13
1 Hau: thang: ri panglai: khoug: mo khyoug: daxi: khyoug: yo' vhuloem nyhed loem: dab da" akhyeung" da" gougnyhoug dadu" thu' lo ziri ngoo myang. Nya: da" khyoug: loem: khang" moo" moo bidmug, joem zhoung" ci: lho: nya: da" vhuloem loem: khang" moo" moo Mangsoo ri rui" da" myeing joem ri lhid" tab ci:
2 Ngoo myang da" hau" akhyeung" da" goug, nyhoug gi Myeing khuid" yo' du- nya: da" khyid: gi voem, khyid: yo' du lho: nhoid gi khang' khyi nhoid yo' du go" nyid. Hau:main jung: ni zeing gi nya: da" yoemso yo' nya: zhungtang ri we' nya: gyi: thang da" amyeung" ri we' hau: akhyeung" da" gougnyhoug ri ab, byid: bye:.
3 Nya: da" vhuloem daloem: gi shid: loo" ko: da" dam, gi ge lo" nyid bye:. Mougmyid xangsu: byu yi dangain" mo, gi hau" akhyeung" da" gougnyhoug ri mau" zoore nya: thang: moo cang lo" nyid boem ago".
4 Main jung: ni zeing gi nya: amyeung" ri hau" akhyeung" da" gougnyhoug lo, moo ab, byid: too" su: nghoid yoomo byu yug khang" moo" gi main jung: ni zeing ri noku nyid boem ago". Hau" byu yi gi akhyeung" da" gougnyhoug ri we' noku zoore" He" akhyeung" da" gougnyhoug yo' hang" se' du go" lha". Nyang: ri hang" to' voem" zain: wa lha"? ga: tid nyid boem ago".
5 Hau" akhyeung" da" gougnyhoug gi phau: khuang lo lho: wigi Mangsoo ri aphoug" akhyoid tid wa da" akhang" yo" . Lhammoo" myid: xe: eig khyab, shid mo yoemso amyeung" yo" yu ci: abye:.
6 Nyang: gi Mangso da" myeing ri we' Mangsoo nyid da" mougkhung: mo mo, ri we' nheung" shed" loo" bye:.
7 Nyang: gi Mangso byu phung: yi ri meing: zain ung: wa da" akhang" yo' mungdain: loem: khang" moo" moo nyid da" byumyu" cang: joeb- myeing" cang: joeb, kaid da" byumyu" dangain" bang: da" atho' moo vhoeb khang" wa da" akhang" ri nyang: yo" yu ci: bye:.
8 Said pyam shau" bye: yang nu" da" kangso mougsoug" pug moo moug: aphain" soo: myid aphain" soo: shi" mo nyang- myeing bo jo, bang: mo gootu- mougmyid moo nyid da" Xangsu: byu yi dangain" bang: gi hau: akhyeung" gougnyhoug zeing ri coem noku boem wa zi nghoid.
9 Nookhyab, dab mo, gi shoug" gyoo: goo" baja".
10 Myheug, zi shau" wa su: gi gyeing" nyang: myheug zi shau" wa nghoid- sham: yo' said pyam zi shau" wa su: gi gyeing" nyang: sham: moo shid: wa zi nghoid. Hid: moo Mangso byu yi shoid khyo" kham zeung: ziyo' loem" jeing" khyoo: geingteing jo, nyid ca".
11 Hau: thang: ri akhyeung" da" gougnyhoug gootu: dadu: gi myid jang: mo thu' lho: nyang: moo yangnu" khyoug: yhang: te" zi eig khyoug: yug lho: main jung: zeing yhang: ti" dang: tid nyid.
12 Nyang: gi xangshid" mo gougnyhoug da" amyeung" akhang" dangain" ri hau" gougnyhoug shidkhoin" moo ci: yhoung: nyid. Nyang: gi dam, noo ge loo" bye: da" akhyeung" gougnyhoug ri agyoo: atho' nyhin" no' nhang: nyid.
13 Eig du: ein: da" akhyeung" gougnyhoug gi mau" pho" alhoo: again joem ri koid shug. Byu dangain" mo, da" shidkhoin" moo mougkhung: mo myidjang tho' khyoo:- myi: gyoo" loo nhang: khyo" we' yo" koid shug.
14 Nyang: gi xangshid" mo da" akhyeung" gougnyhoug shidkhoin" moo mau" pho" alhoo: again joem ri koid shug lho: wigi mougmyid byu yi dangain" ri mhoid" fain" nyid lho: sham: dam tab' nghoid loug we' ashid: loo" loo: dei nyid da" hau" gougnyhoug ri phoug" tab ngi: shab khyo" wigi nya: da" soolhoo: daloem: ri koid wa shid re" mougmyid byu yi ri tid kaid.
15 Hau: akhyeung" da" gougnyhoug soolhoo: gi dang: yo" tid wa ziyo' hau" soolhoo: ri ano' bang: ri shau" said pyam wa shid re" eig du:ein: da" akhyeung" gougnyhoug gi hau: xangshid" akhyeung" da" gougnyhoug soolhoo: moo kangso yo" moid, kaid byid: wa da" amyeung" zeing yo.
16 Hau: akhyeung" gougnyhoug gi gyi: mo, yo' ngi mo, di mo, yo' myung, mo loid byoin, bye:mo, yo' join koid nyid mo, byu yi bain sho' ri lo, yo lo, moo anghoid lang" gi ngeilang: moo nya: da" laxoem" dazid' ri agyoo" gyoo: tab nhang: to".
17 Hau" akhyeung" da" gougnyhoug myeing- anghoid lang" gi hau: myeing khyang" da" nghab yug laxoem" dazid' adab mo, hang" nghoid loug we' zi, qei wa ziyo' ung" wa da" akhang" ayoo.
18 He: jang" moo phajhi" juyi boo ca" nyid hau" phajhi" juyi boo su: gi hau" akhyeung" gougnyhoug da" nghab yug ri se' soin: yu"- Khasu" wim ga: ri hau" nghab yug. Laxoem" dazid' gi byu dayug da" myeing nghoid lho: wigi hau: nghab yug gi 666 nghoid nyid.