7
1 Nga" mangnhung" yi we" nanu" gi tarha" ri soo" soo" si' mo, nghoid yoomo ngoo ci: tid wa zi ri nanu" gyeing" nyang: se' gyoo: wa byu gi kangso dei nyid daloo gyoo: ri tarha" gi byu yi da" atho' moo jo.
2 Dangtu tid shang ein: rigi Deungkhu: vang da myiyi: dayug gi nya: yhoem: seing: phoo dadei nyid nyid gi hau: yug yo" lo, xo' to" tarha" khyo" nyid ca. Nghoid loug we' yhoem: seing: phoo' shid: thang: ri koem' gi lo, xo' to" da tarha" mo nyang: loid loo" bye:.
3 Hougsu" nghoid yoomo nyang: gi- yhoem: seing: phoo' kangso dei nyid shi" ri gootu: yug gi dayug yo" zoem" nyid nghoid rigi yuggi lhoid' da" myiyi: ga: tid wa zi nghoid. Nghoid loug we' yhoem: seing: phoo' shid: loo" bye su: nghoid rigi gootu: yuggi lo, doem yo" xo' rigi yuggi lhoid' da" myiyi: ga: wa zi anghoid loo.
4 Nga: mangnhung" yi we"- he: da" khyoo: gi nanu" yo" we' sen: nyid. Nanu" gi Khristu da" gungdu: nghoid wigi Moshe tarha" khoug: moo nyid da" pyaid she: lhei" pyam phyed boem bye:. Mangsoo: moozoo" moo akyu" bo da" deizoo: yi bui" loo wa shid re" nanu" gi shid: jangmo doem dei to'' lo da" nya: byu yi nghoid boem bye:.
5 Ngoonu" gi gungshoo" nheigloem: ri cang lho:- Kangso dei nyid boem uri Moshe da" tarha" yo" shu" u" she: zi Yo" dakhyoo"- yooboo koid nau da" nheigloem: gi ngoonu" da" gungdu: ri shid: wa jang" moo thang loo" nhang:
6 Moshe da" tarha" gi ngoonu" ri tei" to" yu" bye:. Nghoid loug we' akhid" ngoonu" gi hau: da" tarha" khoug: mo loid lo" boem bye:. Akhid" uri ngoonu" gi lhid" to" da tarha" khyooxoug" khyo" anghoid looza: Venyi: khyoo khyo" Mangso moo" voin vu, nyid boem bye:.
7 Hougsu" nghoid rigi ngoonu" khasu" ein: tid boem wa lha". Moshe da" tarha" gi yooboo da" tarha" ein: wa la". Hougsu" age tid. Nghoid loug we' yooboo ga: zi ri Moshe tarha" wigi ngoo ri si nhang:. Gyeing" nyang: Moshe da" tarha" gi myo no, vhoo: age boo ga: atid' to" nghoid rigi myo no, vhoo: bo ga: zi ci: nghoid zi ngoo si wa zi anghoid.
8 Yau: noo yooboo gi ngoonu" ri hau: Dang: Theung Khoin" ri myid boin: yoomo ngoonu" da" nheigloem: ung: khoug: moo myo, no, vhoo: bo da" shoid vhang: khyoo: aja: ja: ri bue" loo nhang: Moshe tarha" ga: zi ajo, nghoid rigi yooboo gi jo zi anghoid.
9 Ngoo gi Moshe da" tarha" ri dajhi' we' asi' loo: nyid lid: lo yu" bye:. Nghoid loug we' Dang: Theung Khoin" ri se' lo da" zi yo" dage" yooboo jo lo lho:
10 Ngoo shid: loo" bye:. Ngoo ri doem dei loo nhang: wa shid re" byid to" da" Dang: Theung Khoin" nyang:- nga" da" kangso ri shid: nhang: nyid.
11 Yooboo gi ngoo ri Dang: Theung Khoin" ri myid boin: nhang: wigi ngoo ri lheing jhoem'- ngoo ri shid: nhang.
12 Houg: yoomo Dang: Theung Khoin" gi gyeungshang: lho: hau: dangkang: gi gye ge gyeungshang: deingbyeing.
13 Hougsu" nghoid ri gye ge da" zi gi ngoonu" ri ciwim shid: nhang: la". Ashid: nhang: nghoid da:- ngoo ri shid: loo" nhang: zigi yooboo nghoid da. Yooboo gi shid: lo" khyoo: ri kang' kaid lho:- agung yab shug loo nhang: wa shid re" ge da" tarha" ri ci: lho: ngoo ri shid: nhang: da" khyoo: za nghoid. Hougsu" nghoid yoomo yooboo gi khayhi' gyug ge da" khyoo: ri Dang: Theung Khoin" wigi toin" shid nyid.
14 Moshe da" tarha" gi Venyi: khyoo: yo" ngoonu" se' nghoid lhoug we' ngoo gi yooboo join doid da" byu nghoid.
15 Ngoo nyang: koid da" moo" ri ngoo ase' gyoo. Khasu" wim lha" ga: ri ngoo nyang: koid nau zi ri gi akoid' loo za: ngoo ngheing" da" moo" ngoo koid nyid yoomo nghoid.
16 Ngoo gi- ngoonyang: anau koid da" moo" ri zi nyid da" uri Moshe da" tarha" deingmain" nyid khyoo: ri ngoo yhen: yu.
17 Houg: yoomo ngoo koid da" moo" ri bo koid su gi- gyeing" nyang: ga ri ngoo anghoid. Nga" zei: da" moo" zoo" ri koid nyid su: gi ngoo moo bo nyid da" yooboo wigi koid nyid zi nghoid.
18 Xangsu: byu nghoid da" ngoo moo ge da" moo" ri yo" zei: wa da" yoemso abo zi ngoo se'. Khasu" wim ga ri ngoo moo ge da" moo" ri zei wa da" amyeung" boo nghoid loug we' yo" zei: wa yoemso aboo.
19 Ngoo gi ge da" moo" ri zei: noug nghoid loug we' azei: loo: za:- anau koid da" akhyeing" ashoeb' moo" ri za: te: zei: nyid.
20 Ngoo anau koid da" moo" ri zei: nyid su: gi- ngoo anghoid. Nga" dangkang: gi nheigloem: moo dei nyid da" yooboo nghoid.
21 Hougsu" yoomo ngoo gi ge da" khyoo: koid nau da" uri- akhyeing" da" khyoo: ri za: khyen: yu nhang: da" tarha" ri za myang.
22 Mangso da" tarha" ri nga" nheigloem: gi gau yi ngeipyoo: za lhoem: yu bye:.
23 Nghoid loug we' nga" gungdu: khoug: moo hau: vho: ngei khyoo: yo' gyi zain: go" nyid da" nheigloem: gootu boo shi" ziri ngoo se'. Hauda" nheigloem: gi nga" gung khoug: moo lu khang moo" zei: nyid lho:- ngoo ri yooboo khyoo: doem doin: jhoin" kaid.
24 Ngoo gi nheigloem: gye" apyoo: su: nghoid nyid ngoo ri shid: loo" nhang: da" he: gungdu: mo hang" se' khyoid yu loo wa lha".
25 ngoonu" da Aseing Yesu' Khristu khyo" khyoid yu da" Mangsoo: jeju" zeing gi gyi: sheung: jo nhung: Jhung: shoem: khyo" wigi-
ngoo moo bue" da" khyoo: ri tid phoid' kyo" nghoid ri ngoo gi nheigloem: khyo" Mangso deizoo: koid nyid nghoid loug xangsu: gung sho" nheigloem: xoug" gi yooboo da" deizoo: dakoid' nhang: nyid.