2
1 Hana akyu" mho' khyoo: gi
�Aseing gi nga" nheigloem: moo gau yi ziyo' pyeing byid: bye:.
Nyang: bain koid bye: moo" zoo" yoomo khayhi' pyo: lha".
Nga" gyivoo joem shidkhoin" moo ngoo yo" yi bye:.
Mangsoo ngoo ri pang" thoug yoomo ngoo khayhi' pyo: lha".
2 Aseing yhang: te" gyeung" shang: zigi hang" we' anyid loo.
Nyang: yhang: te" zi hang" anyid- ngoonu" da" Mangsoo yhang: ti" yo" goem loem byid: su: hang" we' anyid.
3 Re" da" phau: khuang nheigloem: ri to" pyam we'.
Re" nghoid boin: dang: ri no: pyam we' Aseing gi gye" se da" Mangsoo nghoid yoomo byumyu" yi koid da" khyoo: dangain" ri
nyang: gi tarha" dang: phyed byid: wa zi nghoid.
4 Yoem: bo da" gyizoo: yi da" lid: gi gyau: lo" wigi yoem: yoem" bang: gi yoem: bo lo boem wa zi nghoid.
5 Dalheing: ri gyi: gyi: boid boid zo: lid loo" bang: gi
zooshug: shau" zoo: wa shid re" akhid" nyangnu" gung nyang: vhu" kung: yhe: koid nyid ago".
Nghoid loug we' zooyoid bang: gi xo' wigi zooyoid loo: wa zi anghoid. Zoo: ayo" yu" da" yhoem: seing: myhi' gi
zoo: nyhed yug ri khu: too" bye:- nghoid loug we' zoo: myoo" sho' yo" da" myhi' zeing gi nyang: kyeing" nghoid wa.
6 Aseing gi said pyam ziyo' kangso' ri doem byid: nyid da:.
Nyang: gi byumyu" yiri moovo moug: khyoo: nhang: kaid wigi
houg: bang: ri doem shu" yu nyid da:.
7 Nyang: gi dayham" ri sho" jhen: nhang: wigi
dayham" rigi yoo" zoo: yoo" shug nhang: nyid da:.
Nyang: gi dayham" ri doin: khyo' pyam wigi
dayham" rigi gyi: sheung: loo" nhang: nyid da:.
8 Sho" jhen: bang: ri zhoo" phei" boem khoug: moo lang: tu: to' yu wigi
yau: khi" shoug" bang: ri nyang: gi myiyab boem mo lang: tu: to' yu nyid da:.
Nyang: gi nyangnu" ri khokham zooshang: yug gi zoo: yi yo'
byencang" bui" nhang: nyid wigi nyangnu" ri myonhoo: ngilang: boo tung" to" to". Mougmyid da" apoem: ayang: ri Aseing nyang: seung: nyid wigi hau: atho' moo mougmyid gyab ri nyang: zhoug too" bye:.
9 Nyang: gi loem khau: da" byumyu" yi da" kangso' ri lhoug zung" nyid.
Nghoid loug we' akhyeing" ashoeb bang: ri koem' gi moug: coid khoug: moo byug lo" boem wa zi nghoid.
Byu gi nyang: nya: yoem: yo' oung: doid khyoo: ayoo" nghoid da:.
10 Aseing da" gyivoo yigi lhu: phyo' pyam zi thung" shoug" goo" wa zi nghoid.
Nyangnu" ri thougtheung wa shid re"
nyang: gi mougkhung: mo moug: goem: ri goem: nhang: wa zi nghoid.
Aseing gi mougmyid gyab goin" ri tarha" dang: phyed byid: wa zi nghoid.
Nya: khokham ri yoem: so' byid: wa zi nghoid.
Nyang: khyen: to" da" khokham ri oung: doid loo" nhang: wa zi nghoid.
11 Hau: thang: ri Elakana ri Rama voogung moo jo, da" nya: yhoem: khyoo: doem loo" nghoid loug we' zooshang: Samuela gi Shilo voogung moo nyhid: kho' wigi khainjung Eli da" lo, khoug: moo nyid lho: Aseing da" moo" zoo" ri zei: nyid da:.
12 Eli da" nya: zoo: yigi akhyeing" ashoeb boem nghoid da:. Nyangnu" gi Aseing ri we' cishu: anhang: nghoid boem wigi
13 byumyu" yi mo shoug" yu da" khainjung bang: yo' sen: da" gamboem joem ri we' cishu: anhang: boem nghoid ago". Hau: gungthid byu dayug yug gi nya: xoin" ngei" uri khainjung pho da" dei nhang: su: gi soem" khyoug: zu: ri ci: wigi ri" ri" koid nyid da" shoo" yhung shid" lo" uri
14 Nyang: gi soem" khyoug: zu: yo' shoo" oug" moo thau" wigi yo" gu: ri khainjung jhang khyoo: yu loo" loo" koid nyid da:. Xoin" ngei" wa shid re" Shilo voogung khyoo: do, lo" da" Israela byumyu" yi dangain" ri hougsu" lhoem: lhung koid nyid boem.
15 Hau: lho: xu: ri xoin" anghe ngei" shi" uri khainjung pho da" dei zoo: re" wigi hau: xu: xoin" ngei" su: ri �Khainjung pho shid re" shoophoid phoid wa shid re" ngoo ri shoo" dajhi' byid: we'. Nyang: gi re" jang" moo jhoug too" bye: da" shoo" ri avhoo: ga: shoo" joem: kyeing" davho:� ga: re" tid.
16 Hau: yug gi �Eung: khyo" wigi xu: ri shi" xoin" ngei" byid: nhang: we'. Hau: thang: ri nanu" vho: ziri yu loo" ge'� ga: tid nghoid rigi hau: khainjung da" dei zoo: gi �Age bui" wa. Ngoo ri akhid" nyang: byid: kaid we' nang abyid: nghoid rigi ngoo hau: shoo" ri lhoid yu wa zi nghoid� ga: tid wa zi nghoid.
17 Eli da" nya: zoo: yi gi Aseing shid re" xoin" to' da" khyoo: ri aphau" myang: boem yoomo Aseing da" shidkhoin" moo yooboo gye" gyi: nyid boem.
18 He: ayo, ri zooshang: zoo: Samuela gi gyeung" shang: da" zin: yung" pain" byikua" ri void ci: wigi Aseing ri dei byid: nyid da:.
19 Nya: myhi' gi byikua" ri coeb ci: wigi zain khang" moo" xoin" ngei" byid: wa shid re" nya: yhoem: seing: phoo yo' do, lo" uri zooshang: shid re" hau: ziri ci: do, lo" byid: da:.
20 Hau: thang: ri Eli gi Elakana yo' nya: yhoem: seing: myhi' ri mainkaid byid: wigi Elakana ri �Nang Aseing ri shug byid: ziyo' hau: myiyi: myhi' shu" re" da" zooshang: zo: da" gungthid Aseing gi nang ri zooshang: gootu: doem byid: baja" o"� ga: tid.
Hau: thang: ri nyangnu" gi yhoem: khyoo: doem lo" ago".
21 Aseing gi Hana ri mainkaid byid: wigi nyang: gi yug gi zoo: soem" yug yo' myiyi: zoo: eig yug ri doem khu: bye:. Zooshang: zoo: Samuela we' Aseing ri dei byid: nyid wigi gyi: sheung: loo bye:.
22 Akhid" gi Eli gye" mang: bye:. Nyang: gi nya: zoo: yi Israela byumyu" yiri zoem" khau: gu: dangain" yo' Aseing da" zoem" khoem" duang: moo moo" zei: da" myiyi: yi yo' nyangnu" dage" yhoeb go" nyid ga: ziri shoug" gyoo: bye:.
23 Hougsu" nghoid yoomo nyang: gi �Nga" zoo: tang: ciwim wigi hid: yhang: te" da" moo" ri zei: nyid go" lha". Nanu" koid da" age khyoo: ri byu dangain" mo, ngoo ri tid kyo" boem ago".
24 Nga" zoo: yi we" houg: yhang: te" da" moo" ri to" pyam ge'. Aseing da" byumyu" yi tid yen" boem zigi gyoug pho" da" moo" zoo" joem danghoid nyid da:.
25 Byu nyang: cang" shoid ziri gi Mangsoo yo" khyoid byid: nghoid loug we' Mangsoo ri thougtheung yooboo koid su: ri hang" yo" khyoid pyam byid: wa lha"� ga: tid bye:. Nghoid loug we' nyangnu" gi nya: pho da" dang: ri atam" gyo: boem yoomo Aseing gi nyangnu" ri said pyam wa shid re" myid phyed too" bye:.
26 Hau: zooshang: zoo: Samuela gi Aseing shidkhoin" moo we' byu shidkhoin" moo we' xo' wigi gyi: sheung: lo lho: myonhoo: ngei lang: bo nyid.
27 Lapi: dayug gi Aseing da" mungdang: yo' dage" Eli jang khyoo: ju" re" wigi �Re" phoug" nghoid da" Arun yo' nya: ikoin deungkhu: byu yigi Egutu Khokham da" join, koid nyid shi" uri ngoo gi nga" gung du: ri Arun jang" moo pang shug bye:.
28 Xoin" to' jang: mo moo" zoo" koid wa shid re" we' nam pyo: ja" xoin" ngei" wa shid re" we' xoin" ngei" byizuang ri void ci: wigi ngoo yo' tid sham: goo" wa shid re" we' Israela byumyu" dangain" jang" mo nga" da" khainjung yi bui" wa shid re" nya: ikoin deungkhu: ri ngoo khyen: yu bye:. Hau: lho: xoin" to' jang: mo xoin" ngei" jang" moo gamboem ri bo kham: zoo: wa shid re" ngoo nyangnu" ri akhang" byid: too" bye: zi nghoid.
29 Hougsu" nghoid yoomo nga" byumyu" jang" mo ngoo mho' da" xoin" yo' jhungshug joem ri ciyoomo myo, no, myid yo' yu" nyid go" lha". Eli we" nga" byumyu" yi ngoo ri byid: da" xoin" yo' jhungshug joem mo je ge da" gu: ri zo: xu: nhang: wigi re" zoo: yiri nga" tho mo ciyoomo phau" myang: nyid lha".
30 Ngoo Israela byumyu" yi da" Aseing Mangsoo gi lid loo bye: da" ayo, moo re" ikoin deungkhu: yo' re" akung: ako' yiri khainjung moo" zoo" khyo" wigi pyaid goin" ngoo ri dei byid: wa shid re" dangsoo" to" too" bye: zi nghoid. Nghoid loug we' hau: zi khanham we' deing loo zi anghoid ein: ngoo tid. Hau: da" gungthid ngoo ri phau" myang: mo, ri ngoo we' phau" myang: wa zi nghoid. Ngoo ri anoug akhyoid koid mo, rigi ngoo we' anoug akhyoid koid wa zi nghoid.
31 Tam" gyoo: we' re" ikoin deungkhu: mo byu hang" nghoid loug we' mang: sho' ayo" nyid baja". Re" ikoin deungkhu: yo' re" akung: ako'' mo yug gi zoo: yi dangain" mo, ri ngoo said pyam wa da" ayo, gi ju" re" nyid bye:.
32 Nanu" yau: khi" shau" da" uri gootu: da" Israela byumyu" yiri mainkaid byid: ziri nang yu" no" zoo wa. Nghoid loug we' re" da" ikoin deungkhu: byu yigi dayug we' kangso' sheing: zi doem yo" yu loo wa zi anghoid.
33 Nghoid loug we' re" da" akung: ako' ri koem' gi kangso' dei nhang: wigi nyang: gi ngoo ri khainjung aya: khyo" dei byid: nyid wa zi nghoid. Nghoid loug we' nyang: gi myo, jid loo" wa zi nghoid wigi nheig byu khyoo: dangain" ri ci: phyug pyam lho: gootu: re" da" akung: ako' gi gyi said khyo" shid: shoug" lo" boem wa zi nghoid.
34 Re" zoo: Hobni yo' Phineha tang: gi danyid" dam shid: lo" ri hau: zigi ngoo tid to" dang: dangain" ziyo' dakhyoo" ti" gyeing" nyang: bue" lo khyoo: nang ri ci: shug wa zi nghoid.
35 Ngoo ri loem" jeung" da" khainjung dayug ri ngoo khyen: yu wa nghoid. Ngoo nyang: ri zei: nhang: nau gu: dangain" ri zei: loo" wa zi nghoid. Ngoo khyen: to" da" khokham shidkhoin" moo pyaid goin" dei byid: nyid wa shid re" byumyu" akung: ri ngoo byid: wa zi nghoid.
36 Kangso' dei deing nyid shi" da" re" akung: ako' mo hang" nghoid loug we' hau: khainjung jhang khyoo: yhe: wigi ngei yo' zoo: shug nya: jang" mo yhe: mho' ca" wa zi nghoid. Daja: ja: shoug" zoo: wa shid re" khainjung yi bo pang" baja" ga: akhang" mho' ca" wa zi nghoid.