2
Qi" Qhang: Ra" Khyad' Yu: Ra" Khyo
1 Airumung: naonhaung" wa cidao" lo" byaug: ru maqhug' genae" qhid' mae" naonhaung" the' gyo" yu vako" ra" ai: dangman" ra" khyo re je yang: tang za: zaui" zag: ci qo: ra".
2 Mug: lagyo: qekhyo" yang ngonhaung" phug' pho" qere byid' to" ra" ai: mungdao: wa dangman" ru ngad mung: aire maphug' cao" ra" yaug wa qobo dae re kham: yu nae" man: qi" ra".
3 Airumung: ngonhaung" wa ai qhi" qi" qhang: ra" khyad' yu: ra" khyo re pe" shui manho lo: na: bam: ngad: re wa ai: qobo dae kham zo: nae" rumae" ngonhaung" khoru: qo" phao: loe; bam nae" i? Ce: khyad' yu: ra" khyo re Asang yao: shi" sao qhid' ta" hau" kyo: mung: aire the' gyo" yu: ra" mo, wa ai: dangman" rure ngonhaung" re sagse: kham byid' ako".
4 Aitho' mago"- Mao"So yao: re: mug' pho: ve, lho aja: ja: mug' pho: mau" zo" jham re zaui" qhu" ru we' Gyang" Lho" Byo: jeju jhaung qhu" jham re yao" myid o: ru we' dakhyo: gae byid' ra" khyo" yang yao: bam: sagse: kham: rumae bolaung: mung: sagse: qhu" byid' ra".
Khyad' Yu: Ru Khyo Ngonhaung" Re Khyo Qhid' She Yaug
5 Mao"So wa- ana" ngonhaung" ta" na: ra" mug: myid ngad: ra" thao phyao: joe" lo nae" ra" mug: myid asag' re mug: lagyo: qere maeib nhao: to: ngad: ra".
6 Ai: atha" Jham: Mugsug' datau mae-
Mao"So we"- nao beim" na: ra" xao su byu we' nao qu" gun caung: na: ra"
byu wa pe" ru" yaug ngad: ra" i?
7 Nao wa yao: re dayo, daban: za: mug: lagyo: qe: o mae khyo" to" ra".
Amung: phungbao we' phug' te' nga: yhe' ru yao: re zhaung: byid: mung:
Cao jab alhab' re eib: ra" zug: kad' nhao: ra"- ga: ta" to" ra".
8 Jham: Mugsug' mae Mao"So wa byu re cao jab alhab' re eib nae" zug: kad' nhao: ra"- ga: ta" ru wa ja: khao: ngo" re bota" ru ngad: ra". Ngadqere: ngonhaung" wa ana"- cao jab alhab' re byu: yang eib: na: rure mathe' myao ngad: ra".
9 Ngadqere: ngonhaung" wa Mao"So: nhag' myan" ra" jeju khyo" yang byu yaug khao: ngo" qhid' mae" qo" shid kham: byid: nae" qhid' mae" dayo, daban: za: mug: lagyo: qe: o mae khyo" to: byid' ru qhug' ra" Yesu re the' myao: bam va". Yao: dayin dayo: kham zo: mung: shid kham: byid: va" ruyang phungbao we' phug' te' nga: yhe' ru zhaung" ci: rure ngonhaung" yao: re ana" the' myao va".
10 Cao jab alhab' re phan" to: mung: zaui" ci: na: ra" Mao"So wa zo: dau myo: sho' re yao" phungbao qo" kham: yu nhao nae" qhid' mae" dayin dayo: kham zo: nhao: ra" khyo" yang Yesu re jab byang" nhao: ru wa Mao"So kad' ru gai ang: ra" khyo ngad: ra". Pe"mung:ga"re Yesu wa yao: bam re khyad' yu: ru qhug' sho' jhui" ye" ra" yaug ngad: ra".
11 Yesu wa byu qere yao: bam: qobo mae" kyang" san: pye' byid' ra". Amung: yao: we' yao" yang kyang" san: pye' ru qhug' va" ra" mo, alhab' wa Pho" dayaug za: ngad: ako". Airumung: Yesu wa yao: bam re yao" mao:nhaung: qe ga: mhang" nae"- maqho' ngad: ra".
12 Yao: wa Mao"So re-
Ngo wa nao zaui" lo: ra" lo, mau" re nga" mao:nhaung: qere ta" kyo: nae"-
Yao: bam: zabphaung mae ngo nao re caung:khin" byid: nae"- ga: ta" ra".
13 Yesu wa ngo wa Mao"So re khug ngha: na nae"- ga: re:- amung: Mao"So: yang ngore byid' to" ra" zo: dau qe we' daga" ngo ce: jo, qo mae na: jo;- ga: re: ta" ra".
14 Ai: zo: dau qe wa sa: sho: bo: ra" mo, ngad ko" ruyang Yesu yao: yao: re: yao: bam we' dakhyo: xao su byu: nho: ve, khyao re kham: yu: ra". Yao: ceru: kham: yu: ru wa yao: shid kham: ra" khyo" yang shid: rure eib: na: ra" Satan re phyo' pye' nae" qhid' mae" ngad: ra".
15 Ce: khyo khyo" yang shid: rure gyaug yang: yao: bam: dapyad geim" jeim boe" na ko" ra" mo, re loe; beim nhao: ke' byid' ra".
16 Pe"mung:ga"re yao: wa mug: lagyo: qere bao" thaug' byid: yaug mangad:- Jham: Mugsug' mae ta" to" ru we' dakhyo: yao: wa Abraham: nho: myid:zo: qere bao" thaug' byid' ra" yaug ngad: ru wa de: de: za: ngad: ra".
17 Ceru wa yao: wa byu qenho: qobo jham re qo" khyad' pye' byid: nae" jhaug' zaug: ru we' nhag' khyag' shogu: myid bo: ra" yao: bam: Khinjaung Yin" kad' yang: Mao"So: mau" zo" re caung da" byid: nae" qhid' mae" khyo khe' khao: ngo" mae yao" mao:nhaung: qe we' dakhyo: dau sho' tau" yu ca" ra" ga" ru ngad: ra".
18 Amung: ana" wa- yao: yao: re: ju" phyo' ru qhug' mung: qug: khai: dayin dayo: kham zo" qu" va" yaug ngad: ruyang yao: wa ju" phyo' ru qhug' ra" mo, re qo" bao" thaug' byid' ra".