17
1 Hau: uri goem nyhed loem: ci: da" moug: lagyoo: nyhed' yug mo dayug ngoo ri tid zigi Gyid moo" lang' myoo" sho' da" ayam, moo zhoung: jo, voomoo" zeing te" da" myeing gyi: nyid shava myhi' da" yooboo khyoo: ri ngoo nang ri tid kyoo" ba.
2 Myid jang: tho' mo Khokham" yi gi nyang: yo' aved, avhu: moo" zheung: zei: nyid yoomo mougmyid moo nyid da" byu yi gi nya: aved, avhu: koid ein: da" zabyid yid: ri shug yed, ci: abye: go", ga: tid.
3 Hau: thang: ri moug: lagyoo: gi ngoo ri Venyi: khyo" dain" pyoid yoo khyoo: shu" lam" lo" ri Mangso myeing ri juang" yi da" myeing dagung goin" lhid" tab ci: da" akhyeung" da" gougnyhoug ni zeing dadu: da" atho' moo myiyi: myhi' dayug zhoung: jo, ziri ngoo myang. Hau: akhyeung" da" gougnyhoug moo vhuloem nyhed' loem: dab lho: khyoug: daxi: khyoug: yug.
4 Hau" myiyi: myhi' gi ni mi: yo' ni no, yo, da" byimi void ci: lho: ngei sheing: lug nyoug- palhe" joem yo' lhoo, yhoung, ci:- nyang: yug: sho: to" da" aved, avhu: koid moozoo" yo' byeung" da" sheing: goem, ri nya: lo, moo zei: ci.
5 Nya: ngeilang: tho' moo gi shava myhi' yi yo' Moug: gyab, goin" ziri khyoo: shu" vhang: lo" da" nya: myhi'- gyi: thang da" Babelon- ga: wigi gau: thang dang: kang: yo' lhid" to".
6 Hau: lho: myiyi: myhi' hau: yug gi Mangso byu yi da" suid" yo' Yesu ri loem" jeing" yoomo said pyam zi shug" mo, da" suid" ri shug yed, nyid ziri ngoo myang.
7 Hau: da" moug: lagyoo: ngoo ri myed: zigi ce: noem wim wigi nang mau" nyid lha". Hau" myiyi: myhi' da" gau: thang dangkang: yo' vhuloem nyhed loem: dab ziyo' khyoug, daxi: loem: yug da" akhyeung" da" gougnyhoug khyoo: ri we' ngoo nang ri tid kyoo" ba.
8 Hau: akhyeung" da" gougnyhoug gi shid phyang" dei nyid yu" bye:- nghoid loug we' akhid" gi adei nyid loo- nghoid loug we' nyang: gi no, athang da" duang: khuang" mo thu' re" lho: wigi phyo' shoin pyam jang" khyoo: yhe: loo" wa zi nghoid. Moug: phain" so: myid aphain" so: shi" mo Nya: kangso' mougsoug" pug moo- myeing abo lhid" kaid to" da" mougmyid byu yi gi hau: akhyeung" da" gougnyhoug zeing ri shau" myang lang" mau" hang" to" boem wa nghoid. Nyang: gi goonham' dei nyid yu" gye- akhid" gi adei nyid loo- nghoid loug we' doem dei loo shi" wa zi nghoid.
9 Hid: moo lasi' phajhi" yo' yeug, se' da" phajhi" boo ca"- vhuloem nyhed loem: gi hau" myiyi: zoo: zhoung: jo, da" boem, nyhed loem: nghoid lho: Khokham" nyhed yug ri we' tid nau zi nghoid.
10 Khokham" wim: yug gi shid: loo" bye:- dayug gi dei nyid shi"- gootu: dayug gi apo" thu' loo shi"- po: thu' loo loug we' daso' za: dayo, daboin: za: te: vhoeb khang" wa zi nghoid.
11 Hau: lho: goonham: gi kangso dei nyid nghoid loug we' akhid" gi age dei nyid lo: da" akhyeung" da" gougnyhoug gi nyhed yug khoug: mo dayug nghoid wigi shed' yug ein: wa da" Khokham" nghoid lho: phyo' shoin pyam zi shau" zo" lo" nyid bye:.
12 Nang shau" myang da" khyoug: daxi: loem: gi ashau" vhoeb khang" shi" da" Khokham" daxi: yug nghoid. Houg: bang: gi akhyeung" gougnyhoug yo' dage" Khokham" da" amyeung" yoemso ri ayo, danayi: za: yo" yu mo, bue" lo boem wa zi nghoid.
13 Hau: da" Khokham" yi daxi: yug bang: gi myid soin' khyoo: daja: za: bo boem wigi akhyeung" da" gougnyhoug zeing ri nyang: nya: da" yoem: vhoo" yoemso yo' amyeung" yoemso ri ab, byid: boem.
14 Houg: bang: gi hau: yang nu" yo' meing: zain: goo" wa zi nghoid loug we' hau: yang nu" gi nyang: khe: yu too" mo, khyen: yu too" mo, yo' nheigloem: zung" lho: nya: thang: cang mo yo' dage" houg: bang: ri oung: pyam wa zi nghoid. Khasu" wim gari nyang: gi Aseing yi tho' mo Aseing- Khokham" yi tho' mo khokham nyang: nghoid nyid.
15 Hau: thang: ri moug: lagyoo: ngoo ri doem tid zigi shava myiyi: myhi' zhoung: jo, da" gyid lang gi mungdain joem mo myeing" cang: joeb, da" byumyu" yi yo' mung" byu yi nghoid boem ago".
16 Nang myang da" akhyeung" da" gougnyhoug yo' Khyoug: daxi: loem: gi shava myiyi: myhi' ri ngheing" yoomo nya: byimi, dangain" lang: shang: pyam byid: lho: shoo" cen: doem: koid to" boem wa nya: da" shoo" ri zo: pyam lho: deung gu: rigi myi: moo nghe jhoem" pyam wa nghoid.
17 Khasu" wim gari Mangso mungdang: joeb, byeung" lo da" bidnyid moo ju' sho' nyangnu" gi dadeing: daloem: za: koid lho: nyangnu" vhoeb khang" da" amyeung" dang: ri hau: akhyeung" da" gougnyhoug lo, khyoo: ab, byid: khyo" wigi Mangsoo gi nyang: myid soin' khyoo: zei: pyeing byid: nau da" emyed, ri nyangnu" da" nheigloem: khoug: moo kaid too" byid: bye:.
18 Nang shau" myang da" myiyi: myhi' gi mougmyid khokham yi da" atho' moo vhoeb khang" nyid da" voomoo" zeing nghoid- ga: ngoo ri tid.