao: we' daga" naonhaung" jhao" nhao: ke' byid: va". Naonhaung" mae" ngo o: ru wa de: de: sho' sho' ngad: ra".
6 Ngo wa naonhaung" nho: mabaui mabyo; ra" jhid'de; myid re o: ra" naonhaung" nho: gug'nyhug' xeim: re ngo ma-o nga" byumyu" qeyang ngore phad' ngha" xeim: ngaui" byid: nae" tho' nga" byumyu" qeyang ngore ba genae" rure: je: o: ra"- ga: ta" ra".
7 Ngadqere: yao: bam wa Adam we' dakhyo: ai: jo, qo mae yao: bam we' ngo to" ra" dao: thang" re phyo' pye' ako".
8 Gilead wa- makhyang: mashab mo, we' byuse' mo, byang" na: ra" vomo" ngad: ra".
9 Khinjaung qe wa- byu dayaug re khug' lham: na: ra" damya, phung: we' dau: ako". Shekhem mae" gyang" lho" ra" jo, qo khyo ye" ra" khyo mae lhao" re: yao: bam wa byuse' mau" kad' thug' ako". Aimung: yao: bam wa ce: makhyang: mashab: ra" mau" alhab' re thaug yao: kad' ako".
10 Ngo wa Israel mae gyaug din ja: daja: the' myao:- nga" byumyu" wa solho jham re caung:pa" ra" khyo" yang yao: yao" gaung re maca' majhad' kad' pye' ako".
11 Aimung: naonhaung" Yuda byu qe: qhid' mae" naonhaung" kad' na: ra" mau" mathao mae naonhaung" re ngoyang qobo dae byid: nae" ayo, dayo, so" to: byid: va"- ga: ta" ra".