26
1 Zipha voogung mo voobyu dayham" gi Gibea moo: nyid da" Sholu jhang khyoo: re" wigi Yuda dain" pyoid mougkyoo" nam mo Hakhila boem moo: David gau" nyid ziri re" tid kyo" boem ago".
2 Sholu gi Israela byumyu" mo reung: thang da" gyizoo: soem: khyeing" ri shu" ci: kho' wigi David ri cang shoo: wa ga: Zipha kyoem: khoug: khyoo: dalheing: dam yhe: loo" khari" lho:
3 Hakhila boem khyoo: yam moo: dab koid nyid boem ago". David koem gi dain" pyoid moo: nyid nyid shi" yoomo nyang: ri cang shoo: wa shid re" Sholu ju" bye: ziri nyang: si' lang"
4 Sholu hau: joyoo moo gyeing" nyang: nyid khyoo: yhe: cang shoo: wa shid re" jooyu" mo, ri David nhang: bye:.
5 Nyang: gi Sholu yo' nya: gyizoug Nera da" nya: zoo: Abna yhoeb da" joyoo khyoo: daleing: doem yhe: loo" khari" bye:. Sholu gi nya: dab khoug: moo yhoeb jo,. Nya: byu yigi nya: ayam lheing khoem moo dab koid lho: nyid boem ago".
6 Hau: thang: David gi Hiti byumyu" Ahimeleg yo' Yoab da" nya: nhung" Abishai (nya: tang da" nya: yhid gi Zeruia nghoid da) tang: ri �re" tang mo kha: yug gi ngoo yo' dage" Sholu dab khyoo: yhi: wa la"� ga: myid: lang" Abishai yug gi �ngoo cang wa� ga: tid da:.
7 Houg: lang" David yo' Abishai gi Sholu da" dab khyoo: hau: myen ri vang yhe yu" ri nya: vhuloem phyoo" mo lham: ri myidjang moo zhug to" wigi dab agung moo Sholu yhoeb jo, ziri yhe: myang boem ago". Abna yo' gyiphung: yigi nya: ayam lheing khoem cang yhoeb jo, boem ziri yhe: myang bye:.
8 Abishai gi David ri �Mangsoo gi re" lo, khyoo: re" da" gyivoo ri akhid" myen ab byid: bye:. Akhid" ngoo nya: lham: yo' nyang:- myidgung khyoo: kyang sho' dalheing: dam ngoo nyang: ri goin kyang pyam ba. Eig lheing: nyang" apug goin ca" wa nghoid� ga: tid da:.
9 Nghoid loug we' David gi �Nyang: ri yo" noo nhang: wa zi anghoid. Nyang: khyen: too" bye: da" khokham ri noo nhang: su: ri Aseing gyeing" nyang: dam byid: wa zi nghoid.
10 Xo' lho: David gi hau: Aseing dei nyid ziyo' dayhang: ti" hau: Aseing nyang: Sholu ri said pyam wa zi nghoid. Hougsu" anghoid lang" nya: ayo, ju" lang" shid: wa zi nghoid. Hougsu" anghoid lang" meing: zain: jang moo: yhe: shid: wa zi nghoid.
11 Aseing nyang: khokham bui" nhang: bye: su: ri noo sho' koid wa shid re" ngoo yoem: kaid eung: nghoid loug we' Aseing nyang: toem nyid zi nghoid. Nya: lham: yo' gyid byang ri yu lho: doem loo" looshang� ga: tid da:.
12 Houg: yoomo David gi Sholu da" vhoem" thung lo, yo shoid moo to" da" lham: yo' gyid byang ri yu lho: nyang: yo' Abishai doem thu' loo" khari" bye:. Dayug we' hougsu" bue" khyoo: ri amyang kaid goo" nghoid da:. Ciwim ziri we' ase' kaid nghoid ago" da:. Hang" we' aboin: nghoid ago". Hau: Aseing nyang: nyangnu" ri yhoeb moo" myid" sho' yhoeb nhang: yoomo nyangnu" dangain" aboin: asoo" yhoeb pyo: nyid boem ago".
13 Hau: thang: David gi lang: khung" thei: tab khyoo: dab lo" lho: soo" soo" ve: da" boem gung khyoo: do, lo" wigi
14 Sholu da" gyiphung: yo' Abna ri �Abna we" nang nga" thui: ri shau" gyo: la"� ga: yoid tid da:.
Abna gi hougsu" yoid nyho: wigi khokham ri nhau" nyid zigi hang" nghoid la' ga: myid: nyid da:.
15 David gi �Abna we" nang gi Israela byumyu" yi moo gyi: thang su: anghoid rhe". Hougsu" nghoid ri re" aseing: khokham ri nang ciwim yoomo ayo" lhoug zung" la". Re" aseing: ri said pyam wa shid re" byu dayug dab khoug: khyoo: akhid" za: vang loo" khari" bye:.
16 Abna we" nang gi re" moo" ri loem: alug nhung:. Hau: Aseing wigi khokham aya: byid: to" da" re" aseing: ri nang nyeing" za: azung" lhoug yoomo nanu" dangain" gi shid: eung: nyid zi nghoid ein: kangso' Aseing moo: ngoo jham tang: too" bye: zi nghoid. Yu" we' khokham da" lham: khayoo: la". Nya: vhoo" loem nam moo jo, da" gyid byang khayoo: la"� ga: tid da:.
17 Sholu gi David da" thui: ri se' gyo: ziyo' �Nga" zoo: David we"- hau: zigi nang nghoid nyid anghoid la"� ga: myid: lang"
David gi �Nghoid- Myhang: thang aseing we"� ga: tid.
18 Xo' lho: David gi �Aseing we" re" dei zoo: ri ciwim yoomo cang khaid nyid yen" shi" la". Ngoo cinoem koid shoid bye: la". Ngoo cite" youg: koid shoid too" bye: la".
19 Myhang: thang aseing we" ngoo tid wa ziri tam" gyo: yu" we'. Aseing gi nang ngoo ri thougtheung wa shid re" re" myid ri thid nhang: nghoid rigi nyang: ri ngei" da" xoin" gi nya: myid ri yo" thid nhang: wa zi nghoid. Nghoid loug we' byu joem wigi he: ziri koid nghoid rigi hau: Aseing nheing" zigi nyangnu" adang moo zang" baja". Nyangnu" gi ngoo ri Aseing mougmyid mo zi tungbau yu phara" ri za: yo" no' da" moug: khyoo: yhe: wa shid re" khaid nyid ago".
20 Aseing yo' ve: da" tungbau mougmyid moo ngoo ri said pyam nhang: wa khyo" akoid nyid goo". Israela khokham gi ciwim yoomo ngoo ri khalhid" yhang: ti" said pyam eung: nyid la". Ciwim yoomo nyang: gi ngoo ri kyoem: khoug: mo ngho' zoo: ri yhang: ti" cang khaid beug yen" la"� ga: tid.
21 Sholu gi �Ngoo shoid bye:- nga" zoo: David we" doem loo we'. Nang gi nga" kangso' ri akhamyen nyang: khyam" sa: byid: yoomo ngoo nang ri khanham we' anoo nhang: wa zi nghoid. Ngoo koodoug: moo" zoo" koid bye: nhung. Ngoo hid yhang: te" gyoug pho" moo" zoo" koid bye: nhung:� ga: tid.
22 David gi �Myhang: thang aseing we"- he: zi re" lham: nghoid. Re" byu dayug yug ri re" yu nhang: we'.
23 Aseing gi loem" jeing" bang: yo' deing byeung" bang: ri jhungshug byid: nyid da:. Akhid" nyid" nyang: gi nang ri nga" lo, khoug: moo: ab byid: bye:. Nghoid loug Aseing wigi khokham koid nhang: to" da" nang ri ngoo noo nhang: wa zi anghoid.
24 Akhanyid" Ngoo re" kangso' ri Lhoid pyoin' kaid yhang: ti" Aseing we' yau: khi" dangain" jang" mo houg yhang: ti" ngoo ri: lhoid kaid wa zi nghoid.�
25 Sholu gi David ri �Nga" zoo: we"- nang ri Mangsoo mainkaid byid: nyid baja". Nang zei: lho' moo" zoo" dangain" oung: doid nyid baja"� ga: tid.
Houg: yoomo David we' nya: khyoo: khyo" thu' lo" ziyo' Sholu we' yhoem: tau" loo" bye:.