29
1 Israela byumyu" yi Yezrela langkhung" gyid gyung: zoo: ayam moo dab koid lho: nyid boem ri Philisti byumyu" yi we' nyangnu" gyiphung: ri Aphed joyoo moo zeing: foem: nyid nhang: da:.
2 Philisti khokham wim: yug gi nyangnu" da" gyizoo: dashoo:- gyizoo: dakhyeing" ga: kho' to" ziyo' dayhang: ti" jen re" nyid boem. David yo' nya: byu yigi thang: moo: khokham Akhisha yo' dage" cang re" nyid boem.
3 Philisti gyizoug: yi nyangnu" ri myang lang" �He: da" Hebre byumyu" yi hid: moo: cire" koid nyid lha"� ga: myid:. Akhisha gi �He: yug gi Israela khokham Sholu da" zoug: David ga: su: nghoid. Nyang: ngoo yo' nyid zi dajhi myang" bye:. Nyang: nga" jang" moo ju" re" da: nyid" mo yooboo foin: pho" moo" zoo" ciwe' akoid nghoid da� ga: tid.
4 Nghoid loug we' Philisti gyizoug: yi Akhisha ri nheig yo: ziyo' nyang: ri �Nang nyang: ri byid: to" da" voogung khyoo: nyang: ri doem yhe: de" pyam we'. Nyhang" yo' dage" meing: zain: pa: khyoo: acang re" nhang:. Meing: zain: nyid uri nyang: nyhang" ri doem phug zain: wa zi nghoid. Nyha" byumyu" yi shid: thang: ri nya: Aseing da" myonhoo: gyi: nhang: tho' je" ge zi nyang: moo: ciboo shi" lha".
5 Sholu said pyam zigi khyeing" khyeing"- nghoid loug we' David said zigi moin moin ga: myiyi: yi go" wigi jikhoin" khoin" nyid zigi he: David ga: yug nghoid� ga: tid.
6 Akhisha gi David ri khe: yu lho: nyang: ri �Nang ngoo ri dang zung" nyid ziri we' he: meing: zain: pui" moo nang yo' dage" yhe: zain: wa shid re" nang ri ngoo myid veing" ziri we' nang nga" jhang ju" bidnyid mo zi akhid" nyid" ju" sho' ce: yooboo amyang ziri we' Israela byumyu" yi da" kangso' Aseing Mangsoo jhang ngoo jham tang too" bye: zi nghoid. Nghoid loug we' gootu: khokham yi nang ri avhoo: goo" nghoid da:.
7 Hougsu" yoomo yhoem: khyoo: myenjham" tung" doem tau" loo" we'. Nyangnu" ri myid apyo: khyoo: ciwe' akoid lhe"� ga: tid.
8 David gi �Ngoo ce: noem shoid bye: lha" aseing we". Nang tid yhang: ti" ngoo nang ri xang: shi" dei byid: nyid" mo akhid" nyid" ju" sho' nga" adang moo: nang yooboo ciwe' amyang nghoid rigi nga" aseing yo' khokham nghoid da" nang yo' dage" re" gyivoo ri ngoo ciwim yoomo ayo" bo vang zain: wa lha"� ga: tid.
9 Akhisha gi �Ngoo gi myid veing" zi nghoid. Mangso da" lagyoo: dayug yhang: ti" dang: zung" nyid zigi ngoo se' nyid zi nghoid. Nghoid loug we' gootu: khokham yigi ngoonu" yo' dage" meing: zain: pa: khyoo: ayo" vang ga: tid nyid boem.
10 Houg: yoomo David we"- nab yo nyid" gi Sholu jang" mo phang: thu lo wigi nga" jang" moo re" nyid bang: dangain" nab soin: no' mo to' lho: myo, myang yo' dage" tau" loo" loo: ge'� ga: tid.
11 Houg: yoomo David yo' nya: byu yigi thang: nab kyoo' no' mo to' lho: Philisti mung" khyoo: tau" yhe: loo" bye: ziyo' Philisti byumyu" yigi Yezrela joyoo khyoo: doem so" yhe: lo" boem bye:.