8
1 Hougsu" yoomo Khristu Yesu dadeing: za: nyid mo gi tarha" dang: phyed khyoo: aboo loo.
2 Khasu" wim gari- Khristu Yesu yo' dadeing: daloem: za nyid nhang: da" Venyi: yo" tarha" gi shid: lo" khyoo: yo" yooboo da tarha" mo ngoo ri lhoid pyoin' kaid bye:.
3 Byu xangsu: gung sho" nheigloem: yoem: neing: khyoo: yoomo Moshe da tarha" yo' ayo" voin vu da" moo" ri Mangsoo: gi voin vu pang" byid: bye:. Mangsoo: gi byu xangsu: gungshoo" zei: shoid moozoo" khyoo: tid yooboo dang: phyed wa shid re" nya: zooti" ri nhang: kaid bye:. Hau: nya: zooti" zoo: gi yooboo tarha" ri phyo' shoin' pyam wa shid re" xangsu: byugung re" void yu bye:.
4 Hid: su" Mangsoo: yoovoin yu lho: bo voin vu da" deingmain: khyoo: gi ngoonu" ri xangsu: gungshoo" nheigloem: khyo" anghoid loo: za: Venyi: da" myid vho: khyoo: khyo" kangso dei da" ngoonu" gi Moshe da" tarha" ri yo" cang pyeing wa shid re" nheig shid: jang: nghoid.
5 Gungshoo" nheigloem: wigi koid nhang: da" moozoo" yo' dakhyoo" ti" kangso dei nyid mo gi- gungshoo" nheigloem: vho: khyo" za: nheigloem: zhug se' boem ago". Nghoid loug we' Venyi: khyoo: shid khyo" cang koid loo" mo gi Venyi: vho: ngei da khyoo: cang nyid mo, gi- nya gung ri nyang: yo" vhoeb khang" mo, nghoid.
6 Xangsu: gungshoo" nheigloem: khyo" vhoeb khang" su: gi- kangso soem" wa nghoid. Venyi: vho: da" khyo" vhoeb' khang" too" su: gi- kangso yo" lho: myen jham" ngeipyoo: wa.
7 Xangsu: gungshoo" nheigloem: za: dabo nyid su: gi- Mangso gyi nghoid. Houg: te" nheigloem: za dabo nyid su: gi Mangso mungdang: ri acang su: nghoid. Gyeing" nyang: ayo" cang su: nghoid.
8 Nyang: nya: gungshoo" nheigloem: khyo" za: cang loo" mo gi Mangso nheigloem: yo" azhoung" goo".
9 Hougsu" nghoid loug we' Mangso da" Venyi: gi nanu" da" ung: khoug: moo bo nghoid rigi nanu" gi gungshoo" nheigloem: lhu: nhau khyo" acang loo: Venyi: wigi lhu: poin" lhu: nhau jhau" byid: da" khyoo: moo cang loo" goo" wa. Khristu da" Venyi: aboo mo, hang" we' Khristu yo" dajhi' we' asen.
10 Nghoid loug we' nanu" moo Khristu re" loung" jo nghoid ri gi- yooboo koid yoomo nanu" da" gungdu: shid: wa khyoo: yhe: loo" loug we' khasu" wim ga ri young" gyeing" da" Venyi: gi nanu" ri kangso dei nyid nhang: wa nghoid. Khasu" wim ga: ri nanu" gi Mangso da" shidkhoin" moo deingbyeing" mo bue" wa amyeung" yoo" yoomo nghoid.
11 Aseing Yesu shid: jangmo doem dei to'' loo nhang: da Mangso Venyi: gi nanu" da akhoug: moo bo nyid rigi Yesu Khristu ri shid: jangmo doem dei to'' loo nhang: da" Aseing gi nya: da" Venyi: khyo" wigi nanu" da" xangshid" gungdu: joem ri we' doem dei to'' loo nhang: wa zi nghoid.
12 Houg: yoomo mangnhung" yi we"-Mangso da" Venyi: wigi jhau" shed byid: zi yo" dakhyoo" ti" Myid soin: zei so' nyid boem ca" . Gungshoo" vho: khyo" akoid' nyid goo".
13 Gyeing" nyang: nanu" gi nyang: nya: gungshoo" vho: da" khyo" za cang lho: kangso dei nyid rigi shid: lo" boem wa. Nghoid loug: we' nanu" gi nyang: nya: da" akhyeing" ashoeb' da" asam" aveid ri Venyi: wigi bo pang" thoug khyo" bain sho' she: pyam boem nghoid rigi dei da" kangso yo" boem wa.
14 Mangso da Venyi: khyoo: shid vhu" she: da zi ri kham: yu da" byu yi gi Mangso da" nya: zoo: yi nghoid bye:.
15 Mangso jhang mo nanu" yo" kham yu da" young" gyeing" da" Venyi: nanu" ri join doid loo" nhang: zi anghoid. Gyoug da" nheigloem: ri kaid bye: zi we' anghoid. Young" gyeing" Venyi: gi ngoonu" ri Mangso da nya: zoo: yi yo" bui" nhang: yoomo ngoonu" gi Mangsoo: ri Phoo' we"- nga" phoo' we" ein: yo" yoid da" akhang" yo" yu boem bye:.
16 Ngoonu" gi Mangso da nya: zoo: yi yo" bui" lo da" khyoo: ri young" gyeing" Venyi: nya: gung nyang: lang" ngoonu" da" Venyi: yo" dage" sagsi kham: nyid.
17 Ngoonu" gi Mangso da" nya: zoo yi nghoid yoomo nya: da" byumyu" shid re" nyheung' to" da" mainkaid jeju joem ri ngoonu" shau" kham: zo: boem wa. Khristu da shid re" Mangsoo: nyheung' to" zi ri we' bo shau" kham: zo: boem wa. Khasu" wim ga: ri ngoonu" gi Khristu yo" dage" sho" jhen: kyikhyeug noo bo kham: nghoid ri nyang: yo' dage" nya: myonhoo: phung" yoeb bo shau" vang kham: zoo: wa nghoid.
18 Akhid" he: da" pyaid moo ngoonu" thoung" shau" nyid da" kougshu: sho" jhen: khyoo: gi thang: phyang" pyaid Mangsoo: gi ngoonu" ri shau" kham: zoo: nhang: wa da" myonhoo: phung" yoeb yo' citham: atu' yu" ein: ngoo loem" jeing" nyid.
19 Mougmyid goin" mo phain" too" shau" su: gi Mangsoo: nya: zoo: yi ri thu' myang loo nhang: wa da" moozoo" joem ri gye nheig byu myid lang" nyid boem.
20 Mangsoo: gi he mougmyid ri akoem: bue" loo wa shid re" yooboo dang: phyed byid:- Hougsu" dang: phyed da" khyoo: gi mougmyid nyang: vhoo: yoomo anghoid. Mangsoo: nyang: dang: phyed yoomo nghoid. Nghoid loug we' nheig byu jang: jo shi".
21 Hau da nheig byu jang: gi danyid" da" bidnyid ri he phain" too" shau" da mougmyid gi- zoo go" da" zi wigi myheig tei" to" jang mo loid byoin lo" lho:- Mangso da nya: zoo: yi yo" da ge" loid byoin khyoo yo" myonhoo: phung" yoeb ri shau" kham: zoo: wa.
22 Phain" so: too" shau" da mougmyid goin" gi- zoo: khu: noo no, da u" ri yhang: te" da" kyikhyeug da" yaukhi" kyiyang' myeing khyo" akhid" nyid" ju" sho' kham: zo: yau: nyid da khyoo: ngoonu" se'.
23 Phain" so: too" shau" da moug: nyid za anghoid. Mangso da xangshid" mo jhungshug nghoid da" Venyi: ri shau" kham: yu da" ngoonu" we' Mangso da nya: zoo yo" bui" wa da akhang" ri we' ngoonu" da" gungdu: goin" bain sho' khyoid yu shau" ri we' lang" nyid zoo" re" kyiyang myeing nyid boem.
24 Ngoonu" gi nheig byu khyo" wigi khyoid yu zi shau" nghoid loug we' nheig byu jang: ri ngoonu" myang nghoid rigi hau: da" nheig byu jang: gi gyeing" gyeing" da" nheig byu joyoo anghoid.. Bain myang bye zi ri hang" su: nheig se' byu nyid loo wa.
25 Nghoid loug we' ngoonu" gi amyang yu shi" da" zi ri loem" jeing" nheig byu nyid nghoid ri gi hau da zi ri nheigloem: sheing" sheing" lang" nyid.
26 Dalheung: dam nyang: young" gyeing" Venyi: gi yoem: neing: nyid da ngoonu" ri pang" thoug wa shid re" gyoo" lo zi nghoid. Ngoonu" gi akyu" khasu" mho' wa zi ase' boem yoomo nghoid: wigi ayo" tid kyo" da" kyiyang' myeing: da" khyoo: ri Venyi: nya: gung du nyang: Ngoonu" da" shid re" Mangso jhang bo pang" mho' byid: nyid.
27 Byu da" nheigloem: ri myang: byid: da" Mangsoo: gi Venyi: da" nheigloem: ri we' bo si byid:. Khasu" wim ga ri young" gyeing" Venyi: gi Mangsoo: vho: zi yo" dakhyoo" Aseing nya: byu yi shid re" bo mho' mho' sang: nyid yoomo nghoid.
28 Mangsoo: gi jheddab yoomo Aseing myid vho: zi yo" dakhyoo" khe: khyen: yu shau" mo ri thoung" shau" zoo: wa da" moo" dangain" mo akyu" bo thu' loo wa shid re" Aseing gi nyangnu" yo" dage" zei: so' khyoo: ri ngoonu" se'.
29 Mangsoo: gi- nyang: khyen: yu too" mo, ri nya: zoo: Yesu yhang: ti" bue" loo wa shid re" nghoid.
30 Houg: yoomo Mangsoo: gi nyang: khyen: thu' too" mo ri khe: yu. Hougsu" khe: yu too" mo nya: shidkhoin" moo deingbyeing" mo agyeing" khyo" kham: yu lho: nya: myonhoo: phung' yoeb ri nyang: yo' dage" yo" bo kham: zoo: wa akhang" byid bye:.
31 Tho' moo tid lid lo da" khyoo: ri agung kaid lho: dang: thang: said loo wa. Mangsoo: gi ngoonu" thang: dab jo rigi hang" we' ngoonu" ri yo" ung: wa zi anghoid.
32 Mangsoo: gi nya: zoo: gyeing" ri vhoo" abyid' looza:- ngoonu" dangain" mo shid re" gung leig xoin" to' pyam bye: nhung. Ngoonu" shid re" nya: zoo: ri byid: da" Aseing gi zi jo, moojo, ngoonu" ri noug noug za: abyid: loo: khasu" se' nyid wa la".
33 Mangsoo: khyen: to" da byu yi ri yooboo hang" yo" foin: wa lha". Nyangnu" moo yooboo abo da" khyoo: ri Mangsoo: nyang: thoid' shid tid fu" too" bye:.
34 Houg: yoomo nyangnu" ri hang" we' yooboo dam yo" byid: wa zi anghoid. Shid: kham: da" zi za anghoid. Shid: jangmo doem dei to'' lo da" Aseing Yesu Khristu gi Mangso da lo yo shoid moo zhoung: jo lho: ngoonu" da" shid re" bo mho' tung" bain: byid: nyid.
35 Houg: yoomo ngoonu" ri Khristu da" jheddab jangmo- hang" yo" kang" pyam wa lha". Yau: khe" khyoo myidmyoo: ungloug khyoo:- shen" jhen' khyoo:- zooyoid gyid shid khyoo:- myoung: joid sho" jhen: da" khyoo:- shidgyoin noogyoin thoung" shau" khyoo: said pyam shau" da" khyoo: yi gi yo" kang" wa la".
36 Aseing da" shid re" ngoonu" gi nyid" khang" nyid" shidgyoin noogyoin yo" dathoung" shau" nyid.
Said wa ga: tei" to" da" yang joem yhang: ti" ngoonu" ri subi" houg: su" soin: too" bye:-
ga: da" jhoem: mungdang: yo" dakhyoo" ti" nghoid nyid.
37 Nghoid loug we' agang: alain loo" nhang: tho' moo gootu: ngoonu" gi hau khyoo: dangain" yo" thoung" shau" goo" wa jang" moo ngoonu" ri jheddab da Aseing khyo" wigi atho' tid oung: doid loo" bye:.
38 Khasu" wim ga: ri ce: zi we' ngoonu" ri nya: jhang mo ayo" kang" pyam . Shid: khyoo: nghoid loug we' kangso dei khyoo: nghoid loug we' moug: lagyoo: yi nghoid loug we' mougkhung: tho' mo vhoeb khang" mo, nghoid loug we' yoem: vho" yoemso nghoid loug we' lid: loo" bye zi nghoid loug we'.
39 Mougkhung: tho' mo zi nghoid loug myid thi" khoug: mo, zi nghoid loug we' ngoonu" da" Aseing Yesu' Khristu khyo" wigi Mangsoo: toin" shid da" jheddab jangmo- ngoonu" ri yo" kang" pyam zi anghoid.