15
1 Samuela gi Sholu ri �Ngoo gi nya: byumyu" yi nghoid da" Israela khokham bui" wa shid re" nang ri mainkaid xu: foid gyoin: byid: we' ga: Aseing nhang: kaid su: nghoid. Myhang: thang Aseing citid ein: ziri akhid" tam" gyo: yu" we'.
2 Israela byumyu" yi Egutu mung" mo thu lo uri Amaleg byumyu" yi da" phoug" phyid" yigi lhoem: toem' boem yoomo Aseing gi nyangnu" ri dam byid: wa zi nghoid.
3 Amaleg byu yiri yhe: said wigi nyangnu" yo" da" jonu" dangain" ziri phyo' pyam ge'. Jonu" daja: we' ateing too" goo". Yuggi- myiyi:- zooshang:- nu" ngha'- nu:- yang- gola-ug yo' loo zei: joem dangain" ziri said pyam ge� ga: tid.
4 Sholu gi nya: gyizoo: joem ri khe: zheing" to" wigi Telem joyoo moo byudu: nghab yu" ri Israela byumyu" mo 200,000 yo' Yuda byumyu" mo 10,000 nghoid nyid da:.
5 Hau: thang: nyang: yo' nya: byu yi Amaleg voogung khyoo: to' yhe: lo" wigi lang: khung" daloem: moo yhe: gau" zung" yu" nyid boem ago".
6 Israela byumyu" yi Egutu mung" mo thu lo uri Keni byumyu" yi da" phoug" phyid" yi jheddab myid ci: shug too" yoomo nyangnu" ri tid poin" kaid nhang: zigi �Amaleg byumyu" yi yo' dage" nanu" ri ngoo ashau" said pyam baja"- nyangnu" jang" mo thu phang: lo" byug ge'� ga: tid nhang:. Hougsu" yoomo Keni byumyu" yi we' thu lo" byug bye:.
7 Sholu gi Amaleg byu yiri Havila mo zi Egutu mung" bidthu shoid moo jo, da" Shura voogung khyoo: dain: cang khaid said ziyo' oung: doid loo" bye:.
8 Nyang: gi Amaleg khokham Agag ri myheug yu wigi nya: byu dangain" ziri said pyam da:.
9 Nghoid loug we' Sholu yo' nya: byu yigi Agag da" kangso' yo' dage" ge thang da" yang joem nu: joem ge thang da" nu: nu" joem yo' yang nu" joem ge da" jonu" dangain" ziri aphyo' pyam loo: za: to" to" ago". Ci: age koid da" ziyo' akyu" abo da" jonu" joem ri khyeing" daphyo' pyam boem go".
10 Aseing gi Samuela ri
11 �Ngoo Sholu ri khokham koid nhang: zi gye" nheig koug bye:. Nyang: gi nga" jang" mo nung phug lo" wigi nga" amyeing" ri we' atam" gyoo: nghoid da� ga: tid. Samuela gi nheigloem: yoin wigi damyen goin" Aseing jang" moo mho' yoid nyid da:.
12 Thang: nab kyoo' nab soin: no' mo Sholu ri shoo: wa ga: nyang: thu loo" khari" bye:. Sholu gi Khamela voogung khyoo: ju" wigi hau: joyoo moo nya: shid re" laxoem" dung" zeing daloem: koid to" lho: Gilgala khyoo: yhe: loo" khari" bye: ga: ziri Samuela shoug" gyoo: bye:.
13 Samuela we' Sholu jhang khyoo: cang yhe: yu" ri Sholu gi �Samuela we" Aseing nang ri mainkaid byid: baja". Hau: Aseing da" amyeing" dang: ri ngoo tam" gyoo: bye:� ga: tid lho: lhoem: tau yu bye:.
14 Samuela gi �Hau: ri nu: joem myeung ziyo' yang joem myeung da" thui: ri shau" gyo: nyid zigi cinghoid la"� ga: myid: bye:.
15 Sholu gi �Nga" byu yi hau: gougnyhoug joem ri Amaleg byumyu" yi jang" mo ci: lo boem ago". Re" Aseing Mangsoo ri xoin" ngei" wa shid re" ge thang da" yang joem nu: joem ri teing to" wigi gootu: dangain" ziri ngoonu" phyo' sain" pyam bye: zi nghoid� ga: phug tid.
16 Samuela gi �Noo: re,- amain Aseing ngoo ri citid ein: ziri nang ri ngoo tid kyoo" wa� ga: tid.
Sholu gi �Tid kyoo" we'� ga: tid.
17 Samuela gi �Re" gung nyang: ce: yhouggyen: anghoid ga: myid ngham" nyid nghoid loug we' nang gi Israela byumyu" akung: ako' yi' da" vhujhung: nghoid nyid da:. Aseing nang ri Israela byumyu" yi da" khokham koid nhang: wa mainkaid xu: foid shoin" byid: bye: da:.
18 Hau: akhyeing" da" Amaleg byu yiri said toem" pyam wa shid re" nyang: nang ri amyeing" byid: wigi nhang: kaid zi nghoid. Nyangnu" dangain" mo, ri yo" said toem" pyam da" ayo, ju" sho' khaid zain: wa shid re" nang ri tid bye:.
19 Hougsu" daga: ri nang gi nya: da" dang: ri ciwim atam" gyo: la". Ciwim yoomo lanyhoeb jonu" joem ri shoem" koid: ci: lo wigi Aseing avho: da" moo" zoo" ri koid lo lha"� ga: tid da:.
20 Sholu gi �Aseing da" dang: ri ngoo tam" gyoo: bye:. Nyang: tid ziyo' dayhang: ti" ngoo yhe: wigi khokham Agag ri ngoo yhe: myheug shu" lo lho: gootu: Amaleg byu dangain" ziri said pyam khoo' bye: zi nghoid.
21 Nghoid loug we' nga" byu yi koem' gi nyangnu" shoug" yu da" ge thang yang joem nu: joem ri asaid pyam loo: za: re" Aseing Mangsoo ri xoin" ngei" wa ga: Gilgala voogung khyoo: nyangnu" ci: lo boem ago"� ga: tid.
22 Samuela gi �Aseing gi ce: noem ri vho: nyid lha". Jidang: gyo: ziri lha". Anghoid lang" xoin" ngei" ziyo' xoin" joem ri lha". Nyang: ri ge thang da" yang xoin" ngei" tho' mo nya: jidang: gyo: zigi je ge nyid zi nghoid.
23 Aseing ri thougtheung gyi koid zigi se' fa" bang: yhang: ti"- agi nghoid da:. Khuang da" myid gi yu phara" soolhoo: ri no' da" thung" yhang: ti" yooboo yo" nyid zi nghoid. Aseing da" amyeing" dang: ri atam" gyoo: yoomo nang ri we' khokham aya: mo nyang: khyo' pyam bye: zi nghoid� ga: tid.
24 Sholu gi �Nghoid bye:. Ngoo yooboo koid bye:. Aseing da" amyeing" dang: yo' re" byen phyoo" zain: dang: ri ngoo atam" gyoo: koid bye: nhung. Ngoo nga" byu yiri gyoug yoomo nyangnu" nyang: ri nau: khyo" koid nhang: bye: nhung:.
25 Nghoid loug we' akhid" nga" yooboo khyoid byid: wa shid re" ngoo nang ri mho' yoid nyid. Aseing ri ngoo yo" noku wa shid re" ngoo yo' dage" Gilgala khyoo: doem tau" loo" shang� ga: doem phug tid da:.
26 Samuela gi nang yo' dage" ngoo doem tau" loo" wa zi anghoid. Aseing da" amyeing" dang: ri nang atam" gyoo: yoomo nang ri Israela byumyu" yi da" khokham aya: mo nyang: khyo' pyam zi nghoid� ga: doem phug tid.
27 Hau: thang: Samuela lheing: thu lo" bye:. Nghoid loug we' Sholu gi nya: atho' byi: ri cang lang: wigi hau: byi: jeig loo" khari" da:.
28 Samuela gi nyang: ri �Akhanyid" Aseing gi Israela mung" ri re" jang" mo lang: ceig yu wigi re" tho' je ge da" byu dayug ri byid: pyam bye: zi nghoid.
29 Israela byumyu" yi da" myhang: thang Mangsoo gi mhau' zi anghoid. Nya: myid thid wa zi anghoid. Nyang: gi xangsu: byu dayug anghoid. Nya: myid thid wa zi anghoid� ga: wigi tid da:.
30 Xo' lho: Sholu gi �Ngoo yooboo koid bye:. Nghoid loug we' nga" byumyu" yi da" vhujhung: yi yo' Israela byumyu" yi dangain" bang: da" shidkhoin" moo ngoo ri phau" myang: khyoo: khyalang" gi ci: shug shi" we'. Re" Aseing Mangsoo ri we' ngoo yo" noku baja" ngoo yo' dage" loo" shang� ga: doem phug tid da:.
31 Hougsu" yoomo Samuela gi Sholu yo' dage" Gilgala khyoo: doem tau" lo" wigi Sholu gi Aseing ri noku bye:.
32 Samuela gi khokham Agag ri �Nga" jhang khyo: shu" loo we'� ga: amyeing" byid: kaid bye:. Agag we' nya: jang" moo gyoug dain ziyo' re" wigi �Mi: shid: wim abye: myang� ga: nya: myid khoug moo soin: nyid da:.
33 Samuela gi �Re" sham: gi myhi' zeing yi myoo: sho' ri zooshang: ze" phug nhang: yhang: ti"- re" myhi' ri we' zooshang: sho: phyug nhang: wa zi nghoid bye:� ga: wigi tid. Hau: thang: nyang: gi Gilgala mo xoin" to' jang: ayam moo Agag ri adu du zain: ceing said pyam bye:.
34 Hau: thang: Samuela gi Rama khyoo: lo" wigi khokham Sholu we' Gibea mo nya: yhoem: khyoo: loo" bye:.
35 Samuela kangso' dei nyid ayo, dangain" moo Sholu khokham ri nyang: khanham we' amyang loo. Nghoid loug we' nyang: gi Sholu shid re" nheig myid koug nyid da:. Aseing we' Sholu ri Israela byumyu" yi da" khokham koid nhang: bye: yoomo shoid boin: nyid da:.