4
Mao"So: Mug' Pho: Qam: So' Moshe Re Byid' Ru
1 Ailao" Moshe wa Asang re- Ngadqere: Israel qe wa ngore malam" ru we' ngo ta" ra" dao: re matae" gyo: gyo: lo: kad' gemung: yao: bam wa nao ngojhao" mali" na: qhu" byid: ngad: ra" ga: ta" geyang: ngad: re ngo pe" ru: kad' nae" i? ga: tau" ra".
2 Ailao"- Asang wa yao: re- nao pe" zaui" ci: i? ga: myid' ra".
Yao: wa ai: zaung: bao" ngad:- ga: tau" ra".
3 Asang wa- aire myid gaung khyo shapye' ke' wa- ga: ta" ra". Moshe aire shapye' khyo" ke' lao"- ai: zaung: bao" wa lhao maui boe" li" mung:- Moshe wa aimae" tao" phao: lo" ra".
4 Ailao"- Asang wa Moshe re gam" mung: aire shomyi: mae" gaug: yu wa,- ga: ta" ra". Airumung: Moshe wa gam: gyo" mung: aire taung" yu: ra" aiwa zaung: bao" dam: boe" li" ra".
5 Asang wa- yao: bam: phug' pho" qe ngad ko" ra" Abraham- Isag- Yaku bam: Mao"So ngad: ra" Asang wa nao jhao" li" na: qhu" byid: ra" va" ra" khyo re sagse: qhu" byid: nae" qhid' mae" cere kad' qhu" wa,- ga: ta" ra".
6 Asang wa Moshe re ni" lo, re ni" nho: bau: qhang khug mae ke' ke' wa,- ga: dam: ta" ra" Moshe wa aire tae" gyo: mung: yao" lo, re ke' ra"-amung: yao" lo, re phoe' thug' ke' lao"- gyu: we' dakhyo: dau: ra" aphyu alhang" lhang" mung: no boe" li" ra".
7 Ai: thao Asang wa- ni" lo, re ni" nho: bau: qhang khug khyo dam: ke' ke' wa,- ga: ta" ra". Yao: wa airu: kad' mung: celhang re yao" lo, dam: phoe' thug' ke' lao"- yao" gaung gakhyi" we' dakhyo: agai zang boe" lo" ra".
8 Asang wa- yao: bam nao re malam" mangad: lao"- sao qhid' mae" mug' pho: mau" re malam" genae". Ailao" ce: ja: wa yao: bam re lam" nhao: li" nae".
9 Yao: bam wa ce: mug' pho: shid' ja" yang re: nao re malam" shi lo:- nao ta" ra" dao: re ha: pye' shige yang: ngad: re wa Nila gyaung mae" qid dajhid' re khae: yu mung: aire myid gaung khyo vhe' khyo" ke' wa,- ai: qid wa sa: boe" lo" byaug: li" nae"-ga: ta" ra".
10 Ngadqere: Moshe wa- Asang we"- mangad: ngore danhao la,- ngo wa khonhae" re: dao: jhau gai yaug mangad' qu"- nao ngo jhau: qhid mae" yao: ngo wa dao: jhau gai yaug: maboe" ngad: ra". Ngo wa dao: jhau gai yaug mangad: rure we' nhad' dang la: yaug ngad: ra"- ga: tau" ra".
11 Asang wa yao: re- byu re nhad' khoyaug: yang byid' to" ra". Yao: re nojid- mangad: lao" nhad' jid khoyaug yang boe" nhao: ra" i? Myo, myao nhao yaug wa myo,jid nhao ru khoyaug ngad: i? aiyaug wa ngo Asang ngad: ra".
12 Ana" ye" lo" wa,- ngo wa nao re dao: jhau: bao" byid: nae" nao pe" ta" nae" rure ngo ta" nae"- ga: ta" ra".
13 Ngadqere: Moshe wa- Asang we" mangad: nae"- jeju khyo" gatau dayaug re nhao: ke' wa,- ga: phaug' tau" ra".
14 Cedao: re Asang wa Moshe re nhag' yo mung:- Levi ngad: ra" ni" mao: Arun na: mangad: i? Yao: nyang" za: dao: ba: jhau: rure ngo ba: ra". Ana" yao: wa nao re li" tug: yu nae" qhid' mae" li" na mung:- nao re the' myao: mung: ngaui: bau" li" nae".
15 Nao wa yao: re pe" ru: ta" nae" rure yao: re ta" kyo: wa,- ngo wa ni" shid' yaug geim" re dao: jhau: rumae boe" byid: mung:- pe" kad' nae" rure ni" shid' yaug re ta" kyo: nae".
16 Yao: wa ni" nho: dao: jhau yaug ngad nae". Aimung: yao: wa ni" qhid' mae" mo,byu qere dao: jhau byid' li" nae". Ailao"- nao wa Mao"So we' dakhyo: dau mung:- pe" ru: ta" nae" rure nao wa yao: re ta" li" nae".
17 Ce: zaung: bao" re nao we' daga" ci: lo" wa,- nao wa ceru yang mug' pho" mau" kad' li" nae"- ga: ta" ra".
Moshe Egutu Mung" Khyo Dam Tug' Lo: Ra" Khyo
18 Ai: thao re Moshe wa yao" Yaug pho" Yethro jhao" dam: tug' lo" mung:- yao: bam daui: na shiko" laug- Egutu mung" mae na ko" ra" nga" amyu" ba nam ug zo: qere lo" qu" nae" qhid' mae" jeju khyo" ngore tug' lo" nhao la, ga: yao: re ta" ra".
19 Yethro wa myid vang" mung: yao: re au" ke' ra". Moshe Midian mung" mae na jo, shi" au:- Asang wa yao: re- Egutu mung" khyo tug' lo" wa, pe"mung:ga"re nao re se' pye' nug: ra" mo, alhab' shid: avako"- ga: ta" ra".
20 Airumung: Moshe wa yao" yham sang myhi" we' yao" yauggai zo: tao re jhui" yu mung:- loze dao mae zhaung yang: yao: ma: ho' we' daga" Mao"So: yang ci nhao: ra" zaung: bao" re ci mung: Egutu mung" khyo ye" lo" ako".
21 Asang wa Moshe re- ana" nao wa Egutu mung" khyo tug' lo" na: ra". Nao re ngo byid' to" ra" qam so' re ci yang:- mug' pho" mau" ve,lho alhab' re kho:kham pho" qhid' kheim: re kad' qhu" nae" rure myid: beim: wa,. Ngadqere: ngo wa kho:kham pho" re nhag' lam: qao nhao nae". Amung: yao: wa mo,byu qere nhao: ke' byid: nae" mangad:-
22 Ai: thao nao wa yao: re- Israel wa nga" zoqhid' yauggai zo: ngad: ra".
23 Yao: ngore qo" caung:pa" byid: nae" qhid' mae" nga" zo: re nhao: ke' byid: nae" ngo nao re ta" ra"- ngadqere: nao ha: pye' ra". Ana" ngo wa ni" nho: zoqhid' yauggai zo: qere se' pye' nae"- ga: Asang ngo ta" ra" ein: yeta" kyo: qo: ra"- ga: dam: ta" ra".
24 Egutu mung" ye: khyo mae ai: thang: ra" jo, qo mae Asang wa Moshe re li" qhug' mung:- yao: re se' nae" seim" ra".
25-26 Ailao" yao" yham sang myhi" Zippora wa tho' ra" laug baui dalam: re gaug: yu mung: yao" yauggai zo" nho: au: qid re lhai" phyid' mung:- ai: yang Moshe' nho: khyid mae tin: byid' ra". Pe"mung:ga"re au: qid lhai" ra" khyo mathao mae yao: wa Moshe nao wa nga" nho: sa: yham sang pho" ngad: ra"- ga: ta" ra". Airumung: Asang Moshe nho: kao so' re tang" to" ra".
27 Ai: ayo, mae Asang wa Arun re- Moshe re yetug: yu nae" qhid' mae" din"pyad' yo khyo ye: wa,- ga: ta" ra". Airumung: yao: wa gyang" lho" ra" bam mae Moshe re ye qhug' ra". Yao: Moshe re yeqhug' lao"- yao: re bobaug: baug: ra".
28 Ai: thao Moshe wa Asang yao: re Egutu mung" khyo tug' lo" nae" ta" ra" au:- Asang yao: re ta" gu: ja: khao: ngo" re Arun re ta" kyo" ra". Moshe wa yao: re Asang: yang kad' nae" qhid' mae" amyin" byid' ra" mug' pho" ve, lho jham: khyo rere: Arun re ta" kyo" ra".
29 Airumung: Moshe we' Arun wa Egutu mung" khyo ye" lo" mung:- Israel byumyu" au: jhaung qe alhab' mo, re khai: zhang" yu: ra".
30 Arun wa yao: bam re Asang: yang Moshe re ta" to" ra" gu: ja: khao: ngo" re ta" kyo" ra". Ai: thao Moshe wa mo,byu qe: qhid' kheim: mae mug' pho" ve,lho alhab' re kad' qhu" byid' ra".
31 Yao: bam wa lam" ako". Asang wa yao: bam jhao" joe" li" mung:- yao: bam khoqhi" xo sho' yhin" ru qhug' na ko" rure Asang the' myao va"- ga" ra" khyo the' gyo: gelao" yao: bam wa goe; gyo" mung: caung:pa" ako".