3
1 Ngoonu" da" mangnhung" yi we"- lo" thang moo nanu" ri pyeing: kaid nau da" khyoo: gi Aseing da" mungdang: gi nanu" moo bue" lo yhang: ti" xo' lho: wigi gye" myab, khyo" byo ngam loo" wa shid re" phoug" tab zoore kham: yu goo" baja"- ngoonu" shid re" akyu" bo mho' byid: nyid ge.
2 Mangsoo gi ngoonu" ri akhyeing" ashoeb da" age byu yi da" lo, mo khyoid yu baja" akyu" mho' byid: ge'. Khasu" wim ga: ri hau" ngeibu: lu dang: ri byu yug khang" moo" loem" jeing" boem zi anghoid.
3 Nghoid loug we' Aseing gi ung: gyeung: su: nghoid nyid yoomo nyang: gi nanu" ri nheigloem: yoem: byid: lho: akhyeing" ashoeb bang: gyi koid lo jangmo zung" lhug byid: wa nghoid.
4 Ngoonu" tid pyeing: too" mootoo" dangain" ri nanu" zei: nyid bye: ziyo' dakhyoo' ti" xo' lho: we' zei: lo" boem, goo" wim bye" ein: we' nau" da" atho' moo ngoonu" nheig shid: nheigdeig, ziyo' loem" nheigloem: ri Aseing gi ngoonu" ri byid: bye:.
5 Nanu" gi Mangso da" jheddab nheigloem: ri je" wigi se' gyo: loo wa shid re" yo' Khristu byid: da" yoem: kaid thoug shang" da" nheigloem: ri je se' gyo: loo wa shid re" we' hau" Aseing gi nanu" ri shu" vhu" she: nyid baja.
6 Mangnhung" yi we"- nei" zoore kangso dei nyid bang: dangain" yo' we' ngoonu" jhau" byid: khyoo: ri acang lo" bang: yo" we' azoem" goo" loo- gootu: sain' sain' koid nyid wa shid re" we' Khristu da" myeing khyang" kyo" nanu" ri ngoonu" tid poin" kaid .
7 Nanu" gi ngoonu" koid shug da" khoo' shid: yo' dakhyoo" ti" cang zei: loo" ca" boem da" khyoo:- nanu" nyang: goolhoo: se' nyid boem bye:- nanu" yo' dage" ngoonu" nyid shi" uri ngoonu" gi nei" da" khoo" shid: ri atoin" shid boem.
8 Ngoonu" gi ce: aphoug" abyid: loo: za- hang" da" zoo: noem ri: we' ayu zo: yu" boem- hau: tho' moo ngoonu" gi hang" ri we' yoo lid: afoin: baja" ngoonu" nyang: nyid" ri we' myen" ri we' bakyu" thu lho: moozoo" ri zei: lid lo yu" boem bye:.
9 Ngoonu" hid: su" koid lo da" khyoo: gi ngoonu" gi nanu" jhang mo mho' wa da" akhang" ayoo" yoomo we' anghoid- nanu" bo cang zei: wa khoo" shid: bue" nyid baja" ein- dakoid boem.
10 Nanu" yo' dage" ngoonu" nyid nyid shi" uri Moo" zoo" jid: zoo' anau zei: su: gi voem: we' azoo: baja", ein: wigi nanu" ri ngoonu" tid yu" boem bye:.
11 Ngoonu" gi he: da" khyoo: ri ci: wim tid lha"? ga: rigi nanu" mo byu dayham" bang: gi nei" lho: kangso' dei nyid boem wigi ce" moo" we' azei: boem loo; za: byu gooji da" moozoo" moo vang lhu: nhoung, yen" bang: nyid se' boem ziri ngoonu" shau" gyo: nyid.
12 Houg: su" koid yen" da" byu yi gi goolhoo' nyid lho: wigi nyang: tu: nya: da" voemdoug: khu: moozoo" ri zei: nyid boem lho: kangso dei nyid boem goo" baja"- ein: wigi Aseing Yesu da" myeing khyang" khoug: moo ngoonu" pyeing ziyo' zid" nhang: kaid.
13 Nghoid loug we' mangnhung" yi we"- nanu" ge da" moo" ri: zei: wa shid re" myung: soo' doug asoo" goo".
14 He:da" mougsoug" moo nanu" jhang khyoo:- ngoonu" lhid" foin: kaid da" mungdang: ri atam" gyo: da" byu dayug yug nyid nghoid rigi nyang: ri xoem" to" lho: nyang: sho' thu' byug baja"- nyang: yo' azoem" goo" loo: goo".
15 Nghoid loug se' nyang: ri gyivoo phoo' ri yhang: ti" gi asoin: too" goo mangnhung" phoo dayug ri yhang: ti" zid" lhid nhang: lho: tid poin" tid kyeung" nyid ge.
16 Nyha" da" ngei pyo: apoem: nghoid nyid da" Aseing gi nanu" ri khanham we' khyoo: khaid khang" moo" moo ngei pyo: khyoo' dabyid: nyid baja".
17 Ngoo nya: lo, yo' nyang:- vhoo: moo lhid" to" ziyo' dakhyoo' ti" ngoo lhid" zi nghoid- vhu" kaid su: gi ngoo Polu, mougsoug" khang" moo" moo nga" da" lo, lhid" laxoem" gi he: zi nyang: nghoid bye:- hid: gi nga" da" moug: soug" lhid" da" lid nyang: nghoid bye:.
18 Ngoonu" da" Aseing Yesu jeju" gi nanu" dangain" bang: yo' dabo jo, baja" o".