5
Moshe We' Arun Egutu Kho:kham Khyo Joe" Ru
1 Ai: thao Moshe we' Arun wa Egutu kho:kham pho" jhao" ye: mung:- Israel qenho: Mao"So Asang wa. Yao: bam ngore nga: yhe' byid: nae" din"pyad' yo mae poe dalam: qo" kad' geshao:- nga" byu qere nhao: ke' wa- ga: ta" ra"- ga: yeta" ako".
2 Kho:kham pho" wa- Asang wa khag' ngad: ra" i? Pe"mung: ngo wa yao" dao: re tae" gyo: ang mung:- Israel qere nhao: nae" i? Ai: Asang re ngo maba- ngo wa Israel qere manhao: ke' nae"- ga: ta" ra".
3 Moshe we' Arun wa Hebre qenho: Mao"So wa yao: yao" gaung re ngonhaung" re qhu" byid' ava". Aimung: ngonhaung" Mao"So Asang re xeim: ye ngaui" byid: nae" qhid' mae" ngonhaung" re din"pyad' yo khyo sam ba gyaung: su" ye" lo" nhao la,- ngonhaung" aire makad' re yao: wa no yoga yang mangad: lao" gye: khe' poe: yang ngonhaung" re se' pye' li" nae"- ga: phaug' tau" ako".
4 Kho:kham pho" wa Moshe we' Arun re- ni" shid yaug mo,byu qere pe"mung: mau" gyo kyo" nhao genae" i? Naonhaung" yao" jeim mau" re lo" kad' ge,.
5 Naonhaung" byumyu" wa Egutu byu qetho' je: myo" je" li" avako". Ana" ni" shid' yaug wa mau" zaui: thang: pye' nhao nug genhaung i? ga: ta" ra".
6 Ai: ba re yao: kho:kham pho" wa jeim be; keim" ra" Egutu byu qere we' Israel byu mau" jhui: mo, re-
7 Ai: byu qere zhogam: kad' rumae ci: ra" khovho byid' ra" khyo thang: pye' ge,. Khovho jham re yao: bam re yao: qho: yu nhao ge,.
8 Ngadqere: qhid' phyao: mae" we' dakhyo: zhogam: dathaung: re: mayeim lo: zhogam: jham kad' nhao shige,. Yao: bam mau" malaug: qo" gemung: yao: bam: Mao"So re xeim: ye ngaui" byid: nae" qhid' mae" yao: bam re nhao: ke' nae" ngore mathang mho' na: ako".
9 Mungdao: re tae" gyo: nae" yo, khyin: maqo" gesho'- ce: byu qere maui" phin" zaui: nhao mung: yao: bam re mau" myo: nhao ge,- ga: amyin" byid' ra".
10 Jeim be; keim: mo, we' Israel mau" zaui: mo, wa thug' ye" lo" gemung:- Israel byu qere- kho:kham pho" wa khavho mabyid: lo nae"- ga: ta" ra".
11 Yao: wa- khovho re naonhaung" qo" qho: yu: ra" khyi" mae" yeqho: yu ca" genae". Ngadqere naonhaung" wa zhogam: azhao: mae" nho" yao: kad' ca" genae"- ga: ta" ra"- ga: yeta" kyo" ako".
12 Airumung: mo,byu qe wa Egutu mung" alhab' mae jao: sho' khovho qho ye" lo" ako".
13 Jeim be; keim: mo, wa ba khao: ngo" khovho byid' au: mae" we' dakhyo: yao: bam re maqad maqui" mau" jhan" ako".
14 Egutu jeim be; keim: mo, wa yao: bam: yang mau" zo" mae jhui" au: she nae" ke' to" ra" Israel byu qere be; ako". Yao: bam wa naonhaung" wa qhid' phyao: kad' ra" nho" zhogam: jham re pe"mung: makad' ko" i? ga: ta" ako".
15 Ailao" mau" jhui: mo, wa kho: kham pho" jhao" ye: mung:- kho:kham pho" we"- nao ngonhaung" re pe"mung: ceru: kad' i?
16 Ngonhaung" re khavho mabyid: ngadqere: nao wa zhogam: re kad' nae" amyin" byid' ra". Ana" ngonhaung" wa be; ru qhug' zo" na va"- ni" byu qe qobo qo" ako" ga: nyhung: ako".
17 Kho:kham pho" wa- naonhaung" wa noe" mung: mau" manug: zaui: ko" ngad: ra". Ce: mathao mae ngonhaung" wa Asang re xeim: ngaui" byid: nae" qhid' mae" naonhaung" re nhao: ke' nae" ngore mho' ako".
18 Ana" mau" lo" dam: zaui: ge,- naonhaung" re khovho dajhid' re: mabyid: lo nae". Ngadqere: naonhaung" wa zhogam: jham ainho" yao: kad' qo: ako" ga: tau" ra".
19 Mau" jhui: mo, yao: bam qhid' phyao: kad' ra" nho" ba khao: ngo" zhogam: jham kad' ca" ga: yao: bam re ta" rure gyo: gelao"- yao: bam qug: khai: qhug' va" rure myid: beim" ako".
20 Yao: bam kho:kham pho" mae" thug' lo" na ko" au:- yao: bam re lao" na ko" ra" Moshe we' Arun re yao: bam loqhug' ako".
21 Yao: bam wa Moshe we' Arun tao re Asang wa ni" shid' tao kad' ra" mau" zo" re myao: ava"- aimung: kho:kham re we' yao" zug: qe ngonhaung" re nghang: gesho' kad' ko" ru qhid' mae" ni" shid' tao re qobo dae byid' li" nae". Ni" shid' tao wa ngonhaung" re se' nae" akhyo qho byid' avako"- ga: ta" ako".
Moshe Asang Re Nyhung: Ra" Khyo
22 Ailao" Moshe wa Asang shad' khyo phaug' lo mung: Asang we" nao wa ni" byu qere pe"mung: mangad' ra" khyo" kad' i? Nao ngore cekhyo pe"mung: nhao: ke' i?
23 Ngo wa ni" qhid' mae" kho:kham pho" re ye jhau nae" ye" ra" ba na mae" kho:kham pho" wa yao: bam re gyai thin: ra" khyo" se' da: be, khyad' kad' ra". Nao wa yao: bam re bao" thaug' yu nae" pe" makad' ngad: ra"- ga: ta" ra".