1 Hau: thang: ri mougkhung: mo gyoo" lo da" moug: lagyoo: gootu: ri ngoo myang. Nyang: gi gyi: thang da" amyeung" yoemso ci: lho nya: phung yoeb, gi mougmyid gyab, goin" moo doug, bang to". 2 Nyang: gi thui: zeing yo' tid zigi nyang: gi byo, loo" bye:- Babelon voomoo" gi byo, loo" bye:- byo, loo" bye:- nyang: rigi akhid" main: yu joem yo' mi: byoo joem wigi byo" too" zi shau" su: aco' jhoid khyoo: aja: ja: yo' ngho' ngheing" joem da" nyid jang: nghoid. 3 Khasu" wim gari Nya da" soem" lid' moo" ein: da" zabyid yhid: yo' byumyu" ja: khang: moo" ri yed, leung, loo" nhang: bye:. Mougmyid tho' mo khokham yi we' Nyang: yo' dage" soem" lid' sho: moozoo" ri zei: yoomo mougmyid tho' mo phaga byu yi gi sathi" bue" lo boem bye:. 4 Hau: thang: ri mougkhung: tho' mo thui: gootu: ri ngoo shau" gyo:- Hau: da" thui: gi Thu' re" boem ge' nga" da" byumyu" yi we"- nya: jhang mo phang: thu' loo" ge' nyang: yo' dage" yooboo akoid nyid loo: goo"- nyang: yo' dage" yooboo dam ri akham' zo: nyid loo: goo". 5 Khasu" wim gari nya: da" yooboo gi mougkhung: myhi: sho' myhang: jo, wigi Mangsoo gi nya: da" akhyeing" ashoeb khyoo: joem ri myid boin: nyid. 6 Nanu" gi nyang: koid yhang: ti" nyang: ri latoo: doem phug, byid: ge'. Nyang: nanu" ri koid da" tho' moo eig zhang latoo: doem phug, ge'. Nanu" ri jhug wa shid re" goem, moo nyang: eig zhang lung: byid: ge. 7 Nyang: gi nya: gung ri koid yu da" myonhoo: phung" yoeb, yo' gungshoo" pyo: khyoo: ri shau" kham zo: nyid ziyo' dakhyoo" ti" nyang: ri kougshu: myid myoo: ung: loug, ziyo' sho" jhen: zi shau" nhang: ge. Khasu" wim gari nyang: gi Ngoo gi Khokham" myhi' nghoid- cougmoo" myhi' anghoid- ngoo gi khanham we' nheigkoug nheigshu: khyoo:- shau" wa zi a nghoid, ga: wigi nya: gung ri nyang: tid yu nyid da. 8 He: khyoo: yoomo danyid" da" bidnyid moo nyang: gi no zi phyo" ziyo' nheigkoug nheigshu: ziyo' zooyoid phang" khoug shau" da" shidgyoin joem gi nya: tho' moo ju" gyo" loo wim bye:. Nyang: gi myi: yo' nghe pyam zi shau" wa zi nghoid- Khasu" wim gari nyang: ri dang: phyed su: Aseing Mangsoo gi yoem: moo" phung" yoeb, boo su: nghoid, ga: tid nyid.

9 Nyang: yo' aved, avhu" koid go" lho: nyam, da" mougmyid Khokham" yi gi nyang: ri nghe jhoem" nyid da" myikhoug" ri myang lang" hau" voomoo" shid re" ngau, yu: yen" boem wa zi nghoid. 10 Nyangnu" gi nyang kham zo: nyid da" dam, ri myang lang" gyoug dain yoomo vi" vi" moo yab, jo, boem lho: nyangnu" tid boem zigi ?myonhoo: bo ziyo' gyi: thang da" Babelon we"- joem: loo" bye:nhung: lha". Danayi: khoug: moo za: yooboo dam, kaid zi shau" bye: nhung: ga: tid nyid boem wa nghoid.

11 Mougmyid tho' mo phaga byu yi we' nya: shid re" koug ngau nyid ago". Khasu" wim gari nyangnu" da" zi yoo joem ri qei yu wa byu hang" we' anyid boem loo: yoomo nghoid ago". 12 Nyangnu" da" phaga zi joem gi hang" we' aqei boem loo- ngei sheing: lug nyoug, lug sen" palhe" yo' zin: yung" pain" joem jidmoo" pain" tung: sang" khyeing: bo da" pain" joem yen: yen: ne, young" da" pain" joem phoug" dab da" seig- gyid: ni joto' yo' lug phyu:- xang: zei yo' koid da" zi aja: ja- 13 Seig cang" phyeig- zooxoin" moo kaid da" nam, pyo: zi aja: ja:- moora:- lo" bain- zabyid yhid: yo' xu: joem sungsoo: phei" yo' sungsoo: cen:- nukyung, yang kyung myang: kyung yo' myang: rheing" joem join yi yo' byu yi da" kangso lang" bo boem ago". 14 Phaga byu yi nyang: ri tid zigi Hau: da" voomoo" zeing ri nang vho: ngei kang: lung' bu nyid da- phoug" dab ziyoo joem gi ajo, loo- ziyoo jonu" ziyoo myonhoo: ngeilang: joem we' bei: lo" byug boem bye:- hau: da" ziyoo ziyoo jonu" joem ri nang thang: phyang" doem shug" vhoo, loo: wa zi anghoid? ga: tid boem. 15 Hau: voomoo" moo phaga koid lho: sathi" bue" lo da" phaga byu yi gi nyang: kham zo da" yaukhi" kyikhyeig dam, ri bo loem, zoo: wa gyug yoomo vi" vi: moo dayab, jo, boem wa. Nyangnu" koug ngau zoore tid zigi 16 Gyi: thang da" voomoo" zeing we"- Jid: moo" pain" yung"- zin: yung" yo' yen: yen: ne, da" pain"- byimi ri void ci lho: ngei sheing: lug nyoug, palhe" yo' lhoo, yhoung, ci: da" gyi: sheung: voomoo" zeing gi joem: loo" bye: nhung. 17 Nyang: moo yo" da" ziyoo jonu" gi danayi: akhoug: moo joem: thang pyam bye: nhung: lha". Gyid sangphoo' koin" da" vhujhung: yi yo' gyung: soo" mo, dangain" we' vi" vi: moo yab, jo, lho: 18 Hau: da" voomoo" nge" joem: lo" da" myiyham: doem mo myikhoug" joem ri myang lang" gi nyangnu" gi" khanham nghoid loug we' he: voomoo" ti" gyi: sheung: thang da" voomoo" ri amyang yu" boem, shi"- ga: wigi nyho: yoid tid nyid boem. 19 Nyangnu" gi nyangnu" nya: vhuloem moo pheilhoug: joem ri geug, shoin" ci: lho: ?panglai: gu: da" sangphoo' zeing mo sathi" yiri yoo" nhang: di nhang: lo da" voomoo" zeing gi dana: yi: da" akhoug: moo za: joem: loo" thang loo" bye: nhung: lha"? ga: koug ngau nyid boem.

20 Mougkhung: mougdi we"- hau voomoo" byo, pyam bye: yoomo gau yi nyid loo: ge'. Mangso byu yi yo' lagyoo: yi, lapi: yi we"- gau yi nyid ge' Khasu" wim gari Mangso gi nanu" ri nyang: koid lid lo ziyo' dakhyoo" ti" hau: voomoo" ri yooboo dam, kaid bye:.

21 Hau: thang: moo yoem: moo" bo da" moug: lagyoo: dayug gi gyi: da" lug lheung: zeing yhi' bo da" lug daloem: ri yu lho: panglai: gyid thoem" moo du" zei kaid wigi Babelon voomoo" gi hid: yhang: ti" du" khyo' kaid zi shau" wa nghoid lho: thang: phyang" hau: voomoo" ri khanham we' doem myang loo: wa zi anghoid- ga: tid. 22 Nya: jhang mo teing thui: yo' byu thui:- khoo" lhang' thui: yo' laboo" thui: ri khanham we' doem shoug" gyoo: loo wa zi anghoid. Nang moo ce" lo, moo" zei: mo, khanham we' adoem myang loo wa lug lheung: gyeig thui: ri khanham we' doem shoug" gyoo: loo: wa zi anghoid. 23 Nang moo khanham we' myibung bang ziri shau" myang loo: wa zi anghoid. Myhiseig yo' phoo' seig yi thui: ri we' khanham we' ashau" gyoo: loo: wa Re" da" phaga byu yi gi mougmyid gyab, goin" jang" moo yoem: bo thang mo, bue" lo lho: nanu" da" mhau' fain" goem phain" maintain: yo' nanu" gi mougmyid byu yi dangain" ri khyoo: shu" vhang: pyam boem bye:.

24 Babelon gi yooboo dam, kaid ziri shau" khyoo: gi khasu" wim gari hau: voo moo lapi: yi yo' Mangso byu yi da" suid"- mougmyid tho' moo said pyam zi shau" moo shug" mo, da" suid" joem ri houg: moo shau" myang yoomo nghoid nyid.