TIMOTHI
JHANG FOIN: KAID DA" MOUGSOUG" DALOEM:
(1Timothy)
Timothi gi Asi nge loem: mo, Khristain void, yam" zoolu: zoo: dayug nghoid. Nya: phoo gi Greek byumyu" nghoid- nya: myhi' gi Yuda byumyu" nghoid nyid. Nyhang: gi lagyoo: Polu jhang moo cang lho: Mangso moo" bo pang" zei: su: nghoid. Lagyoo: Polu gi Timothi jhang khyoo: mougsoug" lhid" kaid uri khyoo: zeing soem" khaid khyo" lhid". Dakhaid moo Phoung: khoug: moo anhung' akhoid, ga: jhau" byid: da" khyoo: ri lhid nhang: khyoo: nghoid. Hidsu" shoid khyo" jhau" byid: khyoo: gi myojid" yo' shau" myang da" he: mougmyid gi akhyeing" ashoeb zi nghoid nyid wigi byu dayug khyoid yu zi shau" wa shid rigi goo" ki" lid' yau: nyid ziyo' no, da" phajhi" yoo" ca" tho' moo gootu- zoo: noem dayham" ri khyen:" ca" ziyo' deungkhu: age qei" ga: ziri azeing' koid wigi- loem" jeing" da" khyoo: nghoid boem ago". Eig khaid ein: jang" moo gi Phoung ri vhoeb khang" jang" moo noku akyu" mho' da" khyoo:- hau" lho: phung ri shu" vhu" shi: bang: yo' bo pang" thoug mo, da" avoid, asam" joem khyoo: yo' sen: lho: bo jo. Lo" Thang loem: moo gi Timothi gi Aseing Yesu da" lagyoo: dayug khasu" bue" lo da" khyoo: yo' loem" jeing" lho: phung khoug: moo bo da" myiyi: yuggi yiri apyaid khyo" cang lho: nyang: khasu" shu" vhu" shi: wa yoovoin, bo da" khyoo: yo' sen: da" phajhi" byid: to" khyoo: joem bo nyid. Dang: gung gi hau: khyoo: gi Yuda byumyu" yi myid yu" da" khyoo: yo' Yuda byumyu" anghoid bang: myid yu" da" khyoo: joem ri lhu: lheug to" da" jhau" shid khyoo: joem nghoid.
1
1 Ngoonu" ri khyoid khyi: yu da" Mangsoo yo' ngoonu" da" nheig byu jang: nghoid nyid da" Aseing Yesu da" khyoo: yoomo lagyoo: nghoid nyid da" ngoo Polu gi
2 Hau: da" loem" jeing" khyoo: moo nga" da" zoo: gyeing" nyang: nghoid da" Timothi jhang khyoo: mougsoug" lhid" foin: kaid. Phoo Mangsoo yo' ngoonu" da" aseing: Yesu Khristu jhang mo jeju" yo' nheig khyeug nheigloem: mo, ngei pyo: khyoo: gi main shau" kham: yu baja" o".
3 Ngoo Makedoni mung" khyoo: yhe: lo" uri nang ri ngoo pyeing: too" kho' ziyo' dakhyoo" ti" Ephesu voogung moo nang ri xo' nyid nhang: noug shi"- hau: khyi mo byu dayham" shoid da" loem" jeing" khyoo: ri jhau" byid: nyid boem. Hau: khyoo: ri nang gi toem pyam lho: noo: nhang: ca.
4 Gyeing" nyang: bue" yu" bye: da" mhoomyid: shen" dam, joem phoug" phyid" yi da" byuxeig shab da" khyoo: ri to" no: pyam boem wa shid re" nyangnu" ri tid poin" we. Hau: khyoo: joem gi myeing" myoo: yhoo: she:- byo, goo" ngeug go" da" khyoo" riza: dabue" thu' loo nhang: nyid wigi loem" jeing" khyoo: khyo" za: dayo" se' da" Mangsoo nyheung soin' da" khyoo: ri ayo" bui" nhang: nghoid nyid da.
5 Hidsu" pyeing: to" da" myid soin khyoo: gi gyeinglho' nheigloem: khoug: mo thu' lo da" phug soo" lheig se' myid yu" da" emyed yo' akug ase' void da" loem" jeing" khyoo: mo thu' lo da" jheddab da" nheigloem: ri nhau" to' kaid wa shid re" nghoid nyid.
6 Byu yi dayham" bang: gi hau: da" khyoo: joem mo- vhang: lo" boem wigi akoo" apyoid, ga: ngeug byo, go" khyoo: moo nyangnu" da" myid soin' khyoo: ri ci: phyoug pyam boem abye: go".
7 Nyangnu" gi Mangso tarha" ri jhau" byid: mo, bui: nau boem nghoid loug we' nyangnu" gi gye" jo, boin: lho: tid nyid da" dang: khoin" joem rilang" gi nyangnu" ase' gyo: boem nghoid ago".
8 Hau: toung: to" da" tarha" gi jo eung: khyoo" ci: yhoung: nghoid rigi ge zi nghoid khyoo: ri ngoonu" se' nyid boem.
9 Gyeing" nyang: ein: rigi ngoonu" se' gyo: too" ca" da" khyoo: gi hau: toung: to" da" tarha" gi byugi yi shid re" anghoid. Tarha" ri shoid nyid mo, yo' yooboo yoo" bang: Mangsoo ayoo" mo, yo' yooboo dab bang: loemkhau: da" noku thung ri acang bang: loem" jeing" khyoo:- hougsu" anghoid lang" gi Venyi: khyoo: moo nheigloem: aboo mo, nyang: nya: myhi' phoo' yi ri said pyam bang: yo' byu ri said mo,
10 Nheigloem: avoid agi bang: myi: yi nyang: cang" yuggi nyang: cang" yau: shoo: goo" bang: byu myheug yhoem" to" lho: ngei yo' doem khyoid yu nhang: bang: mhau' lho: adeung amain" da" sagsi kham bang: ce: ja" khyoo: moo we' hau: loem" jeing" da" khyoo: yo' azhung" goo' mo, shid re" koid to" da" tarha" nghoid nyid.
11 Hau: jhau" shed da" khyoo: gi myonhoo: phung" yoeb, bo lho: wigi ngi: lho' da" Mangso jhang mo, ngeibu: lu dang: yo' dakhyoo" ti" nghoid- hau" ngeibu: dang: ri tid fu" wa shid mo Mangsoo gi ngoo ri ab, byid: too' bye:.
12 Ngoo zei: voin vu, nyid da" moo" zo" shid mo ngoo ri yoemso lung: byid: nyid da" nyha" da" Aseing Yesu Khristu ri jeju" boin: coung" ngei nyid. Nyang: gi ngoo ri moin: yi" su: nghoid ga: soin: yu wigi nyang: ri noku coung" ngei wa khyen: nyheung to" zi shau" yoomo we' nya: jeju" ri boin: coung" nghei nyid.
13 Ngoo koem' gi lid loo bye: da" ayo, moo Aseing ri age khyo" yooboo foin:- juang" yi pyi: sho: shen" yhen ziyo' rue" lid lo yu" su: nghoid, nghoid loug we' Mangsoo gi ngoo ri nheig khyeug nyid shi"- Khasu" wim ga: ri ngoo moo loem" jeing" da" myid aboo shi" yoomo ngoo cikoid nyid ziri" ngoo nyang: asi.
14 Yha" Aseing gi nya: da" athang agoin da" jeju" ri nga" tho' moo foid, gyoin: byid: wigi Khristu yo' dadeing: daloem: za: bue" lo" lho: kangso shau" dei nyid yoomo ngoonu" yo" yu eung: da" loem" jeing" khyoo: yo' jheddab nheigloem: ngoo ri byid: too" bye:.
15 Yooboo dab mo, ri khyoid yu wa shid re" Yesu Khristu gi mougmyid khyoo: ju" ri bye: ga: da" dang: khoin" gi goolhoo' nyang: kham: yu ge ziyo' loem ge" da" dang: khoin" nyang: nghoid bye:. Hau: yooboo dab bang: moo ngoo gi gyi: thang da" yooboo dab su: nghoid nyid.
16 Nghoid loug we' Mangsoo ngoo ri nheig khyeug yu da" khyoo: gi thang: phyang" pyaid Aseing ri loem" jeing" wigi apyaid ato: kangso yo" yu wa bang: dangain" mo, shid re" yu" yu ge da" khoo" shid: daloem: bue" jo, baja"- Khristu Yesu gi ngoo yhang: te" da" yooboo yoo" mo, mo ca" thang su: da" atho' moo nya: da" nheigloem: gyi: sheung: kham zeung: khyoo: ri toin" shid byid: nyid zi nghoid.
17 Akhe" apyaid atoo: mo Khokham" nghoid wigi abyo, pyam khyoo: ri myojid" yo' ayo" myang- dayug kyeung" da" Mangso jhang moo myonhoo: phung" yoeb, bug thu sheing" jhu" khyoo: gi apyaid atoo: moo dajo, jo, baja"- Amen.
18 Nga" zoo: Timothi we"- lid loo bye: da" ayo, moo nang ri zhoo: gyi: kho" kyo" da" lapi: dang: joem yo' dakhyoo" ti" voin vu, kho" kyoo" wa da" amyeung" ri ab, byid: bye:- goo" lhoo: yo" zain: oung: loo" wa shid re" hau" lapi: yi tid to" da" mungdang: joem ri gyizi, gyizuang ti" daci: yhoung nyid we.
19 Hau: tho' moo gootu: nang moo loem" jeing" khyoo: yo' phug soo" lheig se' da" nheigloem: bo jo, baja". Byu dayham" bang: gi houg: yhang: te"- phug soo" lheig se' da" nheigloem: soozoo: wigi tid poin" tid kyeung' ziri atam" gyo: boem yoomo nyangnu" da" loem" jeing" nheigloem: ri lhu: phyo' pyam boem ago".
20 Nyangnu" ri satan da" lo, moo ab, pyam byid: khyo" wigi ngoo shen" yhen da" Humeni yo' Alesandru ga: da" eig yug we' bo ago". Hougsu" koid da" khyoo: gi nyangnu" tid da" nheing" myeing" nheing" thui: gi sube" gei sang: shang pyang: byid: da" khyoo: ri to" pyam goo" baja"- ein: jhau" byid: da" khyoo: nghoid.