12
1 Hau: thang: ri mouglaid phyoo" moo mau" pho" da" aved alhoo: zeing daja: doem bue" thu' loo ziri ngoo myang. Houg: moo myiyi: myhi dayug gi bid' ri gang" ci: lho: lhammoo" tho' moo nang: zeug, ci: wigi kyi: daxe: eig cab, dab da" bidmug, ri zhoung" ci.
2 Nyang: gi gung lid: ci: zi nghoid yoomo amyang" ri khu: loo wa shid re" zookhu: noo no ngau nyid.
3 Hau: lho: mouglaid phyoo" mo mau" pho" khyoo: daja: gi bidmug, ri zhoung" ci: da" vhuloem nyhed loem: dab lho: khyoug: daxi: khyoug: yug da" mainjung: ni zeing dadu: thu' lo.
4 Nyang: gi mouglaid phyoo" mo kyi: joem soem" boem mo daboem ri nya: da" myi: yhang' yo' shoem" yu lho: myidjang tho' khyoo: du" khyo' kaid.
5 Hau: myi: yi myhi' gi byumyu" yi bain sho' bang: tho' moo joto' lham: dung: yo' vhoeb khang" wa da" yug gi zoo: ri khu: kaid. Nghoid loug we' hau" zoonu" gi Mangsoo yo' nya: zhungtang khyoo: lhoid shu" lo" zi shau.
6 Myiyi: myhi' gi nya: shid re" Mangso wigi nyheung too" byid: da" dain" pyoid yoo khyoo: phang: yhe:lo" lho: hau: joyoo moo bidnyid 1260 nyid" ju" sho' nyang: ri coung" goem, zho' jhoug, zi shau" nyid.
7 Hau: thang: ri mougkhung: moo meingzain: go" lo- Mikhaela yo' nya: moug: lagyoo: yi gi main jung: ni zeing ri zain: nyid. Main jung: zeing we' nya: shoid mo nya: lagyoo: yi yo' doem tau" zain: lo.
8 Nghoid loug we' main jung: ni zeing gi gyi zain: soem" loo" yoomo nyang: yo' nya: da" lagyoo: yi gi mougkhung: moo ashau" nyid boem loo.
9 Mougmyid gyab, goin" ziri shu" mhau' fain" vo, nyid su- main: yu- anghoid lang" satan ga: myeing yoo" su- goonham, mo main jung: ni zeing ri nya: moug: lagyoo: yi dangain" yo" dage" myid jang: tho' khyoo: du" khyo' kaid zi shau" abye:.
10 Hau: thang: ri mougkhung: mo thui: zeing yo' tid nyid zigi Akhid" Mangso khyoid yu khyoo: ju" ri" bye:- Akhid" Mangsoo gi Khokham" yoemso ri toin" shid bye:- Akhid" nya:Meshia gi nya: amyeung" akhang" ri toin" shid abye:- Khasu" wim gari ngoonu" da" mangnhung" yi yo' ngoonu" da" Mangso shid' khoin" moo yab, jo, lho: nyid" ri myen" ri yooboo foin: pyi: sho: nyid su:gi mougkhung: mo khaid khyo pyam zi shau" bye:.
11 Ngoonu" da" mangnhung" yi gi yang nu" da" suid" mo we' nyang: nya: kho" kyo" da" deingmain" mungdang: yoomo we' satan ri oung: pyam bye:. Xo' lho: wigi houg: bang: gi shid: kham jang" moo ju" sho' nyang: nya: da" kangso' ri vhoo" abyid boem nghoid ago".
12 Houg: yoomo nang mougkhung: yo' houg: moo nyid bang: dangain" gi gau yi nyid loo: ge'. Nghoid loug myid jang: yo' nam mug dara koem gi gyoug dain' nyid loo: ge'. Khasu" wim gari main: yu gi nya: da" bidnyid dajhi' za: date: deing lo: ziri se' yoomo nheig khoo" yo: ziyo' nanu" jhang khyoo: ju" gyo" loo bye:-,, ga: tid ziri ngoo shau" gyo:- ga: tid.
13 Main jung: ni zeing gi nyang: ri myid jang: tho' khyoo: khaid khyo' kaid ziri si lang" nyang gi yug gi zoo: khu: loo wa da" myiyi: myhi' ri cang khaid myheug yen" bye:.
14 Hau:myi: yi myhi' gi main jung ni zeung da" gyi mo loid byoin, loo" sho' soem" zain dakhyam" zung" lhug coung: goem zi shau" wa da" dain" pyoid yoo mo wigi nya: joyoo khyoo: yo" dang: loo" wa shid re" zoinbung: zeung, da" dung eig khyab, nyang: ri byid: to" zi shau" .
15 Houg: lang" main jung: ni zeing gi hau" myi: yi myhi' ri myu: loo" nhang: wa shid re" myi: yi myhi' jhang khyoo: nya: da" nhoid khoug: mo tigyid' ri shi thu kaid.
16 Nghoid loug we' mougmyid gi nya: nhoid ri fo, kham: kaid lho: main jung: ni zeung da" nhoid mo thu' lo da" gyid ri myhau: pyam khyo" wigi myi: yi myhi' ri pang" thoug yu bye:.
17 Houg: lang" main jung: ni zeing gi nheig khoo" yo:' wigi myi: yi myhi' yo' hau: yug da" amyed ashen yi ga: da" Mangso amyeung" dang: yo' Yesu khyo" pang shug to" da" deingmain" da" khyoo: moo loem" jeing" tam" gyo: lho: cang loo" mo, ri gyi khaid wa shid re" thu' loo" khari" bye:.
18 Hau: lho: main jung: ni zeing gi panglai: gyid yam, moo yab, jo,.