3
Yesu Wa Moshe Tho' Je: Qi: Yaug Ngad: Ra" Khyo
1 Mao"So: yang khai: yu qhug' ko" ra" nga" Khristan mao:nhaung: qe we"- ngonhaung" lhang: yu: ra" lalam lakhug: nho: Khinjaung Yin" kad' nae" qhid' mae" Mao"So: yang nhao: ke' ra" Yesu re myid: qu" ge,-
2 Moshe wa Mao"So: yham mae yao" mau" zo" mae lam ga" kyid yaug ngad: ru we' dakhyo: Yesu wa ce: mau" zo" re zaui: nae" qhid' mae" yao: re khyin: san: yu: ra" Mao"So: qhid' mae" lam ga" kyid yaug ngad: ra".
3 Yham kad' ra" yaug wa ai: yham re tho' je yang: phug' te' nga: yhe' byid' ru qhug' yu: ra". Ai we' dakhyo: Yesu wa Moshe tho' je yang: phug' te' nga: yhe' byid' ru qhug' yu nae" man: qi" ra" yaug ngad: ra".
4 Yham wa byu dayaug yaug: yang kad' to" ru ngad: ra". Mao"So wa ja: cao jab alhab' re kad' to: yaug ngad: ra".
5 Moshe wa daui daui yaug ngad mung: Mao"So: yham mae lam ga" kyid mung: joe" lo nae" ayo, mae Mao"So ta" nae" khyo jham re yao: jhau: ra".
6 Ngadqere: Khristu wa Mao"So: yham mae eib: ra" Yao: Zo: we' dakhyo: lam ga" kyid yaug ngad mung:- ngonhaung" wa vae" ru we' ngonhaung" myid: lao" ra" ja: re tang za: zaui" ci: ngad: re wa ngonhaung" wa Mao"So: yham ngad: ra".
Mao"So: Byumyu" Qhid' Mae" Dugno: Jo, Qo
7 Airumung: Gyang" Lho" Byo ta" ru we' dakhyo: naonhaung" ana" ba- Mao"So: thoe re the' gyo: ko" ngad: re wa- ai: ba na mae
8 naonhaung" phug' pho" qe wa din"pyad' yo mae
Mao"So re geim lau to" mung: yao: bam wa yao: re jham" qu" ko" ru we' dakhyo: naonhaung" nhag' lam: daqao ge,-
9 Yao: bam wa byid xe zin lam: lam: ngo zaui: so" ra" lo, mau" re bin: the' myao: lo gesho'
ngad yang: re: yao: bam wa ngore geim lau to" mung:- jham" qu" ko" ra"- ga: Mao"So ta" ra".
10 Airumung: ngo wa ai: byumyu" re nhag' yo: mung:
yao: bam wa ngore khonhae" re: ngag: pye' mung: nga" amyin" dao: jham re phug' cao" nae" qhid' mae" ha: pye' ako"- ein: ngo ta".
11 Ngo wa nhag' yo: mung:
Yao: bam wa khonhae" re: ngo byid' to" ra" ai: dugno: re qo" kham: yu nae" ra" mung"dan: khyo maqo" vao ye: genae" ein: ngo jham tang" to: va"- ga: ta" ra".
12 Lam khug: ra" mo, ngad: ra" nga" mao:nhaung: qe we"- Kaoso' daui: na: ra" Mao"So mae" phaug' lo" sho' malam makhug: ru we' gyai makhyang" ra" nhag' lam: wa naonhaung" phaung mae" dayaug mae re: mabo genae" qhid' mae" lha" ge,-
13 Ai: atha"- naonhaung" mae" khag' ngadqere: qobo: yang ju" phyo' ru qhug' mung: nhag' lam: qao: li" na mo, maboe" genae" qhid' mae" Jham: Mugsug' mae ta" to" ra" ana" ba- ba na ayo, ngonhaung" qhid' mae" ajo, jo, wa ba khao: ngo" naonhaung" yao: cao: jho" bao" thaug' na qo: ra".
14 Pe"mung:ga"re naonhaung" wa aqhid mae" khug ngha: lo: rure lo" thao" sho' zaui" zag: ci: ngad: re wa ngonhaung" wa Khristu we' mau" zam" zaui" ra" mo, ngad: ra".
15 Ceru wa Jham: Mugsug' mae- Naonhaung" wa
ana" ba Mao"So: thoe re the' gyo: ko" ngad: re wa
naonhaung" phug' pho" qe Mao"So re gye kad' yang: geim lau to" ko" ra" au: we'
dakhyo: nhag' lam: daqao ge,- ga: ta" to" ra".
16 Mao"So: thoe re the' gyo" yu mung: Mao"So re gye kad' geim lau to" ra" mo, wa khag' bam ngad: ako" i? Yao: bam wa Moshe yang Egutu mung" mae" jhui" thug' lo: ra" mo, ngad: ako".
17 Byid xe zin lam: lam: Mao"So: yang nhag' yo" ru qhug' ra" mo, wa khag' bam ngad: ako" i? Qobo shad' lhoe" geyang: din"pyad' yo mae gyang: shid: lang" lo" ko" ra" mo, ngad: ako".
18 Yao: bam wa ngo byid' to" ra" ai: myaung: ngho" ra" mung"dan: khyo khonhae" re: maqo" vao ye: genae" ga:- Mao"So jham tang" ru wa khag' bam re qang yang: tang" ru ngad: ra" i? Mao"So re geim lau to" ra" mo, re qang yang: jham tang" ru ngad: ra".
19 Airumung: yao: bam wa malam" ko" ruyang ai: mung"dan: khyo maqo" vao ye: ko" rure ngonhaung" the' myao: bam va".