SAMUELA
MOUGSOUG" PUG DALOEM:
(1 Samuel)
He: da" I Samuela lhid" pug gi Israela byumyu" yi moo tarha" agyi yi vhoebkhang" da" apyaid mo zi khokham yi vhoebkhang" da" pyaid khyoo: thid lo" da" ziri lhid" xoem" to" da" mougsoug" pug nghoid. Hid: su" Israela yi da" apyaid thid lo" da" uri gye" yhouggyen: da" byu soem" yug nghoid da" lo" thang moo tarha" agyi koid su:- Samuela Israela yi da" xang: shi" mo da" khokham Sholu gi nyang: khokham abui" shi" uri Samuela yo' Sholu tang: ri sham: shoin" sho' koid byid: da" David- hid: soem" yug da" khyoo: bo nyid.
He: mougsoug" pug da" akhyoo" zeing gi thang" cab xoug" moo bo da" mhoomyid: shen" dam pug joem moo bo da" ziyo' dayhang: ti" Mangsoo ri geung: teing loem" jeung" loo mo, gi oung: doid lo wigi dang: atam" gyoo: mo, gi byo, yoin" loo" wa zi nghoid ga: da" khyoo: ri lhid" to" zi nghoid. He: da" akhyoo" ri 2:30 moo bo da" �Ngoo ri phau" myang: mo, ri ngoo we' phau" myang: wa ngoo ri anoug akhyoid koid mo, gi joem: lo" zi shoug" wa� ga: khainjung Eli ri Aseing tid da" mungdang: moo gyeing: gyeing: nyang: yo" myang nyid.
He: mougsoug" pug moo Khokham vhoebkhang" wa moo" yo' sen: wigi dashoid khyo" yu" ri nheugshid: nheugdeug kham yu nghoid loug da shoid khyo" yu" ri nheig ashid: boem ziri lhid" to". Aseing nyang: gung nyang: Israela byumyu" yi da" khokham khyo" nyang: yu" goem, loem byid: nyid nghoid loug we' byumyu" yi khyo" wigi Aseing ri nyangnu" shid re" khokham shoo: byid: we' ga: doem mho' yoid nyid ago". Yhouggyen: da" khyoo: dakhaid gi khokham yo' Israela byumyu" yi dangain" gi Mangsoo vhoebkhang" tarha" dang: phyed da" akhoug: moo nyid boem (2:7-10). Mangso da" tarha" khoug: moo nyid da" byumyu" dangain" gi yoo" zoo: bang: yo' sho" jhen: bang: dadeing: daloem: za: nyid ca" ga: zi nghoid.
1
1 Ephrim boem moug: Rama voogung moo Ephrim kung: mo Elakana ga: myheing da" byu dayug nyid. Nyang: gi Zupha akung: ako' mo Tohu ikoin deungkhu: yo" sen: da" Elihu nya: myid: Yeroham nya: zoo: nghoid nyid da:.
2 Elakana gi yhoem: seing: myhi' eig yug yoo" su: nghoid. Hana yo' Penina tang: nghoid da:. Penina gi zoo: yo" wigi Hana koem' gi zoo: ayoo".
3 Elakana koem' gi myhang: thang Aseing ri noku wigi xoin" ngei" byid: wa shid re" Aseing da" khainjung tang: nghoid da" Eli nya: zoo: Hobni yo' Phineha tang: nyid da" Rama khyoo: zain khang" moo" lhoung yhe: da:.
4 Elakana gi nyang: xoin" ngei" khang" moo" Penina shid re" xoin" shoo" daboem yo' nya: zoo: yi shid re" xoin" shoo" daboem boem koid wigi xoin" to' byid: nyid zi nghoid.
5 Hau: lho: wigi Aseing gi Hana ri zooshang: ayoo" nhang: yoomo nyang: gi Hana ri gye" jheddab nghoid loug we' xoin" shoo" daboem kyeing" za: dabyid: da:.
6 Aseing gi nyang: ri zooshang: ayoo" nhang: yoomo nyang: ri shi' go" nyid da" Penina wigi nyang: ri yoem: shoin: nheig koug sho' ung: zo: juang" nyid da:.
7 He: khyoo: gi zain khang" moo" dabue" nyid yoomo nyangnu" gi Aseing yhoem: khyoo: yhe: uri Hana ri Penina sung ung: zo: wigi nyang: gi ngau ziyo' zoo: shug we' azoo: loo: nghoid da:.
8 Nya: yhoem: seing: phoo Elakana gi nyang: ri �Hana nang ciwim ngau nyid nang ciwim wigi azoo: ashug lha". Yuggi zoo: daxi: yug nyid tho' moo re" shid mo ngoo je" akyu" bo nyid anghoid la"� ga: myid: da:.
9-10 Dalheing: rigi Shilo voogung mo Aseing da" yhoem: moo nyangnu" gi voem: zheung: bain zo: thang: ri Hana to' loo" bye: zi nghoid. Nyang: gi gye" nheig koug ziyo' nyho: ngau wigi Aseing jang" moo akyu" mho' nyid da:. Hau: uri khainjung Eli gi khoem" duang: yam mo nya: joyoo moo zhung: jo, da:.
11 Hana gi �Myhang: thang da" Aseing we"- re" join myhi' nghoid da" ngoo ri yu" we' nga" da" yau: khi" ri myang bye: wigi ngoo ri boin: so" nyid we'. Ngoo ri ato" myhid pyam. Nang ngoo ri zooshang: byid: nghoid rigi nya: da" xam: ri khanham we' aphyid pyam byid: looza: nya: apyaid dangain" ziri ngoo nang ri zhoem" byid: wa ein: ngoo dangsoo" khoin" byid: bye:� ga: gye" no, khyo" nyang: gi dangsoo" khoin" byid: too" bye: zi nghoid.
12 Hana gi xo' loo: xo' ayo, myang" myang" Aseing jang" moo akyu" mho' nyid uri nya: nhoid ri Eli gi zung" yu" nyid.
13 Nyang: gi sam: za: akyu" mho' nyid. Nya: nhoid gi loeb nyid. Nghoid loug we' nyang: gi thui: athu nghoid da:. Houg: yoomo Eli gi nyang: zabyid yed sam" ga: myid nyid wigi
14 Nyang: gi Hana ri �Zabyid yhid: yed yhang: ti" nanya: gung ri hougsu" akoid shug nyid zabyid yhid: ashug loo za: sam" dab tung" nyid we'� ga: tid.
15 Nyang: gi �Anghoid- ngoo zabyid ayed aseing: we"- ngoo zabyid yhid: ashug yu". Ngoo gi gye" myid myo: nyid ziyo' nga" yau: khe" khyoo: Aseing ri tid kyo" wigi akyu" mho' nyid zi danghoid.
16 Ngoo ri phoug" adab da" myhi' zeing ein: asoin: yu. Ngoo gi gye" nheig koug nyid yoomo ngoo hid: su" akyu" mho' nyid zi nghoid� ga: phug tid.
17 Eli gi �Yug yoo tung" za: loo" we'. Israela yi da" Mangsoo gi nyang: ri nang mho' ziyo' dakhyoo" ti" byid: baja"� ga: tid.
18 Nyang: gi �Nang ngoo ri khanham we' nheig khyeug shoo" myen: wa shid re" daboin: nyid we' o"� ga: tid. Hau: thang: ri nyang: ri nheig akug nyid loo za: zoo: shug dajhi' zo: wigi thu lo" byug bye:.
19 Thang: nab kyoo' ri Elakana yo' nya: yhoem: byu dangain" no, re to' wigi Aseing ri akyu" bain mho' thang: ri nya: miyi gi Rama voogung mo zi nyangnu" yhoem: khyoo: doem tau" lo" boem bye:. Elakana we' nya: myi: Hana yo' zoem" yhoeb wigi Aseing gi nya: akyu" mho' dang: ri tam" gyoo: byid: bye:.
20 Houg: yoomo nyang: gi zoonu" gung bue" lo wigi yug gi zoo: dayug khu: loo bye:. Nyang: gi nya: myeing ri Samuela ga: myheing byid: bye:. Hau: myeing gi �Ngoo Aseing jang" mo mho' yu zi nghoid� ga: phuid: kyoo" bye:.
21 Ayo, akhyeing: doem ju" lo uri nyang: gi dangsoo" byid: to" ziyo' dakhyoo" ti"- Elakana yo' nya: myi' zeing gi Shilo voogung khyoo: do, lo" wigi zain khang" moo" ngei" byid: da" xoin" yo' gooki' lid da" xoin" Aseing jang" moo ngei" byid: boem ago".
22 Nghoid loug we' he: lheing: gi Hana acang yhi: nghoid da:. Nyang: gi nya: yhoem: seing: phoo ri �Zooshang: noug" kang" pyam yo' dalheing: dam nyang: dapyaid goin" lo" nyid wa Aseing da" yhoem: khyoo: ngoo nyang: ri shu" do, loo" wa� ga: tid.
23 Elakana gi �Nghoid bye: cisu" nghoid nghoid nang myid yu" wigi ge thang khyo" koid we' nyang: ri noug" yo" kang" da" ayo, ju" sho' yhoem: moo shu" nyid we' Aseing nang ri byid: to" da" dangsoo" khoin" gi deung main" loo baja"� ga: doem tid. Hougsu" nghoid yoomo Hana gi yhoem: moo nyid wigi nya: zoo: ri yu" coung: nyid.
24 Nyang: gi Samuela ri noug" kang" thang: ri soem" zain boo bye: da" nuloo: zoo: dadu- sungsoo: phei" datang yo' zabyid yhid: byeung" sho' bo da" shooyid thung: dathung: yo' nyang: ri Shilo voogung khyoo: shu" do, loo" bye:. Nyang: gi Samuela ri Shilo voogung mo Aseing da" yhoem: khyoo: shu" do, lo" uri gye" ngi shi" zi nghoid.
25 Nuloo: zoo: ri bain said thang: ri hau: zooshang: ri Eli jhang khyoo: shu" yhe: lo" ago".
26 Hana nyang: ri �Nang ngoo ri xoem" shi" la". Ngoo gi hid: moo yab jo, wigi akyu" mho' nyid uri nang myang da" myhi' zeing nghoid bye:.
27 He: zooshang: shid re" ngoo nyang: ri mho' ziyo' dakhyoo" ti" nyang: gi ngoo ri byid: bye:.
28 Hougsu" nghoid yoomo ngoo gi nyang: ri Aseing jang" moo shoug byid: re" zi nghoid. Nyang: dadei nyid nyid gi Aseing shid re" nghoid baja"� ga: tid. Hau: thang: ri hau: joyoo moo nyangnu" gi Aseing ri noku nyid boem ago".